موبوتو سيسي سيكو
موبوتو سيسي سيكو
| ||
 | ||
| معلومات عامة | ||
| زيادة | 14 أكتوبر 1930 ليسالا (الكونغو البلجيكية) | |
| لموت | 7 شتنبر 1997 (66 عام) الرباط | |
| طريقة دلموت | موتة طبيعية | |
| سباب لموت | كونصير د لپروسطاط | |
| لجنسية | جمهورية الكونغو زائير | |
| لحرفة | سياسي، صحافي و عسكري | |
| لّوغات لي كيعرف | لينغالا، لفرانساوية و Ngbandi | |
| لفاميلة | ||
| شريك | Bobi Ladawa Mobutu Marie-Antoinette Gbiatibwa Gogbe Mobutu | |
| لولاد | نزانغا موبوتو | |
| معلومات خرى | ||
| دين | لكنيسة الرومانية لكاطوليكية | |
| لحيزب | Popular Movement of the Revolution | |
| لعسكر | ||
| لڭراد | ماريشال | |
| لحروب | أزمة الكونغو، حرب شابا الثانية، الصراع التشادي الليبي، الحرب الأهلية الأنغولية و حرب الكونغو الأولى | |
| لجوايز | ||
   | ||
موبوتو سيسي سيكو (14 أكتوبر 1930- 7 شتنبر 1997) كان ثاني رئيس ديال جمهورية لكونݣو الديموقراطية من 1965 ل 1997 (بدل السمية ديال الدولة رجعها زايير من 1971 ل حتى ل 1997)، كانو مكنين عليه الفهد د كينشاسا.[1]
تولد جوزيف ديزيري موبوتو فشمال غرب دل كونݣو ف مدينة ليسالا ملي كانت لكونݣو مستعمراها بلجيكا.
كان باه ألبريك ݣبيماني خدام طباخ فلحاكم د ليسالا، و مات باه ملي كان جوزيف عندو تمن سنين، و من بعد رباه جدو و عمو.
كمل لقرايا ديالو ف مدراسا كاطوليكية، و ملي وصل ل 18 عام، مشا للعسكر دلإستعمار البلجيكي فين كانو العساكريا البيضين كيحكمو فلكحلين.
تزوج علا 25 عام ب ماري يتيني، و من بعد تحول لمركز لقيادة دلجيش ديال الإستعمار البليجيكي ف ليوپولڤيل عام 1953.
من بعد ما دوز تامارا فلعسكر، مشا خرج منو و ولا صحفي ف جورنال "L'Avenir" الليبيرالي ف ليپودڤي عام 1957، و كان خدام تحت إشراف الصحفي أنطوني بولامبا لي قدمو ل پاتريس لوبومبا.
مشا اول مرا ل أوروپا عام 1958 باش يدوز مؤتمرEXPO ف بروكسيل فين بقا شوية باش يتعلم الصحافة كثر. في نفس الوقت كانو ناس سياسيين كونݣوليين كيدويو و كيناقشو معا البلاجكة ف بروكسيل باش ياخدو الإستقلال ديالهم من بلجيكا.
فيوليو 1960 من مورا الإستقلال ديال الكونݣو، ولا هو وزير الدولة فلحكومة ديال پاتريس لومومبا.
كان ستافد من داك الصداع بين السياسيين و بلي بلي كان هو بوحدو من الاتباع ديال لومومبا لي فايت مدوز لعسكر باش يولي هو رئيس أركان الجيش الكونݣولي.
و اخا كان عند لومومبا واحد الإقبال كبير، كانت عندو مشاكل كبيرة معا بلجيكا، إذن ف 1960، بسباب التأثير ديال السفير بلجيكا ف لكونݣو ديك لوقيتة، تشد الرئيس پاتريس لومومبا.
و هنا فين بدات العلاقة ديال موبوتو معا بلجيكا، و دار حكومة مؤقتة، و كان اتهم لومومبا ف تلفازا بلي هو معا الشيوعيين، و دار هاد القضية باش يعاونوه ميريكان.
لومومبا بغا يهرب من لكونݣو و لكن تشد و أمر موبوتو باش/بلي راه يدخلوه للحبس، و من بعد صيفطو لواحد لمدينة سميتها كاتانغا فلجنوب ديال لبلاد فين غادي يموت.
هادوك الناس لي كانو كيبغيو لومومبا دارو حرب ضد موبوتو، وكانو شدو 1/3 ديال لبلاد دغية، و لكن ميريكان عاونات موبوتو و ربحو هاد لحرب ضدهم.
موبوتو ماكانش يقدر يربح بلاما يعاونوه ميريكانيين.
