معضلة ديال لحباسا

المعضلة ديال الحبَّاس (نّݣليزية: Prisoner's dilemma) لي صاوبها ألبيرت و. تاكر ف 1950 ف جامعة پرينستون، كاتقدم فنظرية الألعاب حالة فين جوج لعابة كان عندهم مصلحة أنهم يتعاونو بيناتهم و لكن ف غياب التواصل بيناتهم، كل واحد فيهم غادي يختار باش يخون لاخر إيلا هاد اللعبة لي لعبنا دابا تلعبات مرة وحدة.

السبب هو أن إيلا واحد ختار يتعاون مع لاخر و لاخر خانو، هاداك لي تعاون غادي يتزرف و غادي يتعاقب بزاف.

ولكن البلان هو أن كون بجوج خانو بعضياتهم، النتيجة غادا تكون كفس من كون بجوج تعاونو.

مشكلة الحباس كتستعمل بزاف فمواضيع بحال ليكونومي، لبيولوجي، السياسة العالمية و سياسات التجارية (مثلآ لفوائد و المخاطر ديال جوج شركات دخلو ف حرب ديال الأسعار، واحد كيهبطهم مثلا لاخر تاهوا كيهبط...) فپسيكولوجي، ف كيفاش الإعلام كيتعاملو معا لإشاعة و حتا كيفاش كينتاشرو القوانين الأخلاقية ف المجتمعات.

هاد معضلة الحباس عطاتنا ليكونومي الترجيبية لي كاتطيستي العقلانية الاقتصادية ديال اللعابة و القدرة ديالهم علا انهم يعرفو و يضربو علا حل كيتسما توازن ناش

المبدأ

توكر كيتخال جوج حباسة دارو بجوج جاريمة تعاونو فيها، كول واحد فيهوم مشدود ف سيلون بوحدو و ميقدروش يهضرو بيناتهم، البوليس كيعطيو لكل حباس فيهم هاد الاختيارات :

• إيلا واحد فيهم بيِّع بلاخور، غادي يخرج براءة، و لاخر غادي يتشد أقصى عقوبة لي هيا 10 سنين ديال الحبس
• إيلا بجوج بيْعو ببعضياتهم، بجوج غادي يتشدو و لكن غير 5 سنين للواحد
• و إيلا تا واحد فيهم ما بيْع بلاخر و بقاو ساكتين، غادي يضربو بجوج غي ست شهور لواحد و يخرجو حيت تاواحد ماعتارف و معندهمش ادلة بزاف ضدهم

هاد المعضلة كاتبين لينا مزيان البلانات ديال السياسة ديال الاسعار : ايلا واحد نزل الاسعار ديالو، غادي يوليو عندو كليان كتر و غادي يحكم السوق كتر من لاخور و يدخل فلوس كثر، ولكن ايلا الشركة لخرا تاهيا نزلات الاسعار ديالها، بجوج غادي يخسرو فلوس حيت غادي يوليو كيبيعو بقل

هاد اللعبة ماكاتديناش اوتوماتيكمون لواحد الحل فين كل حتا واحد يقدر يستافد كثر بلاما ينزل من الرفاهية ديال لاخور (هاد الحل كيتسما فميكرو ايكونومي اوپتيموم ديال پاريطو، لي كتعني الحالة الأمثل لي نقدرو نوصلو ليها انطلاقا من واحد سيتياسيون). حيت فالبلان العادي فين كل واحد كايضرب علا راسو بلاما يديها فلاخر، كل حباس فيهم غادي يبيع بصاحبو، بجوج غاي بغيو اناهم يغشو باش مايضربوش الحبس و لاخر يدرب 10 سنين.

هاد البلان هادا ديال انهم ماغاديش يختارو الحل المناسب ديال تاواحد مايديو و كل واحد يضرب 6 شهور و سدات مادام، هو البلان المهم فهاد المشكلة ديال الحباس

ايلا عاودنا هاد اللعبة، كل لعاب غادي يبغي يرجع الصرف لهاداك لاخر حيت بغا يزرفو و بييع بيه، ولا غير غادي يبغي يكالي علا الدقة شوية و تاهوا يبقا يبييع بلاخر

ملي كيدير هادشي، كيولي الحافز اناهو يغش تاهوا و يبييع بلاخر صغر من العقاب لي يقدر ياخد (زعما تاهوا كيولي يخاف علا راسو)، فهاد الوقت عاد كاتطلع معاهم الفكرة ديال يتعاونو، و كيولي الغاية مبقاتش كاتبرر الوسيلة.

