سانطا كروز دي لا مار پيكينيا
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
سانطا كروز دي لا مار پيكينيا (لي كاتعني حرفيا صّليب لمقدس د لبحر صغير) كانت مستعمرة صبليونية ف لاكوط لجانوبية لغربية د لمغريب، قدام لڭزيرات د لكاناري، تأسسات ف 1478 كا مركز د لبيع ؤ شرا فيه قصبة. كانت كاينة حدا واحد لمرجة (من تما جات سميتها) ما بعيداش بزاف علا راس جوبي.[1]
خدات هاد لمستعمرة لأهمية ديالها من بلاصتها ف لبيع ؤ شرا د لعبيد من صحرا لكبيرة، ؤ ناس لي تشدو كانو كيديوهم يخدمو ف لأراضي د لقصب د سكار ف ڭزيرات د لكاناري.
جراو سعديين ف 1524 علا صبليون من هاد لمنطاقة. مورما تخلاو عليها، لبلاصة ب ضبط د سانطا كروز دي لا مار پيكينيا مابقاتش معروفة، ل درجة ملي سيطرو صبليون ف 1916 علا ساحل د راس جوبي، لي داخل فيه هاد لبلاصة، عطاوه سمية جديدة، پويرطو كانسادو. لبلاصة كاتسما دابا فم أڭوتير ؤهي قريبة من طرفاية.
من جيهة خرة، ف نص د لقرن تسعطاش، ف لوقيتة د تقسيم د إفريقيا، كان عند فرانصا ؤ صبانيا مطالب معاكسة علاود شمال إفريقيا، ؤ ولات صبانيا مهتمة ب لقلعة ديالها لي تالفة ف لعصور لوسطانية. وافقات لمملكة شّريفة باش تعطي تدبير د لبلاصة (لي مامحدداش ب ضبط) ل صبانيا ف تيفاقية واد راس د 1860، لي حلات لحرب صبليونو-مغريبية. مورما جا واحد لوفد صبليوني ل فاس ف 1877، تدارت لجنة مغربية صبليونية مشتاركة باش تحدد لبلاصة د سانطا كروز دي لا مار پيكينيا.[2] هاد لجنة حددات ب لغلط لبلاصة د سانطا كروز دي لا مار پيكينيا ف إفني[2]، لي ف لحقيقة بعيد ب 480 كيلوميطر شمال د لقلعة لأصلية. سّلطان لمغريبي قبل ب هاد تحديد ف 1883، واخا لحدود ماترسماتش ف داك لوقت ؤ كان علا لحتيلال صبليوني لفيعلي يتسنا حتال 1934.[2]
- ^ The Story of Cape Juby (ب نڭليزية). Waterlow & Sons. 1894.
- ^ a b c Torres García، Ana (2016–2017). "La negociación de la retrocesión de Ifni: contribución a su estudio" [The negotiation of the retrocession of Ifni: contribution to its study] (PDF). Norba: Revista de historia (ب صبليونية) (29–30): 183–184. ISSN 0213-375X. مأرشيڤي (PDF) من لأصل ف 2022-07-04. تطّالع عليه ب تاريخ 2022-01-23.