قصبة أݣادير أوفلا
قصبة أݣادير أوفلا
| ||
معلومات عامة | ||
نوع | القصبة، قلعة و تراث | |
لبلاد | لمغريب | |
لموضع | أڭادير | |
تاريخ د لبني | 1540 | |
تصنيف تراتي | تراث التأثير البرتغالي و ترات تقافي ديال لمغريب |
قصبة أݣادير أوفلا هي معلمة تاريخية كاينة ف مدينة أݣادير كانت فيها المدينة القديمة. و هي لأصل والبداية ديال مدينة أݣادير، جزء كبير منها تخرب بسبب الزلزال ديال 1960 لي ضرب لمدينة، و بعد الترميم ديالها، تأتّرات تا ب زلزال لحوز 2023.
سميتها[بدل | بدل لكود]
سمية قصبة أݣادير المحلية هي أݣادير أوفلا. كلمة "أݣادير" كاتعني بالأمازيغية "حصن" و"أوفلا" كاتعني "الفوق". هذا علاش التسمية كاتشير للحصن الموجود فوق الجبل.
تاريخ[بدل | بدل لكود]
تأسسات قصبة أݣادير أوفلا عام 1540 على يد السلطان محمد الشيخ السعدي بغرض التحكم ف ضرب البرتغاليين اللي إستقروا تحت الجبل عام 1470 فاش كانو تايقلبو عن طريق للهند، بناو فالساحل قرب عين فونتي حصن، و بناو على سفح الجبل برج آخر باش يحضيوه، الشيئ لي دفع السعديين يبنيو قصبة على قمة نفس الجبل.
كيفاش تبنات القصبة[بدل | بدل لكود]
تبنات القصبة بشكل أساسي لأسباب عسكرية باش تحمي لمدينة و المرسة ديالها من الهجومات الأجنبية لمحتاملة.
- 1505: لقبطان لبرطقيزي جواو لوپيز دي سيكويرا حطّ الأحجار اللولة ل لبني ديال القلعة الصغيرة باش يحمي مصدر الما لحلو.[1]
- 1511: هجمات قبايل سوس لهجوم اللول على لبرتغاليين لي ستاقرو ف أݣادير.
- 1513: شرا ملك البرتغال مانويل اللول هاد الحصن الصغير و سماه سانطاكروز دي كيپ دي جير ("سانتا كروز دو كابو دي أجوير").
- 1536: علن السلطان القائم بأمر الله السعدي الحرب على الغزاة تال نهار ستولى ولدو محمد الشيخ المهدي أخيرا على المدينة.
- 1540: رجع محمد الشيخ هو الحاكم، و بنا القصبة و دور عليها الابراج باش تحصنها، و خصص بين 40 و 50 موكحلة للدفاع على المدينة.
حيت القصبة تبنات فوق قمة نفس السفح ديال الجبل، مكناتهم يلقاو موقع ستراتيجي ل قصف البنايات البرتغالية بالمدفعية عام 1541 و تحرير مدينة أݣادير لمعروفة ب سانطاكروز من الإحتلال البرتغالي. تقلصات أهمية الحصن بعد ما جراو على البرتغاليين تال نهار عاود بناه عبد الله الغالب بالله.
تأثير الزلازل[بدل | بدل لكود]
تدمرت القصبة لمرة اللولة ف 1755 بسبب زلزال لشبونة. و المرة الثانية ف زلزال أݣادير 1960.
القصبة قبل ما تتدمر[بدل | بدل لكود]
بلاصتها[بدل | بدل لكود]
كاينة القصبة ف قمة الجبل ف علو ديال 236 مترً تقريبا فوق مستوى سطح البحر ف الجهة الشمالية ديال مدينة أݣادير حدا الميناء ديال دابا.
شنو فيها[بدل | بدل لكود]
عاون الموقع الستراتيجي د لقصبة على قصف الأحياء دالبرتغال بالمدافع، عام 1541م تحرر الحصن البرتغالي لي سميتو "سانطاكروز" وبالتالي نقصات الأهمية ديال الحصن تا لنهار عاود بناه الغالب بالله السعدي. و كان هاد الحصن قبل الزلزال كايتكون من:
- سور ديال برا مزود ب لأبراج و عندو باب مصمم بشكل ملوي بغرض الدفاع
- جامع كبير
- سبيطار
- البنكة والبوسطة
- ديور و زناقي و ساحات صغار
- لملاح، و هو حي خاص بليهود
- أضرحة بحال ضريح سيدي بوجمعة أݣناو الخاص بطائفة ݣناوة وضريح لالة يامنة
القصبة اليوم[بدل | بدل لكود]
لكسايد[بدل | بدل لكود]
عام 2019، قرر المخزن ديال أݣادير يسد قصبة أݣادير أوفلا على الطوموبيلات و لماطر، حيت المنطقة عرفات بزاف د لكسايد الخطيرة فالرومپوان لي تايدي لقصبة أݣادير أوفلا. و خلا غير الطوبيسات والطاكسيات لي عندهم الحق يدخلو ليها.
إصلاح القصبة[بدل | بدل لكود]
مشروع إصلاح قصبة أݣادير أوفلا هو مشروع نطالق عام 2020، وتايهدف باش يصلح و يأهل السوار دالقصبة و يزوقها من الداخل، و يحيد أي حاجة مصايبة بالسيمة، و يوفرو خدمات كثر، و يصلحو الأضرحة و يصايبو واحد التمثال، و يعْلمو الطرقان، لي فالقصبة و لي كاتجيب ليها، عاد باش غايديرو مشاريع سياحية بحال لقهاوي و البيرو ديال الإرشاد السياحي، و البازارات، و لمتاحف، و لباركينڭات و غيرها. هاد المشروع هو جزء من برنامج التنمية الحضرية د أݣادير 2020 - 2024 اللي عطى لإنطلاقة ديالو الملك محمد السادس.
معرض ديال التصاور[بدل | بدل لكود]
-
أݣادير أوفلا عام 1905
-
الطريق ديال القصبة و لمرسا ديال أݣادير
-
منظر من القصبة تايطل على كورنيش بلاج أݣادير
-
السور ديال القصبة من برا
-
السور ديال القصبة من الداخل
-
السوار ديال القصبة ف الليل
-
منظر د مدينة أݣادير من القصبة ف الليل
تقدر تزيد شوف بزاف د تّصاور و لمعلومات ديال Kasbah of Agadir Oufella ف ويكيميديا كومنز. |