مشكلة الحباس كتستعمل فليكونومي، فلماط و كيستعملوها بعض المرات حتا پسيكولوݣ، بيولوجيست و علماء ديال السياسة.

هاد البلان لي دوينا عليه كين حتا فل فلسافا و علوم خرين

مشكلة الحباس الكلاسيكية

الصياغة

اول تجرة ديال مشكلة الحباس تدارف ف 1950 من طرف ميلڤين دريشير و ميريل فلوود لي كانو خدامين ف شركة راند. من بعد، البيرت و. تاكر قدم هاد التجربة فشكل ديال قصة :

جوج مشتبه فيهم شدوهم البوليس، ولكن البوليس معندهمش دلائل بزاف باش يقدرو يثبتو عليهم الجريمة، اذن قررو يستجبوهم كول واحد بوحدو و كيقولو ليهوم نفس البلان "ايلا بييعتي بصاحبك و مبييعش بيك، غادي نطلقوك و لاخر غادي يضرب 10 سنين. و لكن ايلا بجوج بيعتو ببعضياتكم، غادي تدربو بجوجكم 5 سنين ديال الحبس. و ايلا تا واحد مبييع بلاخر، غادي تدربو بجوج 6 سنين ديال الحبس."

هاد البلان نقدرو نلخصوه فطابلو :

جدول كي لخص لينا الوضع

1 \ 2	المشتبه به رقم 1 يسكت	المشتبه به رقم 1 يبييع بلاخر
المشتبه به رقم 2 يسكت	بجوج غادي يضربو 6 شهور ديال الحبس	المشتبه به رقم 2 غادي يضرب 10 سنين و لاخر يتطلق
المشتبه به رقم 2 يبييع بلاخر	المشتبه به رقم 1 غادي يضرب 10 سنين و لاخر يتطلق	جوج غادي يضربو 5 سنين ديال الحبس

ايلا حولنا هادشي ل كل واحد للمنفعة ديال كل واحد، الجدول كيولي سميتو جدول (ولا مصفوفة بلعربية) المدفوعات

1 \ 2	المشتبه به رقم 1 يسكت	المشتبه به رقم 1 يبييع بلاخر
المشتبه به رقم 2 يسكت	(-1/2;-1/2)	(0;10-)
المشتبه به رقم 2 يبييع بلاخر	(10-;0)	(-5;-5)

كل واحد الحباسة كيفكر و كيفكر حتا فشنو الرد لي غادي يكون ديال لاخر.

• فحالة هو بييع بيا :
  • ايلا سكت انا، غادي نضرب 10 سنين ديال الحبس
  • ولكن ايلا بيعت بيه حتا انا، غادي نضرب غي 5 سنين
• فحالة هو سكت و مابييعش :
  • ايلا سكت، غادي نضرب 6 شهور ديال الحبس
  • ولكن ايلا بييعت بيه، غادي نخرج برائة

"لموهيم لي دارها هوا من الاحسن ليا نبييع بيه"

ايلا كل واحد فيهم فكر بهاد الطريقة، غالبا غادي يختارو انهم يبيعو ب بعضياتهم حيت كل واحد كيتضرب علا عرامو، اذن غادي يضربو 5 سنين ديال الحبس كل واحد فيهم.

و لكن البلان هو انه كون بقاو ساكتين بجوج كان غادي يقضرو يضربو غي 6 شهور للواحد.

اذن ملي كل واحد كيضرب علا راسو بلاما يفكر فلاخر، كنوصلو لواحد الحالة ماشي مثالية بمنطق پاريطو (يعني واحد الحالة فين مميكنش واحد يزيد الرفاهية ديالو بلاما ينزل ديال لاخر)

هاد اللعبة محصلها ماشي 0، كيعني انه الجمع ديال شنو ربحو اللعابة ماشي ديما بحال بحال، هنا كيبان البلان ديال التعاون

باش تكون نيت معضلة، هاداك الرغبة T (ديال انا نبييع بيه و هو يسكت) خاصها تكون حسن من التعاون C (نسكتو بجوج), لي خاصها تكون حسن من الانتقام Pحيت هوا بييع بيا P (انا نبييع بيه و هو يبييع بيها) لي خاصها تاهيا تكون حسن من انه يديرها بيها D (انا نسكت و هو يبييع بيا) هادشي نقدرو نديروه علا شكل معادلة :

$T>C>P>D$ (فهاد المثال : $0>-0,5>-5>-10$)

اذن باش يكون تعاون ف حالة ما عاودنا هاد اللعبة بزاف ديال المرات، خاد يكون : نتعاونو 2 مرات 2C تكون حسن من نغش T ولا تدار بيا D

هادشي كيعطينا علا طريقة معادلة :

$2C>T+D$ [فهاد المثال : $2*(-0,5)>0+(-10)$].

