خدايمي:Youszi Nyuszi

هاد لمقال تزاد هنا: أنطونيوس و كليوپاطرا

احداث القصة

بعد من موت ديال يوليوس قيصر لتقتل فجأة، ثلاثة من اهم الحكام ديال الامبراطورية الرومانية اكتاڤيوس، ليبدوس وأنطونيوس شدوا الحكم ديال الإمبراطورية الرومانية. كانت القضية المصرية من اهم القضايا السياسية لكانت كتدور في الامبراطورية، حتى ولاو كيخصوا ليها برامج خاصه في البرامج السياسية. الحكام الثلاث فرقوا المهام بيناتهم باش يصلحوا من الامبراطورية ويرجعوا المجد ديالهم. هنا انطونيوس خدا القسم ديال الشرق باش يحسن من الظروف ويقوي الجيش العسكري ديالو.

مصر فداك الوقت كانت من اهم البلدان فداك البلاصا واحتفظت بالاستقلال الأسمى, داكشي علاش كان انطونيوس كان باغي يستدعي كليوباترا ومشي غير هادشي، كان باغي يستجوبها على الاشاعات لكانت كتدور على ان كليوباترا كانت تعاون الناس لقتلوا قيصر ومعاونتش الامبراطورية والجنود لكانوا كيتحاربوا مع قيصر.

منين سمعات كليوباترا الدعوة، بغات تمشي تشوف انطونيوس حيث سمعات عليه بزاف دلحوايج زوينة وانه من أحسن الحكام في العالم وان اغلبيه الحكام لآخرين كيتجاراو باش ياخدوا الرضا ديالوا. كليوباترا جمعات كاع الذهب لعندها والجاه والهدايا ومشات باش تشوف انطونيوس وتردوا لجهتها وتحقق المبتغى ديالها.

مشات كليوباترا لعند انطونيوس، هو عرض عليها للعشا باش يتناقشوا في الامور، ولكن كليوباترا قالت بانه هو لخاص يجي للطبلة ديالها وقالت بأنه حسن إذا هو قبل الدعوة ديالها. الطبلة لكانت موجده كليوباترا، كلشي هدر عليها كاع الماعن كانوا من الذهب الخالص والجوهر والثوب من الحرير، كلشي انبهر من هاد المائدة.
كليوباترا اصرت انهم يجيوا الغد ليه عاود تاني وداكشي لحطات فالنهار الثاني كان أحسن بزاف من النهار الاول، انطوني حتى هو بغي يعرض عليها ويبهرها بشي عشا، ولكن العشا ديالوا مكان والوا قدام ديالها حتى هو براسوا اعترف بيها. فهاد العشوات سولها انطونيوس علاش ماصيفطاتش العون والمساعدة لجنود ديال الامبراطورية باش تساعد في الانتقام، وهي جاوبت انها رسلات سفن باش تعاون، ولكن شداتهم العاصفة والريح وتهرسوا وغرقوا.
كليوباترا توالمت مع انطونيوس وخلاتوا ديما يجي من جهتها، انطونيوس وقع في الحب ديال كليوباترا من الجمال والذكاء ديالها ومشي عندها الاسكندرية باش يبقا معاها .

هنا منين كان انطونيوس مشغول مع الحبيبة ديالوا كليوباترا في مصر، الفارسيين هجموا على الرومان من كاع جوايه وربحوهم. من ضمن الناس لخلا انطونيوس بوحدهم مراتوا ڤلڤيا وخوه لوكيوس انطونيوس . الرومان لاموه انه خلا الواجبات لي عليه في الامبراطورية ومشي يعيش الحب في الاسكندرية.

هنا انطونيوس كان خاصوا يرجع بحالوا باش يقدر يحل المشاكل لواقعه تما. هنا جا الخبر ديال موت مرات انطونيوس ڤلڤيا، منين كليوباترا سمعات الخبر فرحت بزاف ولكن متماتش الفرحة ديالها منين سمعت ان انطونيوس عاود تزوج.

انطونيوس كان مشغول مع مراتوا الجديدة والمهام ديالوا باش يجري على الفارسيين في المدن الرومانية وممشاش يشوف كليوباترا لمده سنين. انطونيوس ربح الحرب ونجح انه يجري على الفارسيين من البلاد. رجع انطونيوس للشرق للمنطقة لكان حاكمها، ولكن كان خاصوا الفلوس باش يعاود يبني البلاد.

كاع البلدان كانوا مفلسين من غير مصر لكانت معروفة بالغني والفلوس لعندها. هنا انطونيوس دعا كليوباترا باش يتلاقى معاها, كليوباترا مشات تتلاقا انطونيوس واعتذر انه خلاها لمده طويله وقاليها ان زواج من مراتوا كان غير للسياسة. كليوباترا مفكرتش بزاف وتصالحت معاه .

انطونيوس عطاها بلاد تكون تحت التصرف ديالها وهي خلات كاع الثروات ديال مصر تكون تحت التصرف ديالوا باش يحقق المشروع ديالوا.

انطونيوس رجع مع كليوباترا وتزوجوا وكان عندهم دراري وتطلق مع مراتوا . هدشي ليدار انطونيوس نتج عليه قطع العلاقات ديالوا مع الامبراطورية الرومانية، اكتاڤيوس كان معصب بزاف من هادشي لدار انطونيوس وكان عارف ان هادشي لدار غينتج عن حرب ما بينوا وبين الامبراطورية الرومانية .

