كورݣي ويلزي

	كورݣي ويلزي
	لعيشة
لمودة د لعيشة	12 a
	خصايصو
لعلو	30 سم

كورݣي ويلزي (ب النݣليزية: Welsh Corgi) ولا غير كورݣي، هي سلالة صغيرة ديال كلاب الرعي لي تأصلات ف ويلز. السمية كورݣي (Corgi) تشتقات من لكلمات لويلزيين كور - Cor و كي - Ci (لي تطوورات ل ݣي - Gi)، و لي كايعنيو "قزم" و "كلب" ب شكل متابع.

جوج سلالات تحتانيين معتارف بيهم؛ لكورݣي لويلزي د پيمبروك و لكورݣي لويلزي د كارديݣان. شي تبدالات كسديين تشافو بينات الجوج نواع. على حساب السطونضارات د السلالة، لكارديݣان كاتكون كبر ب شكل عام، ف التقل و الطول ب جوج. قزازبهم كايكونو مبدلين ف الشكل، و التقزاب (Docking) لي كان كايتطبق على لكورݣيات قبل، دابا ممنوع ب شكل كبير.

تاريخياً، لپيمبروك منسوب ل لكلاب لي جاو معا لحبّاكين لفلامانيين (Flemish) ف جوايه لقرن 14، أما لكارديݣان مقرون ب لكلاب لي جاو معا لمستوطنين النورديكيين (Norse)، ب الضبط واحد الجد مشروك معا كلب لڤالهوند السويدي (Swedish Vallhund).

لپيمبروك هي لي شعبية كتر بينات الجوج سلالات التحتانيين، وخا هاكداك مازالة كاتبان ف الليستة د سلالات لكلاب لمحسوسين ف كلوب كينيل د لمملكة لمتحدة. لكورݣي لويلزي د پيمبروك كسب الشعبية حيتاش إيليزابيط التانية كان عندها كتر من 30 پيمبروك ولا تكرويزات بين لكورݣي و داكسهوند (Dachshund) لي معروفين ب سمية الضورݣي (Dorgi).

التاريخ

پيمبروكشير (Pembrokeshire) و كارديݣانشير (Cardiganshire) هوما جوج أقاليم فلاحيين و تاريخيين حدا بعضياتهم ف جنوب غرب ويلز. لكورݣيات لويلزيين كانو كلاب د قطيع لبݣر، النوع د كلب لقطيع لي كايعيطو ليه "كعّاب" - "heeler" يعني كاينيّبو (nip) لݣدام/لكعاب د لحيوانات لكبر باش يخليوهوم محركين. التخليطة ديال الطولة لحادرة و لخفّة لخلوقية د لكورݣيات لويلزيين كاتخليهم يتجنبو حوافر لبݣر. لموصطالاح "كورݣي" كايعني يا كلب كور (Cur) يا كلب قزم (كور - cor = قزم، ݣي - Gi = ترطاب (lenition) د كي - ci، لي كاتعني كلب) ف اللوغة لويلزية، و لي ماكانوش ناويينها كا معيورة، و لاكين كا موصطالاح وصفي على لقد د لكلب. تعاودو حجايات مبدلين على لأصل د هاد السلالة؛ شي وحدين كايآمنو بلي الجوج سلالات التحتانيين لعصريين تطوورو من أصل مشروك. ف لوقيتة لي وحدين خرين كايقرنو لكورݣي ب لمجي د لحبّاكين لفلامانيين من لبدو د جوايه لقرن 10. النضريات لخرين على لأصل ديال التنويع د پيمبروك كاتشير بلي واقيلا تأصلو من سلالات لقطيع لوسط أوروپيين من لمنطاقة الضايرة ب ألمانيا د دابا. على حساب لوقت فين هاد لكلاب تآمپورطاو ل ويلز، يقدرو يكونو يا دوتشه بغاكين (Deutsche Bracken) ولا داكسهوند (Dachshund).

لكورݣي لويلزي د كارديݣان تنسب ل لمستوطنين النورديكيين (Norse) ف لمنطاقة. لكلاب لي من شكال مشابهين موجودين ف سكانديناڤيا د دابا، كايعيطو ليهم لڤالهوند السويدي، و شي توارخيين كايتداعاو بلي هاد الجوج سلالات التحتانيين كايشركو جد مشروك. ف اللخر د لقرن 19، السراحا بداو يقلبو من تربية لبݣر ل تربية لحوالا، و لاكين لݣورݣي ماكانش لايق ف لمقابلة د لحوالا. التشابيهات بينات لكورݣيات لويلزيين تنسبو ل التكرويز بينات الجوج سلالات التحتانيين، ولا ب بساطة لمجاوجة ب لعزيلة من دوك لي تمناو التنويعة د لکارديݣان تبان قريبة ف طبيعتها ل لپيمبروك.