مشكلة فيها بزاف ديال اللعابة

المشكل كيولي مبدل ملي كيكونو بزاف ديال الحباسة فالسيلون. الريسك لي كين ديال شي الناس ميتعاونوش و يبييعو بلاخير كيتزاد و كيولي كبر من ملي كيكونو غير جوج حباسة.

هاد الحالة ممكن تكون اكثر واقعية ݣاع حيت غالبها الناس مكيتيقوش فبعضياتهم، اذن اننا نتسناو منهوم يتعاونو امر ماشي واقعي بزاف، واخا انه ايلا كل واحد ضرب علا راسو كولشي غادي يضرب 5 سنين ديال الحبس.

امثلة من حالات ديال بصح

كتعطينا مشكلة الحباس واحد الاطار عام لي نقدرو نستعملو فمواقف فيها جوج ديال اللاشخاص ولا ممثلان عامة ولا كثر، كيكون من الاحسن ليهوم يتعاونو بيناتهوم، و لكن المصلحة الخاصة ديال كل واحد فيهم كتغلب ملي حتا لاخر كيقلب غير علا مصلاحتو، و المشكل هوا انه ميقدروش يدويو بيانتهم و يتفاهمو.

هاد الامثلة لي غادي نديرو ف هاد الفقرة غادي يخليونا نفهمو كثر التطبيقات المتنوعة ديال هاد المشكلة ديال الحباس (ولا معضلة السجين بلعربية)

ف مجال الاعلام

القضية ديال ان وسائل الاعلام منافسة بيناتهم كنتقدرو نطبقو مشكلة الحباس، حيت خاصهم يديرو ختيار مابين السرعة باش يجيبو الخبر، و المصداقية و الصحة ديال الخبر. ملي كيولي كل اعلامي كيضرب علا راسو و تابع غير السرعة و بجوج ختارو السرعة، غادي توصلنا حنا المعلومة دغيا ولكن تقدر تكون غالطة حيت تاواحد ماختار يشوف صحة الخبر، بجوج بغاو غير السرعة.

ف ليكونومي

المثال لي نقدرو نقولو هنايا هو بحال جوج شركات معندهمش الحق يتافقو بيناتهوم علا سياسة تجارية بيناتهوم (حيت فبعض الدول بحال ميريكان، ممنوع شركات يبداو يديرو اتفاقات علا سياسات تجارية مشتاركة، حيت كيخافو من الاحتكار و يوليو هوما حاكمين السوق بيناتهوم). هاد جوج شركات كيفكرو واش ينزلو الاثمنة و لالا، ايلا واحد نزلهم، غادي يقدر يحتاكر السوق حيت ايلا كنت كانبيع بثمن قل، راه الناس غادا تشري من عندي كثر من لاخر لي مانزلش الثمن.

ولكن ايلا عزلو بجوج ينزلو الثمن، بجوج غادي يخسرو حيت غادي يوليو كيربحو فلوس قل من لي كانو كايدخلوه قبل ماينزلو الثمن.

نقدرو نهضرو حتا علا هادوك المنتوجات ديال الصالح العام (Bien collectifs) لي كولشي يقدر يستافد منهوم بنفس الطريقة، ولكن غير ايلا وحدين قلال خلصوهوم، راه يقدرو يستافدو منهوم (مثلا التعليم كلشي كيستافد منو بنفس القدر و لكن مثلا نقدر نستافد منها واخا ممخلصش الضريبة غير شي وحدين خرين خلصوها)

كين حتا الحالة ديال لكوطا (quota) فمجال الطيكستيل (النسيج) لي كيمنعو ان الثمن ينزل و لكن كلشي باغي يسكيڤيها.

و اخيرا ممكن نهضرو علا الحملات ديال الاشهار لي كيتعارضو بيناتهم.

الرياضة

مثلا فالسباقات ديال الپيكالا، بحال تور ديال فرانسا (Tour de France)، كاتبان لينا هاد المشكلة ديال الحباس، خصوصا ملي جوج كيخرجو من الجماعة (coureurs échappés)، خاصهم يقرو واش يزيدو فجهد ديالهوم ولا غير واحد يجي ورا هاداك لي خرج و يكالي عليه الهوا لي كيرجعو، و يرتاح حتا يدير جهد فلخر باش يربح.

