صورا (موضيل تيسكت ل ڤيديو)
صورا
| ||
ڤيديو ديال مرا كاتمشى ف شاريع ف طوكيو، صاوباتها صورا
| ||
| معلومات عامة | ||
| تاريخ د لبدية | 15 فبراير 2024 | |
| شكون طورو | ؤبن إي أي | |
| لستيعمال | توليد لڤيديوات | |
| لموقع رّسمي | https://openai.com/sora | |
صورا (نّݣليزية: Sora) هوّ موضيل ديال تيسكت ل ڤيديو Text-to-video طوراتو شركة ؤپن إي أي ديال الدكا لإصطناعي. يقدر يجينيري ڤيديوات من پرومپت (تيكست مكتوب) لي كيوصف شنو خاص يكون فيها، ؤلا يطوّل ڤيديو ديجا موجود، سوا من لبدية د لڤيديو ل اللور ؤلا من اللخر د لڤيديو ل لقدام.[1][2] تال حدود أبريل 2024، هاد لموضيل باقي ماتّطلق ل عموم الناس.[3]
تاريخ[بدل | بدل لكود]
عدد ديال لموضيلات ديال توليد لڤيديو من التيسكت كانو ديجا موجودين قبل من صورا، بحال مييك أ ڤيديو ديال شركة ميطا (مولات فيسبوك)، دجين 2 ديال رانويي Runway، و لوميير Lumière ديال ڭووڭل، لي باقي تاهوّ ف لفاز د لبحت.[4][4] ؤپن إي أي كانت خرّجات ضال إ 3، لڤيرسيون التالتة ديال ضال إ لي كيجينيري التصاور من پرومپت ب تيكست، غير ف شتنبر 2023.[5]
لفريق لي طوّر صورا سماه على لكلمة الجاپونية لي كاتعني "السما" (جاپونية: 空)، باش تدل على "لپوطونسييل لإبداعي لي ماعندوش حدود".[1] ف 15 فبراير 2024، ؤپن إي أي حطّات لپريڤيو اللول ديال صورا ب حطان ڤيديوات قصيرة ب جودة عالية، بحال وحدة ديال طونوبيلة غادية ف طريق جبلية، أنيميشن ديال "وحش قصير و هشيش"، تصوير تاريخي ديال كاليفورنيا ف وقت السخانة د الدهب، جوج د الناس كيتمشاو ف طوكيو ف التلج، و غيرها، و دكرات بلي صورا تقدر تولّد ڤيديوات تال دقيقة وحدة ف الطول.[4][4] الشركة پارطاجات تقرير تقني لي كيبيّن الطرقان باش تم تدريب لموضيل.[2][6] الرئيس ديال ؤپن إي أي سام ألتمان تاهوّ نشر تويتات لي جاوب فيها على پرومپتات ديال خدايميا ف تويتر ب ڤيديوات صاوباتهوم صورا من دوك لپرومپتات.
ؤپن إي أي علنات بلي معوّلة ترد صورا متاحة ل لعموم، ولاكين ماشي ف وقت قريب، و ماحدداتش فوقاش.[3][4] الشركة عطات لاكصي بشكل محدود ل واحد فرقة حمرا ، لي فيها حرايفيا ديال التضليل و لإنحياز لمعلوماتي، باش يتيستيو لموضيل.[5] الشركة پارطاجات السيستيم تا معا عدد محدود ديال لمبدعين لمحتارفين، منهوم فنانين و ناس كيصاوبو ڤيديوات، باش تاخد فيدباك على النفعية ديالو ف لمجالات لإبداعية.[7]
لقدرات و لحدود[بدل | بدل لكود]
الطيكنولوجيا لي مبازية عليها صورا هي براسها ديال ضال إ 3. على حساب ؤپن إي أي، صورا هيّ محول ديال التشتيت diffusion transformer،[8] بحيت كاتبدا ب ڤيديو فيها "تخربيق" و داك التخربيق كيحيّدو الطرانسفورمر بشوية ف كلا مرحلة تا كاتخرج لڤيديو.