أول تاريخ مشجل ل لكورݣيات لي كايبانو ف منصات الشوو ف ويلز كان ف 1925. لکاپطين جي. پي. هاول دار واحد الرونديڤو ل لموربيين د التنويعات د لكارديݣان و لپيمبروك ب جوج و صايب لكلوب د لكورݣي لويلزي، ب عضوية بديانية د 59 عضو. واحد السطونضار عام على السلالة تسطّر، و لكورݣيات بداو يبانو ف الشووات د لكلاب. حتى ل هاد اللحضة، حتى شي تنويعة من لكورݣي ماجاوجوها ب شكل خاص على وديت الشكل لبراني. لعضاء د هاد لكلوب كانو مهتمين ب شكل لولاني ب التنويعة د پيمبروك، وخا التنويعة د كارديݣان حتى هي بانت. و فهاد اللحضة، ولا كايعيطو ل السلالات التحتانيين التنويعاا د پيمبروكشير و لكارديݣانشير؛ السميات موراها تقصّرو. كانو شلا نقاشات بينات لموربيين د الجوج تنويعات ف الشووات اللولانيين، حيتاش لحكّام لي ف نفس لوقت كانو موربيين د شي تنويعة من الجوج، كانو دايماً كايجيو من جيهتها.

لبطولة اللولانية تخادت ف واحد الشوو ف كارديف ف 1928، من واحد لكلبة حمرة وبيضة د لپيميروك سميتها شان فاتش. لحكيم على التنويعات معا بعضياتهم كمّل حتى ل 1934، منين كلوب كينيل عتارف ب كل تنويعة ب شكل مفارق. ف هاد التقياد اللولاني، شي 59 ݣارديݣان و شي 240 پيمبروك تليستاو ف لكتوبا د لپيديݣري.

لكورݣيات لويلزيين د كارديݣان كملو ف النقصان و ولاو نادرين على لپيمبروك، ب غير 11 ل تقياد تدار ف 1940. التنويعات ب جوج نجاو ف لحرب لعالمية الجاوجة، وخا لكارديݣانات لي تقيدو ف كلوب كينيل كانو غير 61 معا لمسالية د لحرب. لپيمبروك ولا مشهور بزايد ف وقيت لعوام لي مورا لحرب ف لمملكة لمتحدة؛ ف 1953، جا ف الرتبة الرابعة ف أشهر سلالة شعبية ف كلوب كينيل، من مور كاكر سپانيْل النݣليزي، لبيرجي لألماني، و لپيكينوا. من بعد سلالة لكورݣي مات ليها لحوت، لفيزيسيان لبيطاري برايان سينݣلتن قال ف جورنال ذا تايمس - The Times ف عام 1963 بلي هادشي كان ب سباب لمشاكيل د لمجاج ديالهوم. لكورݣي لويلزي د كارديݣان تليستا ف أول ليستة د السلالات لأصليين لمحسوسين د كلوب كينيل ف 2006. هاد الليستة ديال دوك السلالات لي مقيدين ب قل من 300 كلب كل عام؛ كانو غير 84 كورݣي د كارديݣان مقيد ف 2006. من بعد واحد الزيادة لولانية، نقصو ل 46 ف 2010، و لايني ف 2015 طلعو ل لعدد الزايد ݣاع منين بدات الليستة، ب طوطال د 124 جرو مقيد. ف 2013، لكورݣي لويلزي د پيمبروك حتى هو تزاد، حيت كان غير 241 جرو مقيد ف داك لعام. ف لوقيتة لي كلوب كينيل حط اللومة د هادشي على لامپورطاسيو د سلالات لكلاب لبرانيين، جورنال ذا دايلي تيليݣراف - The Daily Telegraph حط اللومة د النقصان على قرار لمنع ظ تقزاب الزناطط لي تطبق ست سنين قبل. وخا هاكداك، 2015 كان فيه زيادة د 35٪ ف عدد التقيادات د لپيمبروك؛ الشعبية د لكورݣيات ف لانسطاݣرام هي لي كانت سباب. لپيمبروكات تحيدو ف 2016 من الليستة د السلالات لأصليين لمحسوسين.