ايلا تعاونو بجوج و زادو فالجهد، عندهم حضوض اكثر يربح و لكن كين لي يبغي هو يرتاح بلاست مايزيد فالجهد.

علم البيئة

نظرية الالعاب و مشكلة الحباس بلخصوص كايتستعملو بزاف فعلم البيئة باش نحللو كيفاش كيتبدلو سلوك مابين جوج ديال افراد من نوع واحد و كيفاش كيتطورو باش يوليو ستراتيجيات مستدامة تطوريا.

مثلا ممكن نتستعملوه فكيفاش كتبان و تبقى دوك الفلوك ديال التعاون مثلها.

رشارد دوكينز دار هاد البلان من اللعيبات المهمة فالنظرية ديالو ديال الجين الاناني، حيت فنضرو باش شي نوع ديال الحيوان ولا المخلوقات يبقاو عايشين ممكن يديرو واحد العلاقة ديال التعاون.

السياسة الدولية

مثلا ناخدو جوج بلدان منافسة بيناتهم. ممكن بجوج يختارو انهم يخليو الجيش ولا لا.

ايلا بجوج كان عندهم جيش (بواحد القوة بحال بحال تقريبا)، فهاد الحالة غادا تكون الحرب ماشي مغرية بزاف حيت غادي تخسر فيها فلوس بزاف. و هادشي لي كان فلحرب الباردة بين ميريكان و تيحاد سوڤياتي.

اما لا واحد عندو جيش، راه ممكن يربح لاخر بطريقة ساهلا بزاف، و هادا مابلانش.

و اخير سيناريو هوا ان بجوج يتعاونو و يحيدو الجيش ديالهم، غادا تكون السلام و ماكين لا حرب باردة لا والو، و ماغاديش يخسرو ݣاع الفلوس علا الجيش.

هاد الحالة ديال التعاون فين حتا واحد ماعندو عسكر باينا احسن وحدة، ولكن كاتبقا ماشي متوازنة، حيت كل واحد فيهم غادي يبغي يدير جيش بوحدو باش يزرب علا لاخر.

المشكلة ديال الحباس معاودة بزاف د لمرات

ف لكتاب ديالو "تطور التعاون" (1984)، روبرت اكسلرود غادي يدرس هاد المشكلة ولكن بواحد سيفة خرا، غادي يدير بلي هاد المشكلة عاودناها بزاف ديال المرات.

اللعابة فهاد السيناريو غادي يعاودو اللعابة بزاف ديال المرات و غادي يبقاو عاقلين علا شنو دارو فاللمرات لي فاتو.

روبرت عطانا واحد المثال باش نفهمو حسن : جوج ديال الناس تبادلو سيكان لي نورمالمون فيهوم فلوس و واحد المنتوج. كل واحد فيهوم من الاحسن ليه هو يعطي للاخر ساك خاوي، ولكن من الاحسن ليهوم بجوج اناه يتدار هاد ليشونج.

ملي كانعاودو هاد اللعبة بزاف ديال المرات مع واحد الناس، اللعابة لي كيختارو اناهم يزرفو لاخر و كيضربو غير علا راسهم كيخسرو فالمدى البعيد، ولكن هادوك لي كيتعاونو كيربحو فلخر.

اذن فالنضر ديالو هاد مشكلة الحباس مابقاتش نيت مشكلة.

اكسلرود كيستعمل هاد البلان باش يفسر كيفاش ولينا كانشوفو واحد البلان ديال التعاون فالتطور الدارويني و الانتقاء الطبيعي.

احسن ستراطيجي فواحد السياق هو "العين بالعين"، كيفما صوبها آناطول رابوبورت، لواحد المسابقة خدامة فلپيسي.

هاد الستراتيجي ربحات كتر من الخير حيت كانت ساهلة بزاف، هاد ستراتيجي هيا اناك تتعاون فالدقة لولة، و كل مرا خرا تبقا تدير بحال كيفما دار خونا لاخر.

بلان اخر مشتق من هادا هوا "العين بالعين مع التسامح"، و هادي صدقات ليه كتر شوية : ايلا لاخر ختار مايتعاونش، حنا نتعاونو مرا مرا (مبين 1% و 5%) فالمرا لي وراها. هادشي غير باش مانطيحوش فشي بلان يبقا هوا مايتعاونش و نبقا ندير بحالو حتا نساليو.

