أبراهام الصباغ
أبراهام الصباغ
| ||
| ||
| معلومات عامة | ||
| زيادة | يونيو 1943 فاس | |
| لموت | 27 فبراير 2023 (79 عام) فاس | |
| لجنسية | لمغريب | |
| لحرفة | رباني، معلّيم و عدول | |
| لّوغات لي كيعرف | لعبرية، داريجة يهودية و لفرانساوية | |
أبراهام "ألبير" الصباغ (مزيود ف يونيو 1943 ف فاس، توفّى ف 27 فبراير 2023 ف نفس لمدينة) كان راجل دين يهودي مغريبي و لحاخام ديال مدينة فاس.[1]
وخا هاجرو ولادو الربعة كاملين ل إسرائيل و فرانسا، أبراهام الصباغ بقى متشبت ب لمغريب و ب مدينة فاس ب لخصوص.
حياتو[بدل | بدل لكود]
الصباغ تزاد ف النواول ف فاس و عاش فيها أغلب حياتو. بّاه يهودا الصباغ لي كان حجّام و مّو إستير "ستيرة" أصراف تاهوما كانو تزادو ف فاس، ولاكين عائلة بّاه أصلها من وزان، و عائلة مّو أصلها صحراوي من الريصاني.[2]
بدا الصباغ قرايتو ف صغرو ف إما بانيم (مسيد يهودي) لي دازو منها جميع ليهود د فاس، و موراها ف لمدارسة ديال لإتحاد لإسرائيلي لعالمي ف فاس. على 13 عام، مشى يقرا ف لمدراسة الدينية التوراتية (يشيڤا) ف طانجا. ملي تسدات لمدراسة، مشى ل كازا باش يخدم أستاد. بعد عام رجع ل فاس باش يخدم أستاد و عدول و موتق د ليهود، بحال ف توتيق لوراق د الجواج، و الطلاق، و لوصيات، و لوراق د لمعاملات د لبيع و الشرا و لأعمال لمدنية، كيما معمول بيه ف لمغريب. تتلمد على يد أكبر لعولاما د الدين ليهود ف فاس، و كان لوحيد لي بقى ف لمدينة لي كان عندو ترخيص ب الدبح الشرعي (شحيطاه) على حساب الشريعة ليهودية. كان عندو إلمام كبير ب التاريخ د ليهود ف فاس، و كانو ليهود لي باقيين ف لمدينة كيستاشروه ف بزاف د ليمور الصغار منهوم و لكبار.
وخا كان مقرر باش يتّدفن ف الروضة د لملاح د فاس، لعائلة ديالو لي كانت هاجرات ل إسرائيل قررو باش يدفنوه حداهوم تماك.[3]
مزاود[بدل | بدل لكود]
- بان ف وتائقي حراس الداكرة
- حوار ديالو معا ميد راديو و جولة على لميعارة د ليهود ف فاس
- حوار معا i24NEWS
- حوار ديالو معا JewishNewsOne
عيون لكلام[بدل | بدل لكود]
- ^ "وفاة أبراهام الصباغ حاخام مدينة فاس". 2023-02-27. مأرشيڤي من لأصل ف 2023-07-08. تطّالع عليه ب تاريخ 2023-07-08.
- ^ "في ناس الملاح.. أبراهام الصباغ يعود بالذاكرة لفترات مهمة من تاريخ اليهود المغاربة". 2021-06-19. مأرشيڤي من لأصل ف 2023-07-09. تطّالع عليه ب تاريخ 2023-07-08.
- ^ "خاص. حاخام فاس أبراهام الصباغ مغاديش يتدفن فالمغرب.. ولدو إيريك لـ"كود": بغينا ندفنوه حدا الوالدة". 2023-02-27. مأرشيڤي من لأصل ف 2023-07-09. تطّالع عليه ب تاريخ 2023-07-08.
 هادي زريعة ديال مقالة علا موضوع عندو علاقة ب شخصيات د لمغريب خاصها تّوسع. تقدر تشارك ف لكتبة ديالها. |