الراشيدية

الراشيدية
‫الرشيدية‬ (ar) ⵉⵎⵜⵖⵔⵏ (tzm)
لبلاصة
لبلاد	لمغريب
لإقليم	إقليم الراشيدية
السكان
شحال دالسكان	97,687 (2024)
شحال دلفاميلات	22,944 (2024)
لجغرافيا
لعلو	1,009 م
خط الطول بـ °	-4.4333
خط لعرض بـ °	31.9333
معلومات خرين
كود د لبوصطة	52000
الرمز لجغرافي	7280528
لخريطة

الراشدية (شحال هادي كانت مسمين عليها قصر السوق، وبـ لأمازيغية: ⵉⵎⵜⵖⵔⵏ - إمتغرن) هي مدينة مغريبية وجماعة ترابية حضرية، وهي العاصمة الإدارية ديال جهة درعة تافيلالت وإقليم الراشدية. هاد لمدينة جات ف لجنوب الشرقي ديال لمغريب، وهي الباب لكبير لي كيدخّل لـ الصحرا ولمناطق د الواحات. الراشدية مدينة معروفة عندها بكاج ثقافي وتاريخي كبير، وهازا الدقة ف لقتيصاد والسياسة ديال لجنوب الشرقي كامل. على حساب لإحصاء لعام 2024، وصل عدد سكان لمدينة لـ 97,687 واحد بسباب التوسع د البني والمشاريع لي عرفاتها.

التطور دالسكان والفاميلات

هاد الجدول كيبين المقارنة ديال التطور ف شحال دالسكان وشحال د الفاميلات ديال الراشدية بين الإحصاء ديال 2014 والإحصاء اللخر ديال 2024، الى عتمدنا على المنصة الرسمية ديال المندوبية السامية للتخطيط:

العام ديال الإحصاء	شحال دالسكان	شحال دالفاميلات
2014	92,374	19,475
2024	97,687	22,944

لأصل ديال السمية

لمدينة دازو عليها جوج ديال السميات ف التاريخ ديالها لجديد:

• قصر السوق: هادي هي السمية القديمة لي كانت معروفة بيها قبل الاستقلال وبقات شادة حتى لعام 1976 تسمات هكا حيت لمدينة كانت ف اللول غير قصور مجموعين (ديور مبنية بالطوب والتراب) وكان فيها سوق كبير كيتجمعو فيه القوافل د التجارة والقبائل د المنطقة باش إبيعو او إشريو فالتمر، الزرع، والملحة او حويج خرى.
• الراشدية: ف عام 1976، لملك الراحل الحسن الثاني بدّل السمية ديال لمدينة من قصر السوق لـ الراشدية باش يكرم ولدو الصغير، الأمير مولاي رشيد. من ديك الوقيتة والمدينة هازا هاد السمية
• إمتغرن: هادي هي السمية الأمازيغية اللولة لي كيسميو بيها السكان لمدينة والواحات لي دايرة بيها، وكتعني البلاصة لي كيتجمعو ويستاقرو فيها الناس.

التاريخ ديال المدينة

التاريخ ديال الراشدية مربوط بزاف بـ منطقة تافيلالت الكبيرة، لي كتعتابر لصل ديال الدولة العلوية (قريبة من لمدينة الأثرية د سجلماسة).

• قبل الاستعمار: المنطقة كانت هذا زمان غير واحات وقصور مفرقة كيسكنوها قبايل أمازيغية وعربية، بحال اجماعة ديال أيت عطا، أيت مرغاد، وأيت يزدڭ. هاد القبايل كانو كينظمو حياتهم بـ "أزرف" (القانون العرفي) ونظام "أڭدال" لي كيحافظو بيه على حقهم من الارض والما.
• وقت الحماية: ف عام 1916، دخلو لفرنساويين للمنطقة وبناو قشلة عسكرية كبيرة ف قصر السوق باش يحضيو القوافل ويتحكمو ف الطريق د الجبال ديال لأطلس لكبير. خططو لمدينة بـ شوارع مسرحة ومقاطعات د العسكر، لي باقي الأثر ديالها حتل لدبا ف حي المنصور الذهبي. لمدينة عاشت مقاومة واعرة من عند القبايل لي حاربو الاستعمار ف الجبال لي حداهم.
• مورا الاستقلال: لمدينة كبرات بزاف، وولات مركز إداري وعسكري ثقيل ف لجنوب. وف 2015، ملي تدار التقسيم ديال الجهات الجديد، الراشدية طلعات باش تولي عاصمة ديال جهة درعة تافيلالت، وهادشي جاب ليها استثمارات وبروجيات كبار ف البنية التحتية.