هاد الصطراتيجي هيا احسن وحدة ايلا اللعابة كان بيناتهوم الاتصال مشوش، بمعنى واحد يفهم شنو درتي بطريقة غلط.

فمشكلة الحباس ماكيناش ستراطيجي مزيانا ديما كاتسدق. مثلا الا هاد اللعابة كاملين متعاونوش ايلا واحد دار هاديك ستراتيجي ديال العين بالعين، هاد خونا غادي يسدق مزرف فاول تور.

و لكن فحالة الاجماع اننا غادي نتعاونو، احسن ستراتيجي هي اننا نخونون، ايلا كانت واحد جماعة ديما كاتخون، و كيديرو هاديك العين بالعين، احسن ستراتيجي غادا تكون علا حساب نسبة و شحال بقينا لاعبين.

ملي كان حيدو هادوك اللعابة لي ماكايربحوش بزاف و كان نبقاو نقلدو هادوك لي كيربحو، نقدرو نوصلو ل ستراتيجي ناضية.

ايلا كان N، لي هو شحال من مرا غادي نعاودو هاد اللعبة من مرا، التوازن ديال ناش هوا انك تبقا ديما تخون، نقدرو نبينو هاد القضية ملي N=1 غير بالتكرار.

• فآخر تور، هاداك لاخر ماغاديش يقدر يرجع ليا سرف ايلا خنتو انا، اذن من الاحسن ليا انا نخون.
• ملي كانديرو هادشي، فهاداك تور لي قبل اللخر، ملي كانقولو بلي لاخر غادي يخونا واخا ماعرفت شنو يوقع فتور لي وراه، من الاحسن نخونو تاهيا.
• غادي نبقاو نعاودو هاد البلان حتا نوليو كانخونو ف جميع لي تور.

باش التعاون يبقا بلان مثير، خاص المستقبل يبقا غامض و ماشي معروف بالنسبة لݣاع اللعابة، واحد السوليسيون هيا ديال نهزو N بطريقة عشوائية.

الوضع لي فشكل هو انا الا لعبنا هاد البلان لواحد المدة ممحداش، النتيجة غادا تكون هي متوسط ديال سكور لي جبنا.

مشكلة الحباس هي اساس ديال بزاف ديال نظريات ديال التعاون البشري و الثقة. السلوك ديال التعاون ف شي مجتمع ممكن نحللوها غير بهاد الطريقة ديال مشكلة الحباس.

هاد المشكلة عجبات بزاف ديال العلماء لبزاف ديال الوقت : ف 1975 (Grofman) و (Pool) كان عندهم كتر من 2000 مقال علمي علا هاد البلان.

هاد الاعمال عطاتنا واحد الاساس ملموس لي نقدرو نستهملوه فالدراسة ديال القوانين الاخلاقية.

عطانا اكسلرود فكتاب ديالو كيفاش ننجحو فواحد العالم ديال بنادم اناني و كيضرب علا راسو مع هاداك ستراتيجي ديال عين بالعين : فحرب الخنادع، طبقو هادوك العساكريا مبدا عيش و خلي ناس تعيش، واخا الكوماندان ديالهوم مابغاوش، فهاد السياق تاواحد مبدا بالخيانة و بداو كايتيريو فيهوم.

هاد اللعبة بطريقة خرا

كينين طرق خرين لهاد اللعبة، ملي كانبدلو شوية داكشي لي يقدرو يربحو، كانوصلو لواحد ستنتاجات مختالفة بزاف :

اللعبة ديال الخواف

لعبة ديال الخواف تاهوا لعبة فين السكور لخر ماشي زيرو، و فين التعاون كيكون مزيان. هاد اللعبة قريبة ديال اللعبة ديال الحباس من ناحية انه حسن ليك تخون و لاخر يتعاون، ولكن الحاجة المبدلة هي ان فهاد اللعبة، اخيب بلان هو بجوجكوم تخونو بعضياتكم، و لكن فلعبة الحباس اخيب بلان يوقع هو نتا تعاون و لاخر يخونك.

