فرييديس بنت إيريك
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
فرييديس بنت إيريك
| ||
| معلومات عامة | ||
| زيادة | ج. 980 إسلاندا | |
| لموت | قيمة مجهولة ڭرينلاند | |
| لجنسية | إسلاندا | |
| لحرفة | كشايفية | |
| لفاميلة | ||
| لواليد | إريك الأحمر | |
| لواليدة | Þjóðhildr Jörundardóttir | |
| خوت | ثورڤالدر إيريكصون، Þórsteinn Eiríksson و لييف إيريكصون | |
فرييديس بنت إيريك (ب لأيسلاندية Freydís Eiríksdóttir، مزيودة ف جوايه 965)[1] كانت مرا أيسلاندية كيتّعتاقد بلي كانت بنت لكشايفي لمعروف إيريك لحمر، لي لعب دور كبير ف لإستكشاف النوردي د أميريكا الشمالية، و كان من لمستوطنين اللولين ديال ڤينلاند. خوها لييف إيريكصون كيتّعتابر لؤروپي اللول لي دار كونطاكط معا السكان لمحليين. أقدم مصادر تاريخية كيهضرو على فرييديس هوما ملحامات ڤينلاند، و لي كينقاسمو ل جوج: ملحامة ڭرينلاند و ملحامة إيريك لحمر. كلا ملحامة كاتعطي قصة مختالفة على شنو طرا، ولايني بجوج كيوصفو فرييديس بلي كانت أقوى ڤاينينڭ مرا ف زمانها.
لملحامة د ڭرينلاند كاتعاود لأحدات بشكل مامدققش على شنو طرا ل النورديين ف ڤينلاند. ف الشاپيطر 8، كانلقاو وصف ل فرييديس ب عتيبارها خت شقيقة ديال لييف إيريكصون و التجربة ديالها:[2]
بعدما نجحو الرحلات لإستكشافية لي قادوهم لييف إيريكصون، ثورڤالدر إيريكصون و ثورفين كارلسيفني، فرييديس بغات تاخد الجاه و لفلوس من رحلة ل ڤينلاند. تّافقات معا جوج إسلانديين خوت، هيلڭي و فينبوڭي، باش يمشيو جميع ل ڤينلاند، و يقسمو لأرباح ديالهم النص ب النص. فرييديس طلبات لإدن من خوها لييف باش تخدّم الديور و السطابلات لي بنى ف ڤينلاند، و خوها وافق. هيلڭي و فينبوڭي وافقو باش يجيبو نفس لعدد ديال الناس و لمعدات بحال فرييديس، ولايني هاد اللخرة هرّبات عدد كبر ديال لخدّاما و خبّاتهم ف لباطو. هيلڭي و فينبوڭي وصلو بكري، و شدو الديور ديال لييف. ملي وصلات فرييديس ڭالت ليهم يخويو حيت الديور ديال خوها. هادا كان أول صدام مابين فريديس و لخوت هيلڭي و فينبوڭي.
ف ڤينلاند، التوتر مابين لڭروپات بجوج تزاد. هيلڭي و فينبوڭي دارو مستوطنة مستاقلة على فرييديس و التابعين ديالها. ف شي وقت مشات فرييديس باش تزورهم، و سولّات فيهم. لخوت ڭالو ليها بلي راهم بيخير، ولايني ماعجبهمش لخلاف لي طرا بيناتهم. لأطراف بجوج تصالحو.
ملي رجعات فرييدس ل عند راجلها، فرييديس كدبات عليه و ڭالت ليه بلي هيلڭي و فينبوڭي ضربوها، و طالباتو باش ينتاقم ليها، و إلا راه غادي تعتابرو خوّاف غادي تطلقو. راجلها جمع لأتباع ديالو، و قتل هيلڭي و فينبوڭي و الرجال لي معاهم ملي كانو ناعسين. فاش رفضو باش يقتلو لعيالات، فرييديس خدات فاس و شرشماتهم تاهوما كاملين. فرييديس، باش تخبّي لخيانة ديالها، هددات أي واحد هضر على لمدباحة.
ملي رجعات فرييدس ل ڭرينلاند بعد عام، ڭالت ل خوها لييف إيريكصون بلي هيلڭي و فينبوڭي قررو يستاقرو ف ڤينلاند. وخا داكشي لإشاعات ديال الدبيحة وصلو ل عند لييف، لي شد تلاتة ف الرجال لي مشاو معاها، و بقى كيعدبهم تا عتارفو ب شنو طرا. وخا ماعجبوش لحال، لييف مابغاش يدير ف ختو داكشي لي كاتستاحق. ولايني تنبأ بلي لأحفاد ديال فرييديس ماغاديش يطفّروه. لملحامة كاتسالي ب لقول بلي من ديك الساع جميع لأحفاد ديالها ولاو كيتشافو ب نضرة ناقصة.
ملحامة إيريك لحمر كاتڭول بلي فرييديس كانت مرا نبيلة و قوية، و بلي كانت خت ماشي شقيقة ديال لييف إيريكصون. نضمّات ل لحملة لي مشات ل ڤينلاند، و قادها ثورفين كارلسيفني، ولايني ماتدكرات فرييديس غير مرة وحدة ف مقطع ملي السكان لمحليين (لهنود لحومر) هجمو على لمخيم ديال أعضاء لحملة د لڤايكينڭ ف الليل. لهنود لحومر كانو مسلّحين ب الجبابد.[3]:29
بزاف ديال النورديين تخلعو حيت ماعمّرهم ما شافو سلاح بحال هادا. ف لوقت لي الرجال كانو كيعلّقو ف وسط لهيلالة و لفوضى، فرييديس، لي كانت حاملة ف شهرها التامن، غوّتات عليهم و ڭالت "علاش هربانين من ڭنوس جراتل بحال هادو، نتوما لي رجال عراض ب كتافكم، و راكو غالبا قادرين تشرشموهم بحال لخرفان؟ عطيوني سلاح، و غادي نورّيكم كيفاش نقدر نتقاتل حسن من أي واحد منكم."[3]:29
ملي تجاهلوها، هزات فرييديس السيف ديال ثورباند صنوريصون، لي كان طاح،[3]:29 و هجمات على لهنود لحومر. ملي ضارو بيها، حيّدات اللبسة ديالها و بقات كاتضرب السيف على السدر ديالها.[3]:29 لهنود لحومر ديك الساع تخلعو و هربو ل لباطوات ديالهم. ثورفين و الناجين لخرين مدحو الزعامة ديالها.[3]:30
فرييديس بانت ف عدد ديال لأعمال لمكتوبة و ديال التلفازة، من أهمها:
- 2022: مسلسل ديال نيتفليكس، "ڤاكينڭس: ڤالهالا"، لعبات الدور ديالها لمومتيلة السويدية فريدا ڭوسطاڤصون.
- ^ Magill، Frank Northen (1997). Great Events from History: 15,000 B.C.-1819 (ب نڭليزية). Salem Press. ص. 19. ردمك 978-0-89356-430-8.
- ^ "The Saga of the Greenlanders". The Sagas of Icelanders: A Selection (ب English). مطرجم من طاراف Kunz، Keneva. London: Penguin. 2001. pp. 648–652.CS1 maint: unrecognized language (link)
- ^ a b c d e J. Sephton (1880). Eirik the Red's Saga: A Translation. Liverpool: D. Marples & Co.