التستيفة د الضّو

من ويكيپيديا
اذهب إلى التنقل اذهب إلى البحث
الحجرة د بغداد.

الحجرة د الضّو ولّ التستيفة تاع ڤولطة هي أوّل حجرة تاتعطي الضّو، صاوبها أليساندرو ڤولطة لي تزاد عام 1745 فمدينة كومو فإقليم لومباردِيّا. قبل من التستيفة تاع ڤولطة، البقشاشة د القديم (الباحثين فالأركيولوجي) جبرو واحد الݣولّة د الضّو [1] فبغداد لي كانو تايشلّلو بيها الماعن بالذهب ولّ النقرة. إنّما البقشاشة د القديم باقي ما متأكدينش واش هاد الݣولّة نيت بالصّح كانو تايشلّلو بيها الماعن، واش نيت نقدرو نخرجو بيها بزّاف تاع الفرتيت د الضّو باش نشللو بيه الماعن.[2]

المخاصمة[بدل | بدل لكود]

قبل من المخاصمة لي وقعات مابين ڤولطة و غالڤاني، كانو الناس متيّقين أنه كاين جوج نواع د الضّو، الضّو د البهايم و الضّو د المعدن. الضّو د البهايم هو الضّو لي تايصاوبوه البهايم بالكسدة تاعتهوم، و الضّو د المعدن هو الضّو لي تانصاوبوه بالتّقراب ولّ بالحكّان ديال جوج صفيحات تاع المعدن.

الضّو د المعدن

فديك الوقت كان يمكن نصاوبو الضّو بواحد القرعة سميّتها قرعة لايد ولّ بماكينة سميّتها ماكينة ويمزهورست. بقرعة لايد يمكن تصاوب الضّو بالتقراب ديال جوج صفيحات، هاد الحيلة هي السّاس ديال الكونداساتور. و بماكينة ويمزهورست يمكن تصاوب الضّو بالحكّان ديال واحد الصفيحة، هاد الحيلة هي السّاس ديال لاندوي د الموتور.

هاد الحيلة ديال التقراب و الحكّان تايعرفوها مزيان الصغار، كان الصغير تيشد الستيلو و تايحكو مع التريكو ولّ السروال، و من بعد تايقرّب الستيلو لطريّف صغير ديال الورقة، غي تايكون قريب بزّاف من هاد الطريّف د الورقة (بلا ما يقيسو) تايبان بلّي الطريّف د الورقة تايتجرّ لعند الستيلو.

الضّو د البهايم

الدوزان ديال غالڤاني باش يجبر "الضّو د البهايم" زعما.

من يّامات الإغريق و الناس تايخمّمو فالتّحراك ديال العضالات، كان يتسحاب ليهوم أن المخ هو لي تايسيفط العضالات سايل بحال ليدام ولّ البلول وبيه تاينفخ العضالة.[3] بقاو البقشاشة (الباحثين) تايقلبو على كيفاش تاتحرّك العضالة، و مع الوقت بداو تايفهمو حسن هاد التّحراك ديال العضالة. مثلا، البقشاشة فالشيمي جبرو أنه باش تحرّك العضالة خصّها تاكل الأوكسيجين و تخرّج أوكسيد الكاربون المضوبل، و البقشاشة فالضّو جبرو أنه القرعة د لايد تاتقدر تحرّك العضالة.

غالڤاني كان من البقشاشة ف السليخ، و كان تايسلخ الجرانات و تايشوف آش تايوقع الفخض تاع الجرانة فاش تانلاقيوها مع القرعة د لايد، وجبر أن الضّو تاع القرعة د لايد تايحرّك الفخض تاع الجرانة. واحد النهار، غالڤاني جبر أن العضالة د الفخض تاع الجرانة لي معلّقة فالبالكون تاتحرّك بّوحدها بلا القرعة د لايد. من تمّا قال أن الضّو راه جاي من العضالة د الفخض وخّا الجرانة ماشي حيّة، وسمّا داك الضّو : الضّو د البهايم.

التّستيفة ديال ڤولطة[بدل | بدل لكود]

غالڤاني تايجرّب ديما بسلك تايلاقي بيه العصبة مع العضالة.

فاللوّل ڤولطة كان شاك فهاد الضّو د البهايم، مشى جرّب حتاهوا وسلخ الجرانات و كان تايجرّب حثّى على البهايم الميتين و الحيّين. واحد اللوقيتة تيّق أنه الضّو د البهايم كاين، خصوصا نهار جبر أنه الفخض تاع الجرانة تايتحرّك ملّي تايلاقى العصبة مع العضالة بسلك, وبما أنه السلك ما فيه ضو، يعني الضّو كاين فالفخض.

غي هوا ڤولطة زاد نوّع فالتّجراب، وجبر أنه ماشي لابد تلاقي العصبة مع العضالة باش يتحرّك الفخض، إنّما وخّا تلاقي العصبة مع العصبة ولّ العضالة مع العضالة راه الفخض غادي يتحرّك. وزاد جبر أنه السلك لي شاد فالقنت اللوّل ديال العضالة خص يكون من معدن مغاير على المعدن د السلك لي شاد فالقنت الثاني ديال العضالة.

فاللخّر قال ڤولطة أنه الضّو د البهايم ماكاينش، والضّو لي تايحرّك الفخض جاي من السلوكة المغايرين، لأنه لابد كلّ سلك يكون من معدن مغاير على الاخر وإلاّ مايتحرّكش الفخض. و الغلط لي دار ڤولطة هو أنه يتسحاب ليه العضالة و العصبة ماشي مهمّين، و البقشاشة فالشيمي لي جاو من موراه جبرو لاش لايقة العضالة و العصبة فالتصاويب ديال الضّو.

