راهوم مصاوبين من لحم

عمل فني ب عنوان "راهوم مصاوبين من لحم"، ديال لفنان أليكساندر س. پيك

راهوم مصاوبين من لحم (ب نّڭليزية They're made out of meat) قصة قصيرة د لخيال لعلمي ألّفها لكاتب لميريكاني تيري بيسون ؤ تنشرات ف مجلة ؤمني ف أبريل 1991. لقصة عيبارة على حوار مابين جوج كائنات فضائية. ف 2005 تدار منها فيلم لي تّعرض ف 2006 ف مهرجان لأفلام ديال متحف لخيال لعلمي ف سياطل ف لميريكان ؤ ربح لجايزة لكبرى.

ف 2010 تدار منها فيلم أخور لي تزادو فيه شخصيات خرة. ؤ تدارت منها تا مسراحية. لقصة تشهرات بزاف ف أنتيرنيت ؤ تناقلوها نّاس، ؤ تطرجمات ل بزاف د لّوغات. ؤ تدكرات تا ف أبحات فلسفية ؤ إدراكية ؤ كوصمولوجية.

لقصة كاملة ب دّاريجة

• "راهوم مصاوبين من لّحم."
• "لحم؟"
• "لحم. راهوم مصاوبين من لّحم."
• "لحم؟"
• "ماكاين شك. خطفنا شحال من واحد من بزاف د لمناطق ف لكوكب، جبناهوم ل لمركبة سّتيكشافية ديالنا، ؤ فحصناهوم مزيان تال لعمق. مافيهوم غير لّحم."
• "مايمكنش. ؤ كيفاش نفسّرو سّينيالات د رّاديو؟ لميساجات لي سيفطو ل نّجوم؟"
• "كايخدّمو لموجات د رّاديو باش يتواصلو، ولاكين سّينيالات ماكيجيوش منهوم. سّينيالات كيجيو من ماكينات."
• "إيوا شكون صاوب لماكينات؟ هوما لي بغينا نكونطاكطيو."
• "راه هوما لي صاوبو لماكينات. ها لّي كانحاول نشرح ليك. لّحم قاد لماكينات."
• "ماتڭولهاش! كي دار لّحم صاوب ماكينات؟ باغي مني نتيّق ف لحم عندو وعي؟"
• "مابغيت منك والو، راني كانعلمك. هاد لكائنات هوما لڭنس لواعي لوحيد ف سّيكتور ؤ مصاوبين من لّحم."
• "يقدرو يكونو بحال لورفولاي. راك عارف، كائنات دكية مصاوبة من لكاربون لي كيدوزو من مرحلة لحمية."
• "لا. راهوم كيتزادو لحم ؤ كيموتو لحم. ضرب لحياة ديالهوم ف شحال من مرة، راه قد هاد لمدة باش درسناهوم، لي كي والو عندنا. واش عندك فكرة قداش كيعيش لّحم؟"
• "مابغيتش نعرف. أوكي، يقدرو يكون غير طرف منهوم لي لحم. راك عارف، بحال لويديلاي. راس د لّحم فوسطو دماغ ديال لپلازما د ليليكطرونات."
• "لا. فكّرنا ف هاد لبلان، حيت نيت عندهوم راس د لّحم بحال لويديلاي. ولاكين كيما ڭلت ليك، راه فحصناهوم. لحم لحم تال لعضم."
• "ماكاينش دماغ؟"
• "كاين دماغ ب طبيعة لحال. مي تا هوّا مصاوب من لّحم!"
• "إيوا... باش كيفكّرو؟"
• "تا ماقشبلتي والو، ها؟ دّماغ لي كيفكّر، لّحم."
• "لحم كيفكّر! باغيني نتيّق ف لحم كيفكّر!"
• "إيّه، لحم كيفكّر! عندو وعي! ؤ كيحب. كيحلم. لّحم هوّا كولشي! واش بانت ليك صّورة دابا؟"
• "أ هيا ناري! راك كاتهضر بصّح. راهوم مصاوبين من لّحم."
• "على سلامتك، إيه. راهوم نيت مصاوبين من لّحم. ؤ هادي شي 100 عام من عوامهوم كيحاولو يتواصلو معانا."
• "إيوا شنو باغي لّحم؟"
