جوزي ساراماݣو
جوزي ساراماݣو (ب لبرتغالية: José Saramago)، خلاق ف 16 نونبر 1922 و توفا ف 18 جوان 2010[1]، كاتب و أديب برطقيزي دّا جايزة نوبل د لأداب ف 1988. كايتعتابر من أهم لأدباء د لقرن لعشرين و من أشهر لأعمال ديالو "العمى" (1995) و "انقطاعات الموت" (2005) و "قابيل" (2009).
ساراماݣو قدر يفرض راسو ك أديب إنساني و موتقّاف فاعل ف لحياة سّياسية ف بلادو و ف لعالم، تميز ب لفهم لخاصّ ديالو ل تّاريخ و لأخلاق و تّقافة و ب لبصمة لجمالية لخاصة ديالو ف لكتابة لّي كا تثور على أشكال لكتابة تّقليدية ف لأدب.
جوزي ساراماݣو خلاق ف آزينياݣا ف لبرطقيز و تحولات لعائيلة ديالو لواحد لمدة باش يعيشو ف لارجونتين قبل ما يرجعو يعيشو ف ليشبونة.
أول رواية ديالو نشرها ف 1947، و كانت سميتها "أرض الذنب" و كانت لقات تشجيع من عند نّقاد، واخا هاكاك ساراماݣو ما نشر تا رواية من بعد منها ل مدة 20 عام، حيت خدم ف صّحافة و ب سباب لعضوية ديالو ف لحزب شّيوعي لبرطقيزي ما كانتش ظروف لبرتغال مزيانة من ناحية حرية النشر و صّحافة تحت لحكم دّيكتاتوري ديال سالازار.
شارك ساراماݣو ف ثورة لقرنفل لّي ردّات دّيموقراطية ل لبرتغال ف 1974.
كان أول أديب برتغالي كايفوز ب جايزة نوبل ف 1988 و تمنحات لي دّوكتورا لفخرية من عند بزّاف د لجامعات لمرموقة ف لعالم (طورينوّ، إشبيلية، مانشستر، كاستيا لامانشا، برازيليا).
ف 1992، تحدفات رّواية ديالو "لإنجيل على حساب ليسوع لمسيح" من لّيستا د رّوايات لّي مرشحين ف واحد لجائزة أدبية حكومية بسباب لمحتوى ديالها لّي عتابروه كايسيء ل دّين.[2]
ساراماݣو دوز لعوام لخّرة د حياتو ف لجزيرة د لانثاروطي (ف جزر لكناري) مع رّفيقة ديالو پيلار ديل روبيو.[3]
- ^ "José Saramago". مأرشيڤي من لأصل ف 2023-08-10. تطّالع عليه ب تاريخ 2020-08-19.
- ^ "افضل روايات جوزيه ساراماغو". مأرشيڤي من لأصل ف 2022-07-01. تطّالع عليه ب تاريخ 2020-08-19.
- ^ "José Saramago BIOGRAFÍA". مأرشيڤي من لأصل ف 2023-06-09. تطّالع عليه ب تاريخ 2020-08-19.
|
تقدر تزيد شوف بزاف د تّصاور و لمعلومات ديال José Saramago ف ويكيميديا كومنز. |