شينطو
شينطو و لا شينطوية (ب جاپونية: 神道)، و لي كتعني بدارجة طريق نتاع الآلهة، هو دين بان ف جاپون و تطور فيها. و ما معروفش فوقاش و كيفاش نتاشرات هاد الديانة ف الجاپون و ما عندهاش شي تعاليم نيشان. هاد ديانة كتأثر بزاف على كيفاش كيعيشو الجاپونيين و التقافة ديالهم.[1]
الشينطو و لبودية هوما أكبر الديانات ف الجاپون، و 80% د الجاپونيين كيمارسو طقوس ديال الشينطو، وخا غير نسبة قليلة لي كيعتابرو راسهوم "شينطوويين". ب لموقابيل 35% د الجاپونيين كيعتابرو راسهوم بوديين.
جات سمية نتاع شينطو من كلمة شينوية قبل منها، و حيتاش لوغة نتاع چابون لوغة كتعتامد على لخط الشينوي و حتى لخط جاپوني ديالهم، يمكن نقراو كلمة نتاع شينطو ب خط جاپوني 神の道 "كامي نو ميتشي" لي كتعني طريق نتاع الآلهة و أول مرة بانت فهاد الكلمة فواحد المخطوطة كترجع ل لقرن 7 السمية ديالها "الخبار نتاع الجاپون" 日本書紀.
مقالة متعمقة: كامي
لكامي 神 هو ساس نتاع الإيمان ديالهم و يمكن نقولو لكامي هو واحد القوة كاينة برا من تأثير نتاع بنادم و كتحكم ف طبيعة و ممكن لكامي يتجسد و يكون على هيئة أي حاجة ف طبيعة بحال شجر و جبال و تراب و لبحر و شمش.[2]
كاينة واحد رواية كتقول بلي منين كانو مونگول بغاو يديرو غزو لچابون عام 1281 جاتهم واحد لعاصفة بحرية غرْقات لأسطول نتاع مونگول و جاپونيين صحاب ليهم بلي لكامي هو لي دار ديك العاصفة باش يحمي جاپون.
غالبا شينطويين كيديرو شي طقوس و مواسم و مهرجانات كيشكرو فيهم لكامي و كتعتبر الأضرحة جاپونية: 神社 جينجا هي البلايص لي كدار فيهم أغلب طقوس نتاع تقديس لكامي.
بقات شينطو دين رسمي ل جاپون حتى لعام 1945 منين خسرات ف لحرب لعالمية جاوجة و كان هادا سبب باش شينطو تفقد البلاصة ديالها ف جاپون حيتاش كان واحد الإعتقاد عند الناس بلي الإمبراطور جاي من كامي و لا عندو نفس الأصل مع الكامي يعني كان كيتّعتابر رب. و لكن منين خسرات جاپون ف حرب كانت هاديك هي نهاية نتاع هاد الإعتقاد و ولات جاپون تحت حكم علماني، يعني بلا دين ديال الدولة.
- ^ "Shinto". مأرشيڤي من لأصل ف 2023-10-13. تطّالع عليه ب تاريخ 2023-08-13.
- ^ جوزيف كالي. Shinto Shrines: A Guide to the sacred sites of Japan's ancient religion (ب نڭليزية).