وارزازات

وارزازات
‫ورزازات‬ (ar) ⵡⴰⵔⵣⴰⵣⴰⵜ (tzm) وارزازات (ary) Ouarzazate (fr)
لبلاصة
لبلاد	لمغريب
لإقليم	إقليم وارزازات
السكان
شحال دالسكان	79,218 (2024)
شحال دلفاميلات	18,297 (2024)
لجغرافيا
لعلو	1,151 م
خط الطول بـ °	-6.91795349
خط لعرض بـ °	30.92461065
معلومات خرين
توقيت ديال لمدينة	ڭريتينش
كود د لبوصطة	45000
السيت الرسمي	commune-ouarzazate.ma
الرمز لجغرافي	2540850
لخريطة

ورزازات (بـ الأمازيغية: ⵡⴰⵔⵣⴰⵣⴰⵜ) هي مدينة مغريبية وجماعة ترابية حضرية، وهي لعاصمة ديال إقليم وارزازات فـ جهة درعة تافيلالت. هاد لمدينة مشهورة فالعالم بسميت باب الصحرا و"هوليوود إفريقيا" حيتاش كتعتابر صونتر لول ديال السينيما ف لمغريب و ف إفريقيا. لمدينة جات ف موقع استراتيجي فين كيتلاقاو الوديان ديال "دادس" و"مڭون" لي ديرين لينا واد درعة. على حساب لإحصاء لعام 2024، وصل لعدد ديال سكان د لمدينة لـ 79,218 واحد بفضل التواسع د البني والرواج الاقتصادي لي عرفاتها لمدينة ف السنين اللخرة.

شحال ديال السكان والفاميلات

هاد الجدول كيبين لفرق ديال التطور ف عدد السكان وعدد الفاميلات ديال ورزازات بين الإحصاء ديال 2014 والإحصاء اللخر ديال 2024، الى عتمدنا على المنصة الرسمية ديال المندوبية السامية للتخطيط:

العام ديال الإحصاء	شحال هما السكان	شحال هما الفاميلات
2014	71,067	15,475
2024	79,218	18,297

لأصل ديال السمية

سمية "ورزازات" جاية من لغة تاشلحيت، وهي مركبة من جوج كلمات أمازيغية: "وار" لي كتعني بلا و"زازات" لي كتعني صداع. هاد السمية كتوصف لينا الطبيعة الهادية ديال المنطقة والسكينة لي كيحس بيها الواحد ملي كيدخل ليها. هاد الهدوء هو لي خلى بزاف ديال الفنانين والمنتجين والباحثين يختاروها كبلاصة ديال للإبداع والعمل بعاد على زحام لمدن الكبار.

قصة شحال هادي ديال لمدينة

وارزازات عندها تاريخ ضارب ف الڨدم كمنطقة استراتيجية ومحطة أساسية ديال التبادل التجارية:

• طريق القوافل: ف لقرون لوسطى، كانت ورزازات هي لباب والشرجم لي كتدوز منو القوافل د التجارة لي جاية من مراكش وغادية لـ تافيلالت أو هابطة لـ تمبوكتو ف مالي. هاد الموقع خلى المنطقة تكون بلاصة او مسرح باش اتبادلو الثقافات اوالسلعة.
• لعهد د الحماية والتأسيس الجديد: ف لقرون اللخرة، او بالظبط ف عام 1928، لفرنساويين ردو لمدينة كمركز عسكري وإداري حيت كانت نقطة مراقبة واعرة على لجنوب الشرقي.
• فاميلات لڭلاوي وقصبة تاوريرت: لمدينة شدا بزاف بالتاريخ ديال عائلة لڭلاوي، وبالخصوص "التهامي لڭلاوي" لي بنا فيها قصبة تاوريرت. هاد القصبة كتعتابر تحفة كيفتخرو بها صحاب المدينة او غيرهم, ومبنية بـ لطوب ولخشب ديال النخل والعرعار, وهادشي كيعطيها منظر زوين كيتناسب مع المناخ الصحراوي، وهي مصنفة ضمن التراث العالمي ديال ليونيسكو.

هوليوود إفريقيا: دار السينما د العالم

منظر لاستوديوهات السينما ف ورزازات، لي كتجذب كبار المخرجين ف لعالم

ورزازات هي بلاطو طبيعي مفتوح للعالم بفضل التنوع ديال المناظر ديالها. لمدينة فيها ستوديوهات عالمية كبيرة بحال "استوديوهات أطلس" لي كيتعتابر أكبر ستوديو سينمائي طبيعي ف لعالم. بزاف ديال لأفلام المشهورة او الواعرة تصورات ف ورزازات، بحال:

• لورنس العرب (1962).
• ڭلاديتور (2000).
• السلسلة الشهيرة ڭيم أوف ثرونز (Game of Thrones).

هاد النشاط السينمائي هو لموطور ديال لقتيصاد المحلي، حيت كيوفر لآلاف ديال الخدامي للناس ديال لمدينة، من تقنيين، بناء الديكور، وحتى الكومبارس.

لقتيصاد ولبيئة: محطة ديال نور

محطة نور ورزازات، لي كتعتابر أكبر مركب للطاقة الشمسية ف لعالم

ف السنين اللخرة، ورزازات ولات مدينة ديال المستقبل بسباب مشروع محطة نور ورزازات للطاقة الشمسية، وهي وحدة من أكبر لمحطات ف لعالم. هاد المشروع حط ورزازات ف الخريطة العالمية ديال الطاقة لكتعود وساهم ف التنمية التكنولوجية ديال الجهة كاملة،او بسبابو بانو خدامي جداد بحال ف مجال الهندسة والتقنيات العالية.

الجو والحالة د البيئة

الجو ف ورزازات صحراوي قاصح؛ الصيف كيكون سخون بزاف والشتا كيكون بارد وجاف. لمدينة جات ف لعلو كيوصل لـ 1151 متر، وهادشي كيخلي الجو ديالها نقي هوا هذاك ف الليل. الجغرافيا ديالها متنوعة بزاف، فيها جبال لأطلس لكبير ف الشمال وجبل صاغرو ف لجنوب، وكيدوزو فيها وديان لي كيعطيو واحات خضراء كتبرد الصهد ديال لمدينة.

التعليم والناس لي قاريين

على حساب لإحصائيات ديال المندوبية السامية للتخطيط:

• لمدينة فيها مراكز تعليمية وجامعية مهمة بحال "الكلية متعددة التخصصات" و"المعهد المتخصص ف مهن السينما"، لي كيجمع طلبة من كاع أنحاء لمغريب باش يقراو ف مجالات السياحة والسينما.
• نسبة د ناس لّي قاريين فوق الليسي فواحد ارتفاع مستمر (وصلات لـ 26,5% ف 2014)، وهادشي كيبين التطور الثقافي لي كتعيشو لمدينة.

لقتيصاد والرواج التجاري

• الرواج الاقتصادي كين ف السياحة الثقافية، الصناعة السينمائية، والخدمات لمرتبطة بمشاريع الطاقة المتجددة.
• سوق ورزازات كيتعتابر من أروج الأسواق ف الجهة، فين كيتلاقاو التجار ديال لجنوب الشرقي باش إبيعو او إشريو السلعة والصناعي التقليدية بحال الزرابي والفضة او حويج خرى.

مصادر

ويكيميديا كومنز عندا تصاور و معلومات على وارزازات.

هادي زريعة ديال مقالة خاصها تّوسع. تقدر تشارك ف لكتبة ديالها.