تقويسة

الحيلة اللولة ديال البني لي سميّتها العتبة.

التقويسة هي من الحيلات اللولانين لي قدر بيهوم بنادم يحل باب فالحيط ولّ يهز الضّالة، الغرض من هاد الحيلة هو أن الثقل ديال الضّالة ما يكونش هابط كولّو التحت إنّما يتفرّق على الجناب. قبل من الحيلة ديال التقويسة كان بنادم تايهز الضّالة ب العتبة، المشكل تاع العتبة هو أنه ماندقروش نديرو حلّة فالباب ولّ تيساع ما بين الحيوط يكون واسع بزاف لأنه يمكن تاتعوّج ولّ وتاتهرّس العتبة.

المصريين القدام ( يامات الفراعنة) كانو تايخلطو هاد الحيلات بجوج (العتبة و التقويسة) باش يهزّو الضّالة، و كانو تايزوقو العتبة بالرسوم لي كانو تايكتبو بيها ديك الساع. من بعدهوم الإغريقيين و الرومانيين بداو تايخدمو بزاف بهاد الحيلات، ومن بعدهوم المغاربة (لي جاو فالغرب : إفريقيا د الشمال و سپانيا) زادو نوّعو فالتقويسات و الزواق.

السّاس ديال البني بالتقاوس

ياجورة فوق ياجورة.

التقويسة ديال الدروج

التقويسة القديمة المعروفة هي تقويسة د الدروج بالياجور، هاد التقويسة تايسميوها لاليمان قوس الحجر الطالع (Kragsteinbogen) و تايسميوها النݣالزة قوس الغراب ( و تايسميوها المالطيين الحْنية تالقشرة ولّ تالكليّب ( ħnejja tal-qoxra ).

الحيلة لي مبنية بيها التقويسة د الدروج هي يكونو الياجور مبنيين طالعين كي الدروج، ويكونو دروج مقابلين، وكل ياجورة تاتكون خارجة على ختها بشوية، و فالقمقومة ديال التقويسة تايتلاقاو الدروج المقابلين فياجورة مشروكة.

بعض المرات تانسميو هاد التقويسة "بالپوخت أ فّاو" لي هي بالفرانساوية (Porte à faux)، و المشكل ديال هاد القوس هو أنه ما تايحوّلش مزيان الثقل لي هابط التحت لجيهة الجناب، والقوس لي غادي يحوّل مزيان الثقل ويفرّقو شوية لجيهة الجناب هي التقويسة ديال الناقوس.

صحاب الستاتيك ولّ المساوية تايشرحو التقويسة د الدروج هاكا:

باش يكون القوس شاد خص يكون طرف من الياجورة خارج لبرّا و طرف آخر داخل و معفوس، الطرف المعفوس خص يكون مثقّل باش ما تاتقلبش الياجورة، والطّول ديال الطرف لي خارج لبرّا خص يكون صغر من الطرف المعفوس. وآخر حاجة هي أنه خص الياجورة تكون قادرة تهز الثقل بلا ماتهرّس، يعني البغلي (المادّة) مناش مصاوبة يقدر يصبر على واحد القدر تاع اللّوي لي تايوقع ليها بسباب الثقل، و هاد الجنان ديال التخمام فالتهراس ديال البغلي تايتسمّى الصبر د البغلي بالفرانساوية La résistance des matériaux (RDM).

مسيد الشمش تاع كونارك.

يمكن نلقاو هاد التقويسة فشلاّ بلايص، بحال الديور القدام "فاخفيخكونصونبل" فمدينة هان لّي فألمانيا، و بحال مسيد الشمش تاع كونارك لّي فالهند، و بحال مملكة الشامپا لّي فالڤييطنام.

التقويسة ديال الناقوس

تانسميوها التقويسة الرومانية ولّ التقويسة د الناقوس، هي التقويسة لي تاتكون بالياجور، البيطون ولّ السيمة، و تاتكون دايما مهزوزة فوق جوج ساريات ولّ جوج صمعات. الرومانين كانو معروفين بهاد التقويسة وكانو تايبنيو بيها واحد القوس تايسميوه قوس الغليب، كانو تايبنيوه الرومانين باش يدخلو منّو القيّاد الكبار ديال الجيش.

