پيپا پيݣPeppa Pig ولا پيپا Peppa، مسلسل د التلفازة بريطاني ديال رّوسوم داروه نيڤيل آستلي و مارك بيكير و نتجاتو شركة إنترتينمنت وان. لإنتاج ديالو بدا ف 2004 و بقا 6 د لمواسم تال 2011.
ف لمجموع فيه 420 حلقة كل وحدة فيها ما بين 10 د دّقايق و ربع ساعة.
لمسلسل كايدور على واحد لعائلة د لحلالف عندهوم بنيتة "پيپا" و ووليد، خوها الصغير "جورج" ف عالم بسيط و ملون بزاف شخصيات ديالو كاملين حيوانات. هاد رّوسوم موجه ل لوليدات صّغار باش يتعلمو لهضرة و لكلمات و كيفاش يتعاملو مع ناس، و ب دّات ف صّواب و كيفاش يتعاونو بيناتهوم. لحوار و لكلام د لمسلسل فيه لمعاودة ب زّايد ديال لهضرة باش يستافدو تا لوليدات لّي عندهوم موشكيل باش يتعلمو.[1][2]
پيپا پيݣ: شّخصية لّولة د لمسلسل و هي بنيتة حليليفة، عندها 4 سنين، عزيز عليها ضّحك و تقشاب و أعز حاجة عندها هي تنقز ف لݣلاتي د لغيس. عندها نونوس صغير ديالها سميتو تيدي. پيپا عزيز عليها خوها صّغير و كاتعاونو باش يفهم لحياة و كاتعلمو بزاف ديال لحوايج و تّويشيات ديال لّعب.
جورج پيݣ: خو پيپا صّغير، عندو عاماين، و ديما هاز معاه لّعبة لمفضلة ديالو، واحد دّيناصور مسميه "السي الديناصور". كايبكي بزاف و عندو واحد لبكية دايرة بحال شي خصّة ديال الدموع، كابكي فاش كايخاف من شي حاجة ولا فاش كاتشد فيه ختو و كاتبرزطو.
ماما پيݣ: هي لأم ديال پيپا و جورج و كاتخدم من دّار ف لپيسي ديالها و كاتخدم تا متطوعة ف لبومبية ديال لمدينة فين عايشين.
بابا پيݣ: باين پيپا و جورج لّي كايخدم مهندس معماري.