داكشي باش كان باغي يقوي الصورة ديالوا في الشرق ويكون عندوا جيش مزيان باش يقدر يحارب بالمساعدة ديال كليوباترا بالجيش ديالها والكنوز لكتمتلك. كانت كليوباترا كتثق فيه وكتشوف فيه أحسن محارب وانه يقدر يربح الحرب ضد اكتاڤيوس العدو ديالهم بجوج .

ناضت الحرب ما بين انطونيوس وكليوباترا مع اكتاڤيوس والنتيجة ديال الحرب كانت الخسارة ديال انطونيوس وكليوباترا قدامه. منين شافوا راسهم خسروا قرروا يهربوا من مكان الحرب .

انطونيوس حس بإحساس خايب بزاف بانه خسر الحرب وخسر معاها السمعة ديالوا وحتى الجيوش لمشاو مع اكتاڤيوس ولا وحيد. كليوباترا بغات تدير جلسات مع اكتاڤيوس باش تصلح معاه وتضمن الدولة لولادها، ولكن اكتاڤيوس مبغاش يقبل بالتعاون معاها. هنا كليوباترا بعثات رسالة على انها انتحرت حيتاش كانت خايفة من الانتقام ديال اكتاڤيوس ولكن هادشي مكانش بالصح .

منين انطونيوس قرا الرسالة ولا حزين وقرر الانتحار حتى هو . كليوباترا كان كيسحاب ليها بهاد العمل غادي ترضى اكتاڤيوس ولكن كانت خاطئة، حيث ولات بحال خدامه وأسيره عندوا, هنا كليوباترا قررت تنتحر حتى هي.

اكتاڤيوس كان فرحان حيت بقت ليه الامبراطورية الرومانية وحتى مصر بكل النفوذ والجاه والجيش ديالها. نفذ اكتاڤيوس الوصية ديال انطونيوس ولكانت انهم يدفنوا انطوني وكليوباترا حدا بعضياتهم .

عن كليوبترا

اهم صفه فكليوباترا هي الشغف، عندها الشغف فأي حاجة فحياتها وبحده كبيره، فالحب، فالكره، فالغيرة، كلشي مكتخضع لتواحد، لتقانون، لتمؤسسة . من خلال المسرحية كتبين ان عندها إعجاب كبير للكاريزما والشجاعة ديال انطونيوس، وصفها الكاتب بأن عندها جمال وقوة جذب كبيره بزاف حتى خلات أكبر شخصية في الامبراطورية الرومانية اخضع ليها ويكون بين يديها. الجاذبية ديال كليوباترا مكتكملش في العمر والجمال الشخصي ديالها، ولا حتى في الفلوس. الجمال ديالها كيكمن في الشخصية ديالها والكيان ديالها ككل، لتقدر تحرق أي واحد وقف قدامها وتجرأ يشوف فيها. الهدف ديال كليوباترا كان أنها تفصل انطونيوس عن الامبراطورية الرومانية بما فيها مرتو بغات تفرق الامبراطورية على المشرق وبغات انطونيوس يبقي معاها في مصر، بغاتوا يقطع علاقتو بالإمبراطورية كدولة، وحتى كعائله .

عن اكتاڤيوس

هو راجل بارد، المشكل العويص ديالو هو انطونيوس لكيفوتوا فأي ميزة من غير حاجه واحده اللي هي الارادة والعقل لتحقيق المصير العالمي للإمبراطورية الرومانية هاد الهدف عند اكتاڤيوس هو الهدف الأسمى أي حاجه قداموا كتولي ثانية، على هاد السبب قدر يضحي حتى بختوا لكيبغيها بزاف، رغمها ان تزوج بأنطونيوس باش يضمن السياسة ديالو، وخا عارف ان هاد الزواج مغيكونش سعيد، ولكن هو كضحي بأي حاجه عندو إذا استدعت الضرورة غير باش يوصل لداكشي لبغا وليهوا يوحد الشعوب والاوطان تحت امبراطورية واحده من خلال هدشي كتيبين لينا أن اكتاڤيوس هو العكس ديال انطونيوس .

انطونيوس كيعتبر من أحسن المحاربين وربح بزاف ديال الحروب، وهو أيضاً من الحكماء الثلاث، ولكن لكينقص انطونيوس في الاعتقاد ديال اكتاڤيوس هو انو معندوش هدف واضح اي حاجه كيديرها هي بهدف الاستمتاع. وخا عندو القدرة انو يصبر فأصعب الحروب طاح دغيا فالحب ديال كليوباترا.

عن انطونيوس

كان معروف انه من أحسن المحاربين في الامبراطورية الرومانية، ولكن حب ملكة من بلاد أخرى. وانه بغي يحارب بلاد الام على ود ملكة اجنبية، خلا الشعب الروماني يكرهه ويحس انه تخلي عنهم. متخلاش غير على الشعب وحده، ولكن حتى عن مراتوا لكانت ديما فجنبوا وكتصلح ما بينوا وبين خوها اكتاڤيوس.

عن ليبيدس

ليبيدس عند دور السلام في المسرحية وخا السلام ميقدرش يكون ما بين اكتاڤيوس وانطونيوس حيتاش بزوج بيهم عندهم مبادئ مختلفة. واحد بغي الامبراطورية توسع والاخر تابع الحياة والغرامية ديالوا وخا تكون على حساب ديال البلد الام. ليبيدس كان رجل مزيان وبريئ ولكن وسط المشاكل ديال الحكام لمعاه ملقي ميدير ومعرفش يحل المشكل، هو ضد الفكرة انطونيوس انه خان البلاد ديالوا وفرج فيهم البلدان الأخرى .