كان بغا يحضي جوج حوايج، لخارج معا لحرب لباردة و لداخل باش يقدر يحكم حسن و يشد هادوك لي كانو ضدو و يقمع اي واحد بغا يكون ضدو
ف 24 نونبر 1965، موبوتو دار نقيلاب بيض (يعني بلا عنف) علا جوزيف كاسا ڤوبو لي كان أول رئيس ديال لبلاد مورا الإستقلال.
جا هاد نقيلاب مورا واحد الأزمة سياسية خايبة مابين جوزيف و حكومة ديال الجنوب لي كان القايد ديالها هو موسى شومبي.
كولشي كان باغي هاد نقيلاب، النقابات، الحركات ديال الطلاب، الكونݣوليين و الأجانب، و حتا من كاسا ڤوبو و شومبي بغاو هاد التجديد.
أول وحدين عتارفو بهاد الرئيس الجديد هوما لميريكان و بلجيكا، ولكن الشينوا و تيحاد سوڤياتي ماكانوش باغينو.
كان موبوتو كيتعاون معا بلجيكا معا كان هو فلعسكر لبلجيكي.
موبوتو كان عارف الشعبية لي كانت عند لومومبا عند الشعب الكونݣولي،
داكشي علاش عتابرو بطل وطني و أول شهيد ديال الإستقلال
من الناحية لقتيصادية، موبوتو رجع الشركات البليجيكية تابعين للدولة ف 1966، و رجع لكونݣو بحال لعود د طروادة ديال لميريكان ضد الإنتشار ديال الشيوعية فلافريك، و بلخصوص ف جنوب إيفريقيا
كان كيرحب بلمعارضين من أنݣولا و عاونهم باش ياخدو الإستقلال ديالهم من لبرطقيز، ولكن كان فنفس لوقت ضد الحركة MPLA الشيوعية
و كان ميريكان كاتعاون هادوك الحركات لي كانت باغا على طريق الكونݣو بحال الحركات ديال FLNA و UNITA
حارب واحد المظاهرة ديال الطلاب و قتل بزاف ديال الناس، لاح بزاف ديال الجثث ديال الطلاب لي قتل ف مقابر جماعية و 12 طالب تضرب بلإعدام.
سدو الجامعة عام كامل و 2000 طالب منهم دخلهوم للعسكر، و قال فتلفازا مورا هاد المظاهرة "يا تعلمو تطيعو يا تعلمو تسدو فمكم"
كان موبوتو دار واحد النظام قمعي كيحكم فيه حزب واحد لي سميتو حزب الثورة الشعبية (بلفرونسي سميتو :le Mouvement populaire de la Révolution) و عطا لراسو الرتبة ديال ماريشال ف 1982.
من الأحلام ديالو هو الدولة ترجع للثقافة ديالها القديمة و التاريخية، داكشي علاش ختارع واحد المفهوم سميتو الزاييرية (ب لفرانساوية: Zaïrianisation) و كانت كاتعني لحبيس ديال الإستعمار الثقافي.
ف 1971، هاد العام سماو عليه "لعام ديال 3 د Z " عاود سما الدولة، العملة و النهر و سماهم الزايير.
و فنفس العام فرض الناس يلبسو الناس اللباس الشعبي لي سماه "" لي كيعني اللباس المتواضع، باش يبدلو هاداك اللبس الغربي لي كان نتاشر.
و طلب من الناس يسميو ولادهم سميات إفريقية ماتكونش سميات مسيحية
سما راسو واحد سمية لي تاهية إفريقية و محلية لي هي "Mobuto Sese Seko Kuku Ngbendu Wa Za Banga" لي كاتعني "موبوتو المجاهد لي غادي يبقا يربح بلاما يحبسو شي واحد".
و فرض حتا تكون لينݣالا هي لي تكون اللغة ديال الغرب دلبلاد و أمر باش تقرا فلمدرسة و يدويو بيها الناس
بسباب الفوضى ليولات فلبلاد و الانتقادات لي كان العالم كيدير عليه، و حتا من الحرب لي كانت ف رواندا، ف 1997 تحالف القوات الديمقراطية على ود تحرير الكونݣو الزايير و لي كان القايد ديالها هوا لورون كابيلا دخلو للعاصمة كينشاصا و حيدو موبوتو من الحكم
هرب موبوتو للطوݣو و من بعد للمغريب فين مات 7 شتنبر 1997 ب لكونصير، و دفنوه ف لمقبرة د لمسيحيين ف الرباط.
ف عام 2007، المجلس التشريعي ديال جمهورية الكونݣو الدمقراطية طلب يرجعو الرفات ديال موبوتو و يدفنوها ف ضريح ف لكونݣو.
- ↑ "Mobutu Sese Seko" (ب الإنجليزية). Archived from the original on 2013-05-13.
{{cite web}}:|archive-date=/|archive-url=timestamp mismatch; 2013-05-08 suggested (معاونة)