الرّاية ولّ حنش الما الرعّاد لي تايضرب بالضّو.

غالڤاني ماسكتش، مشى تايجرّب على حوتة الرّاية ولّ حنش الما الرعّاد لي تايضرب بالضّو، [4] مشى غالڤاني سلخ الرّاية و فرتك العضالات باش الرّاية تاتصاوب الضّو، و لقى أنها تاتصاوب الضّو بالعصبات وشي عضلات مستّفين فلاكي فلاكي، وبيّن أنّ ڤولطة غلط، وبيّن بالرّاية أنه لابد من العصبة و العضالة باش يتصاوب الضّو.

ڤولطة ماسكتش، مشى صاوب الضّو بنفس الحيلة باش الرّاية تاتصاوب الضّو، إنّما بدّل العضلات و العصبة بالمعدن، و بيّن أن التستيفة ديال المعدن المغاير هي السّر ديال تصاويب الضّو فالراية براسها.


الضّو د المعدن و الشيمي

فولطة هو لّي عاق أنه بالشيمي نقدرو نخرّجو الضّو، و باش يبيّن هاد القاضية، صاوب واحد التستيفة تاع صفايح د المعدن و صفايح د التوب فاسݣ لي سمّاهوم الپيل لي تاتعني بالاثينية [5] "السارية ولّ العمود" وبالفرانساوية "التستيفة".

الحيلة باش صاوب ڤولطة الحجرة ولّ السارية لي تاتخرّج الضّو.

فولطة قطّع النحاس فلاكي فلاكي بحال الشكل ديال الرّاية لي تاتضرب بالضّو، و قطّع الزّنݣ فلاكي فلاكي، و قطّع الثوب فلاكي فلاكي وفسݣو بالخل. حطّ صفيحة ديال الزّنݣ و فوق منها طرف ديال الثوب فازݣ وفوق منّو صفيحة ديال النحاس، و عاود هاد الشكل بزاف ديال المرات حثى وصل شي ميترو ونص.[6]

فعام 1801 حضر ناپوليون بوناپاخت الدلالة (التقديم) ديال الحجرة فالمعهد تاع فرانسا، و فسّر ڤولطة فالدلالة كيفاش صاوب الحجرة و كيفاش قدر يرتّب المعادن من الزنݣ لي ما تايخرّجش الضّو بزاف حثّى النقرة لي تاتخرّجش الضّو بزاف.

باش يمكن نصاوبو حجرة د الضّو فالدار مع الصغار، يمكن نصاوبو تستيفة فيها ببياسات د الفلوس و صفيحات د الألمونيوم و طريفات د الكارطون. بعشرة د الصفيحات يمكن نخرّجو ربعة ڤولط[7]، و الناس تافقو على واحد العبرة باش تايعبرو القدر ديال الضّو وسمّاوه الڤولط.

نواع الحجر ديال الضّو[بدل | بدل لكود]

كاين ربعة د النواع تاع الحجر [8] لي مشهورين :

  • الحجرة لي مصاوبة من الفاخر و الزنݣ : حجرة رخيصة و تاتعطي شوي ديال الضّو؛ مزيان نخدّمو بيها الماطيريال لي ماتياكولش بزّاف ديال الضّو، بحال التيليكومونض ولّ الماݣانة.
  • الحجرة لي مصاوبة من ملح الرماد : حجرة لي من ملح الرماد، هي حجرة تاتصبر إنّما تاتسيح دغياك، خصوصا إل زادينا فنفس الماطيريال جوج حجرات ماعامرينش بنفس القدر ديال الضّو؛ تانخدمو بيها اللعب ديال الصغار، البّبيلة د الجيب.
  • الحجرة لي مصاوبة من اللّيتيوم : تاتشد العمارة مزيان و ماتاينقص الڤولطاج فيها، ما يمكنش تعاود تعمر، و تاتفرݣع إل حطيناها فالعمّار ديال الضّو (الشارجور)؛ تانخدمو بيها المصوّرة،الفلاش.
  • الحجرة لي مصاوبة من النيكل : غالية إنما يمكن تعاود تعمر شي خمس ميات مرة؛ تانخدمو بيها فݣاع الماطريال ديال الضّو .


غالڤاني تايجرّب ديما بسلك تايلاقي بيه العصبة مع العضالة.


إل تقادات الحجرة ما خصهاش تلاح فالزبل العادي إنّما خصّها ترجع البيّاع ديال الماطيريال تاع الضّو باش تّعاود وتولّي حجرة د الضّو عاوتاني.

عيون الكلام[بدل | بدل لكود]

  1. "الݣولّة د الضّو" (بالدارجة المغربية).CS1 maint: unrecognized language (link)
  2. "االݣولّة لي ف بغداد" (بالفرانساوية).CS1 maint: unrecognized language (link)
  3. "التّحراك ديال العضالات" (بالفرانساوية).CS1 maint: unrecognized language (link)
  4. "حوتة الرّاية لي تاتضرب بالضّو" (بالفرانساوية).CS1 maint: unrecognized language (link)
  5. "الحجرة" (بالفرانساوية).CS1 maint: unrecognized language (link)
  6. "الضّو بالشيمي" (بالفرانساوية).CS1 maint: unrecognized language (link)
  7. "صاوب حجرة فالدار" (بالفرانساوية).CS1 maint: unrecognized language (link)
  8. "نواع الحجر" (بالفرانساوية).CS1 maint: unrecognized language (link)