البلاصة او لجو ديال المدينة

الراشدية جات ف واحد البلاصة استراتيجية او قسحة ف نفس الوقت:

• الموقع: لمدينة مبنية تحت الجبال لأطلس لكبير الشرقي، ومحطوطة على الجناب ديال واد زيز لي كيشق دوك الجبال الناشفة وكيصاوب واحة خضراء طويلة غادية لآلاف الهكتارات.
• واد زيز وسد الحسن الداخل: واد زيز هو العروق د لمدينة. وباش الدولة تتحكم ف الحملة د الواد وتوفر الما للفلاحة، بناو سد الحسن الداخل ف عام 1971 (كيهز حتى لـ 312 مليون متر مكعب د الما). هاد السد دار واحد الضاية اصطناعية كبيرة زادت عطات منظر واعر للمدينة وولات بلاصة فين كيفوجو العائلات.
• الجو: الجو ف الراشدية شبه صحراوي وقاري. ف الصيف كيكون الصهد بزاف وناشف (الحرارة كتقدر تفوت 42 درجة ف يوليوز وغشت)، وف الشتا كيكون السميقلي والبرد قاصح (الحرارة كتهبط لتحت الصفر ف الليل). الشتا كطيح قليلة ومكتفوتش 130 ملم ف العام، هادشي علاش المنطقة معولة 100% على الما د السد والعيون.

لقتيصاد ديال المدينة

لقتيصاد د الراشدية واقف على قطاعات كتكمل بعضياتها:

1. لإدارة ؤلخدمات: حيت الراشدية هي عاصمة الجهة، لقطاع العام (المديريات الجهوية، السبيطارات، الجامعة، والعسكر) مخدم نسبة كبيرة د الناس، وكيحرك السوق المحلي من خلال التجارة والخدمات لي عندها علاقة بيه.
2. لفلاحة ؤتعاونيات: الفلاحة هي الروح ديال واحة زيز. لمدينة والنواحي مشهورين عندهم المخير ديال التمر ف لعالم خصوصا المجهول و بوفڭوس. فهاد لوقيتة المنطقة فيها لحركة كبيرة د التعاونيات الفلاحية لي شادينها شباب وعيلات د لبلاد، وكيخدمو باش يطورو الغلة د المنطقة (التمر، الزيتون، واللوز) ويبيعوها ف المعارض داخل وخارج لمغريب.
3. سياحة: واخا الراشدية ماشي بلاصة سياحية ديريكت بحال مرزوڭة، مي راها مدينة لكيدوزو أولا المحطة اللولة للسياح لي كينزلو ف المطار وغاديين يكتشفو الرملة والواحات د لجنوب.

البنية التحتية والمركوب

الراشدية عندها شبكة كتربطها مع مدن لمغريب كاملين:

• مطار مولاي علي الشريف: مطار دولي كيسهل الدخلة لجهة درعة تافيلالت، وفيه طيارات ديريكت لـ الدار البيضاء وشي عواصم ف أوروبا
• شبكة الطرق: كيدوزو من لمدينة طرقان وطنية مهمة بحال الطريق 13 بين مكناس او الجنوب الشرقي, والطريق 10 لي كدي لـ تنغير ووارزازات.
• الصحة: فيها السبيطار الجهوي مولاي علي الشريف لي هاز التقل ديال الأقاليم بخمسة د الجهة

الناس، التعليم والثقافة

الناس ف الراشدية كيكولو الله إعمرها دار او مضياف، وفيه تخليطة زوينة ديال الناس لي كتهضر بـ تاشلحيت والدارجة المغربية.

• التعليم العالي: الراشدية هي القطب الجامعي د لجنوب الشرقي وتابعة لـ جامعة مولاي إسماعيل. فيها الكلية المتعددة التخصصات, و كلية دالعلوم والتقنيات لي كيتخرجو منها مهندسين وتقنيين واعرين ف لنفورمتك، البيئة، والطاقة النقيّة.
• الثقافة والفنون: لمدينة عامرة بالتراث القديم، بحال فن البلدي وفن الملحون السجلماسي، لي كيبينو شحال الناس لاصقين ف أرضهم وواحتهم. وكتنظم لمدينة معارض وكتحضر بقوة ف المهرجان الدولي ديال التمر ف أرفود.

بلايص معروفين فالمدينة

• سد الحسن الداخل: بلاصة للسياحة البيئية والناس لي كيعجبهم إصيدو الحوت او إخيمو.
• عين العاطي: واحد العين سخونة قريبة لمدينة، كيخرج منها الما التحتاني بواحد الجهد كبير، وكيجيو ليها السياح وولاد لبلاد باش يداواو ويرتاحو.
• القصور القديمة: بحال قصر مسكي وقصر المدغرة لي كيبينو البني الطيني لمغربي.

مصادر

ويكيميديا كومنز عندا تصاور و معلومات على الراشيدية.

هادي زريعة ديال مقالة خاصها تّوسع. تقدر تشارك ف لكتبة ديالها.