زيمبومباح

خطاطة كاتبيّن كيفاش كايتفاعلو لعناصر ب تلاتة د زّيمبومباح

زيمبومباح ؤلا زبح ؤلا زينبومباح ؤلا زديمبومباح ؤلا زدينبونباح (ب لعربية: ورقة-حجر-مقص) هي واحد لعبة كتلعب ب ليدّين، غالبا كايلعبوها جوج د الناس بيناتهوم، اللي بجوجهوم (ولّا شحال مّا كانو) كايديرو فدقّة وحدة شي فورمة من تلاتة د الفورمات ب يدّيهوم. هاد الفورمات هوما "حجرة" (علا شكل بّونية)، "ورقة" (علا شكل يد مسرّحة) ولّا "مقص" (بحالا داير بيدّك رقم جوج)، غير هوما كادّيرهوم ؤ يدّك ناعسة، ماشي واقفة ولّا مهزوزة ف السما. هي واحد اللعبة ديال دقة وحدة، ؤ د المجموع زيرو، اللي فيها غير جوج نتائج: يا إما تعادل، ولّا واحد كايربح و لاخر كايخسر.

إيلا شي واحد فيهوم عزل يدير "حجرة" كايغلب لاخر إلا عزل يدير "مقص" (كانݣولو "الحجرة هرّسات المقص")، ولّا كايخسر إلا لاخر عزل يدير "ورقة" (كانݣولو "الورقة غطّات الحجرة")؛ ؤ إيلا شي واحد عزل يدير "ورقة" كايخسر إيلا لاخر عزل يدير "مقص" (كانݣولو "المقص قطّع الورقة"). ؤ إيلا بجوجهوم عزلو نفس الحاجة كايكونو تعادلو، ؤ غالبا ديك سّاعة كايعاودو يلعبو عاوتاني حتا كايربح شيواحد.

بحال التاج ولّا راس، ولّا ضريب العود، كايلعبو الناس الزيمبومباح غالبا إيلا ماتّافقوش علا شي حاجة ؤ اللي ربح كايختار. ولّا بعض المرّات كايلعبوها بّوحدها ؤ صافي. الزيمبومباح ماشي بحال الطرق د العزيل الزهراوية لخرا، حيت تقدر تقلّع ؤ تعيق ب شنو غايدير اللي ضدك من التصرّفات ديالو.

زديمبومباح

سّمية

هاد لكلمة ف دّاريجة غالبا مركبة من ݣزم (بمعنى قطّع) + بون (من بونية) + ؤ باح (بمعنى والو، لخوا).

اللعب

لفورمات د ليدّين ديال زّيمبومباح، ف ليسر: حجرة (ولّا بير)، لوسط: ورقة، ليمن مقص.

اللي لاعبين قبل ما كايديرو ب يدّيهوم الفورمة اللي ختارو، يا إما كايحسبو واحد جوج تلاتة ب الجّهد ولّا كايݣولو سّمية د اللعبة (زيمبومباح، ولّا الزبح)، باش يورّيو ف دقّة يدّيهوم. بعض المرّات كايلعبوها ب السكات إيلا كانو متأكّدين غايورّيو يدّهوم ف دقّة. ملّي كايبغيو يورّيو يدّيهوم (ب الفورمة لّي عزلو)، كايسيفطوها جيهت هاداك اللي لاعب ضدّهوم، ديك الساعة بجوج كايشوفو ف دقّة شنو عزل لاخر، ؤ كايعرفو النتيجة.

تاريخ

لاصل

أوّل بلاصة تدكر فيها الزيمبومباح كان الكتاب ووزازو ديال الكاتب سيي تجاوتجي اللي كان ف الوقيتة ديال سلالة مينݣ، اللي كتب بلّي هاد اللعبة من الوقيتة د سلالة هان. ف هاد الكتاب اللعبة كان سميتها شوشيلينݣ (手勢令).

موشي-كين، أقدم لعبة جاپونية د سانسوكومي-كين. ف ليسر ببّوشة (ناميكوجي)، لوسط جرانة (كاوازو) ؤ ف ليمن حنش (هيبي).

مدكور بزّاف د المرّات ف التاريخ د الجاپون سانسوكومي-كين (三すくみ拳)، زعما اللُعاب د كين (بّونية)، سانسوكومي (تّلاتة اللي خايفين من بعضيّاتهوم). هاد النوع د اللعاب كانو بانو ف الشينوا ؤ من بعد خداوهوم الجاپون ؤ ولّاو شعبيين عندهوم.

أقدم لعبة جاپونية د سانسوكومي-كين كانت معروفة ب موشي-كين (虫拳)، كانو جابوها من الشينوا. ف هاد موشي-كين "الجرانة" (ب الصبع الكبير) كاتغلب "الببّوشة" (ب الصبع الصغير)، اللي كاتغلب "الحنش" (ب الصبع ديال التسبيح)، اللي كايغلب "الجرانة". واخا هاد اللعبة جايّة من الشينوا، الحيوانات اللي ف الڤيرسيون الجاپونية مبدّلين علا الحيوانات الدوريجين.

أشهر لعبة د سانسوكومي-كين ف الجاپون كانت هي كيتسوني-كين (狐拳)، ف هاد اللعبة، واحد التّعلب خارق سميتو كيتسوني (狐) كايغلب شيخ الدوار، شيخ الدوار (庄屋) كايغلب الصياد، ؤ الصياد (猟師) كايغلب التعلب. هاد كيتسوني-كين باش مبدلة علا الزيمبومباح ولّا موشي-كين، الفورمات ديالها كايدّارو بجوج يدّين ماشي غير وحدة.

اليوم، أكتر سانسوكومي-كين معروف هو جان-كين (じゃんけん)، اللي جاي من شّينوا ف القرن 17، جان-كين فيها حجرة، ورقة، مقص. ؤ هي اللي جايّة منّها الزيمبومباح اللي كاينة ف العالم دابا.

سطراتيجيات

مايمكنش تعيق بشي واحد إيلا كان كايلوح يدّو غي عالله، ولكن تقدر تقلّع الفورمة اللي غايعزل إلا العزلة ديالو ماكانتش غير زهراوية، ديك الساعة تقدر تّاخد عليه أڤونطاج، أصلا، بنادم كايميل ل أنّو مايلوحش يدّو غير ب زّهر.

ف التورنوّات، شي لعّابا كايديرو شي حوايج باش يتلّفو ولّا يقولبو لّي ضدّهوم، بحال متلا يݣولو السمية د شي فورمة ب الغوات ؤ يديرو بيدّيهوم فورمة وحداخا ؤ لاخر كايتلف.

الفورمة د "الحجرة"، معا هي غير بّونية - اللي غالبا اللعّابا ملّي كايكونو كايحسبو باش يعزلو شي فورمة كايكونو جامعين يدّهوم علا شكل بّونية - إلا بغيتي تقلّع واش هاداك اللي ضدّك غادي يعزل "الحجرة" خصّك ب الزربة ملّي تكونو كاتلوحو يدّيكوم، شوف واش كايحرك صباعو باش يبدّل الفورمة ديال يدّو، إلا ما تحركوش راه غالبا غايلعب ب "الحجرة"، حيت "الورقة" ؤ "المقص" بجوجهوم كايخص تبدّل الفورمة د يدّك باش دّيرهوم. غير هو يقدر يبغي يقولبك ؤ يخلّي يدّو مجموعة حتا لـ آخر لحضة ممكنة.

عيون لكلام

تقدر تزيد شوف بزاف د تّصاور و لمعلومات ديال Rock Paper Scissors ف ويكيميديا كومنز.