ؤپن إي أي ستعملات ڤيديوات موجودين فابور ف أنتيرنيت، و تا ڤيديوات لي ترخصو ل لغاراض ديال تدريب لموضيل، ولاكين ماحدداتش شحال د لڤيديوات و لمصدر ديالهوم.[1] بعد لإصدار، ؤپن إي أي عتارفات بلي كاينين نواقص ف هاد الطيكنولوجيا، بحال بلي كاتلقى صعوبة باش تسيميلي حالات معقدة د لفيزيك، ؤلا باش تفهم السببية (حاجة لي كاتدي ل حاجة بشكل منطقي)، ؤلا تميّز بين ليمن و ليسر.[9] ؤپن إي أي علنات تا بلي كيما ديجا كينصّو لقواعد د السلامة ديالها، صورا غادي تحد من لإمكانية ديال تخدام پرومپت عندو دلالات جنسية، ؤلا لي كاتدعو ل لعنف ؤلا لكراهية، ؤلا كاتبيّن تصاور ديال ناس مشهورين، ؤلا فيها محتوى عليه كوپيرايت.[5]
على حساب تيم بروكس، باحت من لي طوّرو صورا، لموضيل قدر يكتاشف كيفاش يدير ڤيديوات ب ڭرافيزم د تلاتة د لأبعاد غير من الداطاسيت ديالو، و بيل پيبلز، تاهوّ باحت خدم على نفس السيستيم، ڭال بلي لموضيل صاوب ڤيديوات من بزاف د لقنات بلا مايكون هادشي مدكور ف لپرومپت.[4] لڤيديوات ديال صورا مطاڭيين ب ميطاداطا د التوتيق C2PA باش تبين بلي صاوبها دكا صطيناعي.[1]
عيون لكلام[بدل | بدل لكود]
- ^ a b c d Metz، Cade (February 15, 2024). "OpenAI Unveils A.I. That Instantly Generates Eye-Popping Videos". The New York Times. مأرشيڤي من لأصل ف February 15, 2024. تطّالع عليه ب تاريخ February 15, 2024.
- ^ a b Brooks، Tim؛ Peebles، Bill؛ Holmes، Connor؛ DePue، Will؛ Guo، Yufei؛ Jing، Li؛ Schnurr، David؛ Taylor، Joe؛ Luhman، Troy؛ Luhman، Eric؛ Ng، Clarence Wing Yin؛ Wang، Ricky؛ Ramesh، Aditya (February 15, 2024). "Video generation models as world simulators". OpenAI. مأرشيڤي من لأصل ف February 16, 2024. تطّالع عليه ب تاريخ February 16, 2024.
- ^ a b Yang، Angela (February 15, 2024). "OpenAI teases 'Sora,' its new text-to-video AI model". NBC News. مأرشيڤي من لأصل ف February 15, 2024. تطّالع عليه ب تاريخ February 16, 2024.
- ^ a b c d e f Mauran، Cecily (February 15, 2024). "OpenAI announces Sora, a wild AI text-to-video model. See it in action". Mashable. مأرشيڤي من لأصل ف February 15, 2024. تطّالع عليه ب تاريخ February 16, 2024.
- ^ a b c Lacy، Lisa (February 15, 2024). "Meet Sora, OpenAI's Text-to-Video Generator". CNET. مأرشيڤي من لأصل ف February 16, 2024. تطّالع عليه ب تاريخ February 16, 2024.
- ^ Edwards، Benj (February 16, 2024). "OpenAI collapses media reality with Sora, a photorealistic AI video generator". Ars Technica (ب نڭليزية). مأرشيڤي من لأصل ف February 17, 2024. تطّالع عليه ب تاريخ February 17, 2024.
- ^ Heaven، Will Douglas (February 15, 2024). "OpenAI teases an amazing new generative video model called Sora". MIT Technology Review. مأرشيڤي من لأصل ف February 15, 2024. تطّالع عليه ب تاريخ February 15, 2024.
- ^ Peebles، William؛ Xie، Saining (2023). "Scalable Diffusion Models with Transformers". 2023 IEEE/CVF International Conference on Computer Vision (ICCV). pp. 4172–4182. arXiv:2212.09748. doi:10.1109/ICCV51070.2023.00387. ISSN 2380-7504. ردمك 979-8-3503-0718-4. Unknown parameter
|s2cid=ignored (معاونة) - ^ Pequeño IV، Antonio (February 15, 2024). "OpenAI Reveals 'Sora': AI Video Model Capable Of Realistic Text-To-Video Prompts". Forbes. مأرشيڤي من لأصل ف February 15, 2024. تطّالع عليه ب تاريخ February 15, 2024.