مركز حضري ديال جماعة قروية
المركز الحضري ديال الجماعات لقروية (الرمز: CU) ف المغريب هوّ تقسيم إداري لي كايتّصنف كمجال حضري ف الإحصائيات الرسمية، عادة تايكون هو المركز ديال شي جماعة قروية لي بعيدة على المدينة، ؤ عادة ماتاياخد نفس الإسم ديال الجماعة. أما محليا، عادة ماتايسميوه الناس دالمنطقة (الڨيلاج)، هاد التقسيم دارتو الدولة بهدف تقريب الخدمات من الناس دالبادية، و الحد من الهجرة القروية.
المركز الحضري ديال الجماعات القروية تايكون عندو طابع حضري ؤ فأغلب الأحيان تايكون عندو مخطط تهيئة حضرية، لكن تايكون الحجم ديالو صغير، ؤ عدد السكان فيه قليل، الشي لي ماتايأهلوش باش يتصنف مدينة، لكن إلى توسع بزاف، تايكون حتمال باش يتأهل لجماعة حضرية. ف نفس الوقت تاتكون الكثافة السكانية ديالو كبيرة، لي تايخليه مايتصنفش معا المجال القروي.[1] لمركز كيكون عندو كوض جغرافي ديالو بحال أي جماعة ترابية. الجماعات القروية يقدر مايكون فيها تا مركز حضري، ؤ يقدرو يكونو فيها كتر من مركز واحد.
فالتقسيم الجهوي الجديد لي دار المغرب عام 2015، تحيد المفهوم ديال جماعة قروية ؤ جماعة حضرية، ورجع كولشي سميتو جماعة ترابية، نفس الأمر بالنسبة للمراكز الحضرية والمراكز القروية، لي رجعات سميتهم مراكز الجماعات ؤ صافي. السبب ديال هاد التغيير هو أن المركز بعد ما تايتصنف مركز حضري، القيمة العقارية ديالو تاطلع بزاف، لي عطى مجال للسياسيين باش يخروضو باش يعطيو هاد الصفة ديال مركز حضري للمناطق لي عندهم فيها الأراضي ولا ياخدو الرشوة باش يرجعوها هكا واخا تكون ماكاتحققش الشروط.
المركز الحضري دالجماعة القروية تايختالف على الجماعة القروية لي تاينتامي ليها من ناحية عدد السكان، حيت غالبا تالقاو السكان ديالو الضوبل ولا التريپل ديال السكان ديال الجماعة، واخا تايشكل فقط بين 10 ؤ 20 فالمية من المساحة ديالها. السكان ديال المراكز الحضرية غالبا تاينتاقلو ليها من نفس الجماعة القروية ف إطار الهجرة القروية، ؤ بزاف منهم تايخليو الفلاحة ديالهم فالبادية ؤ تايستاقرو فالمركز الحضري باش يقريو ولادهم للكوليج ولا الليسي، بالإضافة للموظفين و الأساتذة لي تايستاقرو فهاد المراكز، ؤ تايخلقو فيها نشاط تجاري.[1] المندوبية السامية دالإحصاء تاتعتابر السكان دالمراكز الحضرية سكان حضريين، ؤ فلإحصاء العام دالسكن والسكنى، عدد سكان الجماعة القروية والمركز الحضري تايتنشرو مستاقلين.
المركز الحضري تاتجمعو فيه ڭاع الإدارات ديال الجماعة (مقر الجماعة، القيادة، الباشوية، المدارس، الكوليجات، الليسيات، السبيطار، دار الشباب، المكتبة، الداخلية، ...). التلاميذ ديال الدواور دالجماعة القروية عادة تاينتاقلو للمركز الحضري باش يقراو الكوليج والليسي، لقراب منهم تايناڨيطيو فالنقل المدرسي، ؤ لبعاد تايعيشو فالداخلية دالمدرسة، ولا فدار الطالب ولا الطالبة. الناس دالمراكز الحضرية تايعيشو على أنشطة خدماتية بحال المحلات التجارية والقهاوي والكرا، لي كايتوجهو غالبا للموظفين. هاد المراكز تايكونو أيضا عبارة على مراكز إقتصادية دالجماعات لي تاينتاميو ليهم، حيت تايكون فيهم السوق الأسبوعي لي تايتلاقاو فيه الناس من الدواور كاملين دالجماعة، ؤ تايتبايعو ويتشاراو فمنتجات الزراعية ومنتجات الصناعة التقليدية، ؤ تايبيعو المحاصيل ديالهم، ؤ تايشريو السميدة و الدوا ؤ باقي الأمور لي كاتخصهم فالفلاحة.
- عين اللوح، مركز جماعة عين اللوح
- سوق الحد، مركز جماعة واد إفران
- سيدي عدي، مركز جماعة سيدي المخفي
- اللويزية، مركز جماعة بني يخلف
- ^ a b Centre des études et des recherches démographiques du Haut-Commissariat au plan (2005). "4- Urbanisation et dynamique des villes au Maroc". Démographie marocaine - Tendances passées et Perspectives d'avenir (pdf). ص. 94. ردمك 9954-405-28-3. démo.