• "أول حاجة باغي يهضر معانا. ؤ موراها كانضن باغي يستكشف لكون، يكونطاكطي كائنات واعية خرة، يتبادل لأفكار ؤ لمعلومات. داكشي لي جاري بيه لعامال."
• "ؤ دابا حنا خاصنا نهضرو معا لّحم؟"
• "على ما كيبان. هادا هوّا لميساج لي ڭاعدين كيسيفطو ب موجات رّاديو. 'ألو، كاين شي حد؟ شي حد ف دّار؟' ؤ تويشيات بحال هاكا."
• "إدن كيهضرو نيت. كيستعملو كلمات، أفكار، مفاهيم؟"
• "أه، بيانسور. غير كيديرو هادشي ب لّحم."
• "ياك عاد ڭلتي ليا كيخدّمو رّاديو؟"
• "راه داكشي، ولاكين شنو ف نظرك لي كاين ف موجات رّاديو؟ صّوت د لّحم. راك عارف ملي كاتصرفق لّحم ؤلا كاتضربو معا بعضياتو ؤ كيدير صوت؟ راه لحمهوم كيضربوه معا بعضياتو ؤ كاتخرج هضرة. يقدرو ڭاع يغنّيو ب تخراج لهوا من لحمهوم."
• "أ هيا ناري أ هيا سيدي! لحم كيغني. هادشي بزاف. باش كاتنصح دابا؟"
• "رسمياً ؤلا من تحت طّبلة؟"
• "بجوج"
• "رسمياً، خاصنا نكونطاكطيوهوم، نرحبو بيهوم، ؤ نسجّلو أي كائنات ؤلا عڭدات د لكائنات واعية ف سّيكتور، بلا حڭرة، خوف ؤلا فرزيات. من تحت طّبلة كانصح باش نمسحو أي تسجيلات ؤ نّساو لبلان كامل."
• "داكشي لي كنت كانتمناك تڭول."
• "كاتبان قسوحية د لڭلب، ولاكين كاينين حدود عاوتان. واش زعما نبغيو نتواصلو معا لّحم؟"
• "متافق معاك مية ف لمية. أش غادي نڭولو ليهوم؟ 'سلام لحم، كيداير لاباس؟' ولاكين واش دايزة زعما؟ شحال من كوكب طاري فيه هاد شّان؟"
• "غير واحد صافي. يقدرو يسافرو ل كواكب خرين ف مركبات خاصين كيهزو لّحم، ولاكين مايقدروش يعيشو ف دوك لكواكب. ؤ حيت مصاوبين من لّحم، يقدرو يسافرو غي ف لفضاء تّحتاني. يعني مايقدروش يسافرو سرع من ضّو، ؤ لحتيمال باش يكونطاكطيو شي حد أخور صغير بزاف، صغيكرون ڭاع."
• "ضونك نديرو بحال يلا ماكاين حتا حد ف لكون؟"
• "ڤوالا"
• "قاسحة. ولاكين كيما ڭلتي، شكون غايبغي يتلاقا معا لّحم؟ ؤ دوك لي كانو ف لمركبات ديالنا، دوك لي فحصتوهوم؟ واش متيقن بلي ماغايعقلو على والو؟"
• "كيدّيوهوم ل برشيد يلا هضرو. دخلنا ل ريوسهوم ؤ سرّحنا لحمهوم باش نجيوهوم بحال شي حلم."
• "حلم ديال لّحم! جات هيّا هاديك، وخا ف شي شكل، نكونو حلم ديال لّحم."
• "ؤ نقدرو نسجّلو هاد سّيكتور خاوي."
• "مزيان. متافق معاك رسمياً ؤ ماشي رسمياً. تسدّات لقضية. كاينة شي حاجة خرة؟ شي حد أخور كيتير لهتيمام ف هاد جّهة د لمجرة؟"
• "إيه، واحد دّكاء واعي على شكل نوية عنقودية د لهيدروجين، حشّومي ولاكين ضريّف، ف نجمة من نّوع 9 ف لازون ݣ445. كنا معاه ف كونطاكط هادي جوج دورات ديال لمجرة، ؤ بغا يعاود يجدد تّعارف."
• "ديما كيضربو ضورة ؤ يرجعو."
• "ؤ علاش لّا؟ تخيّل شحال لكون غايكون قاسي ؤ بارد يلا كنا بوحدنا."

مزاود

• لقصة ب نّڭليزية

شوف تا

• سطار وورز