طابلو كيولي :

• ايلا بجوج تعاونو، كايربحو +5
• ايلا واحد تعاون و لاخر خان، هاداك لي تعاون كاتجيه +1 و لاخر +10
• ايلا بجوج خانو بعدياتهم، كاتجيهوم -20

1 \ 2	تعاون	خون
تعاون	(+5;+5)	(+1;+10)
خون	(+10;+1)	(-20;-20)

هاد اللعبة ديال الخواف جايا من لعبة طوموبيل:

• جوج طوموبيلات كيديماريو و وحدا غاديا عند لخرا، كول لاعب يقدر يقلب طريق باش مايتساطحوش، ولا يبقا مكسيري و يديرو كسيدا.

جوج طوموبيلات كيديماريو و وحدا غاديا عند لخرا، كول لاعب يقدر يقلب طريق باش مايتساطحوش، ولا يبقا مكسيري و يديرو كسيدا.

كنقدرو نلقاو امتلة من الواقع المعاش ديالنها، مثلا التسياق و الشقا ديال الدار مابين راجل و مرتو، ولا سيستيم ديال السقى مابين جوج فلاحة، ممكن كل واحد يصاوب داكشي ديالو و بجوجهوم يستافدو منو بحال بحال، الا واحد ماصاوبش دكشي ديالو، لاخر من احسن ليه يديرها واخا هاكاك باش داكشي لي زارع مايدبلش ليه.

اذن واحد غادي يولف لاخر يصرف عليه و يبقا يخلص عليه، و غادي يعجبو الحال

ممكن نطبقوها حتا فالسياسة الدولية. الا كان مابين جوج دول واحد نزاع يقدر يوصلو للحرب، هادي حتا هيا حالا ديال لعبة الخواف، و ايلا حنا بقينا غير كان كونو ضريفين و نتعاونو غادي نبقاو ديما نطيحو فنفس الموقف (كيفما كانت فرانسا و لينݣليز قبل عام 1939) و لكن الحفاظ علا السمعة ديالك، خاصك تخسر فلوس (تقاد دكشي ديال لارمي) و كينين لي ريسك (الحرب ديما ممكن تنوض)

صديق ولا عدو

"صديق ام عدو" هي واحد لعبة كانت فتلفازا ديال ميريكان، فين جربنا اللعبة ديال الحباس، 3 ديال جروبات ديال جوج دناس جربناها عليهوم.

ملي كايطير جروب، جوج من لي فيه كيتقاسمو الارباح بهال فلعبة ديال الحباس، يلا جوج تافقو، غادي يتقاسمو الفلوس لي جمعو فاللعبة قد قد. الا بجوج بغاو يخونو، مغادي يديو حتا ريال. و ايلا واحد خان و واحد تعاون، هاداك لي خان غادي يدي فلوس كاملين.

هاد البلان شويا مختالف علا الطابلو لي درنا لفوق، حيت الربح بحال بحال بالنسبة لخونا لي كيبقا يتعاون و خانوه، ادن ايلا عرف بلي لاخر غادي يخونو، الجواب ديالو غادي يكون مختالف.

الطابلو كيولي :

• ايلا بجوج تعاونو، كل واحد غادي ياخد 50%
• ايلا بجوج خانو، غادي ياخدو 0%
• ايلا واحد خان و لاخد تعاون، لي خان غادي يدي 100% و لاخر 0%

Joueur 1 ; Joueur 2	تعاون	خون
تعاون	(50 % ; 50 %)	(0 % ; 100 %)
خون	(100 % ; 0 %)	(0 % ; 0 %)

عالم الاقتصاد جون أ. ليست درس سلوك اللاعب فهاد اللعبة باش يجرب واش هاداك التنبؤات لي دارو نظريا نيت بصح فلواقح.

اللعابة كيتعاونو ف 50% ديال الحالات، ولكن كين ختلاف فالسلوك علا حساب واحد ماعايير جتماعية و ديموغرافيا ديال اللاعبين.

مثلا الرجال كيتعاونو قل من العيالات، و تبيين ان للعابا يبقاو يقلدو شوية السلوك ديال لاخرين.

مشكلة الحباس فالثقافة

ف لفيلم ديال باطمان The Dark Knight كين واحد تيوشية قريبا للعبة الحباس.

فرواية (N'oublier jamais) ديال (Michel Bussi)، جوج ديال المشتبه فيهم كانو باينين بحال ف لعبة الحباس لمدة 10 سنين، اللعبة غادي يعيق بيها البوليسي و غادي يحاول يسدها ولكن ماقدرش.

هو العنوان ديال واحد الفيديو ديال (Wil Aime) فين ربعة ديال الاصدقاء بداو كيسولو فيهوم واحد المحققين ف واحد الستيل بحال هاد اللعبة ديال الحباسة.