كاين قوس الغليب فالمغرب، فمدينة وليلي، سميتو قوس كاركالاّ، بناوه الوليليين في خاطر القيصر كاركالاّ، فالجناب ديال هاد القوس، فالصمعات لي هازين القوس كاين جوج تقويسات على شكل تقويسات الدروج. القوس الروماني هوا قوس تايكون داير نص ضورة لاسقة، والثقل ديالو مهزوز على جوج ساريات ولّ صمعات، والياجورة الوسطانية تاتكون فنص الحبل (فنص القطر) لي شاد مابين الساريات.

قوس كاركالاّ فوليلي.

المشكل ديال تقويسة الناقوس هو أنها ما تقدرش تهز الضّالة بوحدها إنّما خصّ الحيط يكون عامر و غليض باش يعاون التقويسة فالهزّان. كانو الرومانيين تيصاوبو البيبان و القبّات بهاد التقويسة، يمكن نلقاو فالمغرب واحد القبّة ديال الحمّام مصاوبة بهاد التقويسة فمدينة أغمات لي كاينة تحت جبال أوكايمدن (جبل توبقال).

هاد التقويسة الرومانية فيها ربعة الشكال :

كاين القوس لي مصاوب بياجورات قد قد، و كاين القوس لي مصاوب بياجورات مجبدين، و كاين القوس لي مصاوب بياجورات خارجين، و كاين القوس لي مصاوب بياجورات دايرين بحال السنان.

التقويسة ديال الكتف

الڤيزيݣوط يعني الݣوطيّين د الغرب هوما واحد القوم أصلهوم من لاليمان، و حكمو فرانسا د الجنوب، الصبليون و الشمال ديال إفريقيا (المغرب، الجزاير، تونس و ليبيا). هاد الڤيزيݣوط نوّعو فالبني و تّعرفو بواحد القوس سميّتو عند الصنايعية المغاربة "قوس كثف" وسميّتو عند الصنايعية الصبليون و الفرانسيس "القوس المهرّس" Arc brisé.

هاد القوس تايهزّ الضّالة و بيه يمكن يكون بزاف ديال الخوى فالحيط حيثاش هو لي تايكالي على الخوى، بهاد الحيلة باش قدرو "الݣوطيّين د الغرب" أنهم يدخّلو بزاف ديال الشّعى الكنيسات و الكاتيدرالات الكبار. قبل كان بالقوس الروماني بزّز يكون الحيط عامر، و داكشي علاش الكنيسات بالقوس الروماني تايكوني مضلّمين حيثاش الحيط تايحبس الشّعى يدخل. يعني بهاد القوس قدرو الݣوطيين يبنيو قواس كبار و عاليين و فنفس الوقت يدخلو الشعى البني.

باب السدّة لي فالدخلة تاع مدينة الزهراء لي فقرطبة.

التقويسة ديال النعل

فاللخر د الحكام تاع الݣوطيين د الغرب فجنوب فرانسا و الصبليون، بداو الݣوطيين د الغرب تايبنيو بواحد القوس سميّتو قوس نعل الخيل ولّ القوس المعيّق بالفرانساوية (arc outrepassé)، هاد القوس تايكون داير نص ضورة و شوية. هاد القوس تّشهر بزاف يّامات الحْكام ديال الأموين فقرطبة، تايكون مصاوب من الحجر و الياجور متناوبين، و مهزوز بجوج ساريات، وضاير بيه واحد المربع سميتو الحيّز.

التقويسة ديال كتف و درج

يامات مْلوك الطّايفات، خصوصا فالطّايفة ديال سارقوسطة، غادي يبنيو البنّاية واحد القوس سميتو قوس كثف و درج، حيثاش الشكل ديالو مصاوب بحال قوس الكثف ديال الݣوطيين و فيه درجة لي تاتكون مابين القوس و السارية لي هازّة القوس.

من هاد القوس غادي يخرّجو البنّاية لي فالطّايفة ديال سارقوسطة واحد القوس جامع مابين قوس الكثف الݣوطي و قوس النعل الاموي. هاد القوس هو القوس لي مشهور بيه المغرب ف 2021.

عيون لكلام

تقدر تزيد شوف بزاف د تّصاور و لمعلومات ديال Corbelled vaults ف ويكيميديا كومنز.