السلالات لعصريين

الجوج تنويعات د لكورݣي لويلزي، لكارديݣان و لپيمبروك، تسماو على قبل لأقاليم لي ف ويلز فين تأصلو. لكلاب كايشركو بزاف د لخصايل لمشابهين بيناتهم، كيف لفرو ديالهم، لي كايريزيستي لما و كايبدلوه مرتين ف لعام كا متوسط. لكسدة د لكارديݣان طوْل ب شويش على ديال لپيمبروك؛ التنويعات ب جوج عندهم رجلين قصار، هادشي لي كايخلّي كسدتهم قريبة ل لرض. هوما مامربعينش ف الجوانب بحال الطيريير - Terrier، و ماعندهومش كسدات مطوْلين بحال الطولة د كسدات الداكسهوند - Dachshund. تشافو غير شي تبدالات صغار ف شكل الراس؛ ريوسهوم ب جوج بحال شي تعلب. الراس د لكارديݣان كايكون ف لعادة كبر من ديال شي پيمبروك و عندو نيف كبر. كايخص غير شي يامات قلال من بعد لولادة باش يبان اللون لحقيقي ديال فرو لكورݣي، و هادشي كايبان ب الضبط التعلامات التعلامات تلاتية اللوان (Tricolor) و لكحل و لقهوي. لكورݣيات د الزمان لعصري دايماً كايتنافسو ف طيسطات د لخفة، الطاعة، الستيعراض (Showmanship)، لكورة الطايرة (Flyball)، التبيع ب الشم، و السريح. كايقدرو يتعبرو غرايز السريح و لقابلية على الدريساج ف طيسطات لاتنافوسيين د السريح. لكورݣيات د لكارديݣان و لپيمبروك كايوريو واحد لغرايز د السريح ساسيين لي يقدرو يتصقلو على قبل لكومپيتيسيوات د السريح _ معروفين زنقاوياّ ب "ماد رن - Mad run". لكورݣي لويلزي فايت تخدّم باش يقابل الدراري الصغار.

لكورݣي د كارديݣان

التبدالات بينات الجوج سلالات التحتانيين منهم، لبنية لعضمية، طولة لكسدة، و لقد. لكارديݣان هو لكبر ف الجوج تنويعات، ودنين ضايرين وكبر و بقزيبة كيف ديال التعلب، فيها 30 سونتيميطر، و غادية ف نفس لخط معا لكسدة. وخا لكارديݣان كايكونو فيه اللوان كتر من لپيمبروك، لبيض ماخصش يكون طاغي ف لفرو ديالو. لكارديݣان عندو لفرو مدوبل فين لفرو لبراوي كايكون عامر، حرش ب شوية ف لقوام، و ف طولة موسطة. لفرو التحتاني كايكون قصير، رطب، و غليض. على حساب سطونضار التنويعة، لعلو ديالها بين 27 و 32 سونتيميطر ل لكتاف، و كايخص توزن 14–17 لكيلو. لبنية السكوليطية د لكارديݣان مبدلة من ديال لپيمبروك، واحد التقويسة زايدة ف لقياس كاتكون عند هاد السلالة ف الرجلين لقداميين، لي مواتية معا لقفص الصدري د لحيوان. زيد على هادشي، لكارديݣان كايكون مكاضري ب زايد على لپيميروك ب كتافة عضمية كتر.

تنويعة لكارديݣان عندها عدد كبر من لوان لفرو على تنويعة لپيمبروك، السطونضار د لكارديݣان كايخليه يكون عندو شلا تنويعات د لفرو بحال طبقات مبدلين من لحمر، الرملي (sable)، و لمزركط (brindle). التعلامات لبويض كايكونو متوقعين ف هاد التنويعة د لكورݣي، و شي واحد ب فرو كحل مسموح ليه يكون عندو نقاطي ب السمر ولا لمزركط على حساب قوانين الشوو د لكلاب. لعلمات د لميرل (merle) حتى هوما حاضرين ف التنويعة، وخا هادشي ف لعادة محصور غير ف لميرل الزرق. شلا معايير لاتأهيليين كايتخدمو ف السطونضار د التنويعة على قبل الشووات د لكلاب. بحال لودنين الطايحين، لفرو لبيض، لعينين الزرقين، و نيف كحل ماصليبش ف لكلاب بلا التلوينة د ميرل.

لكورݣي د پيمبروك

كورݣيات پيمبروك كايوريو ودنين مقمقمين، و هوما ب شي طريقة صغر لوقفة على لكارديݣان. هوما حادرين ل التحت، دكيين، صحاح، وكايصبرو على تامارة ب إينيرجي كافية باش يخدمو نهار كامل ف شي فيرما. الطولة الشايعة حتى ل لكتف مابين 25–30 سونتيميطر، أما الدكر من هاد التنويعة ماكايخصوش يوزن كتر من 14 كيلوݣرام،، و النتوا 11 كيلوݣرام. لقزيبة قصر من ديال لكارديݣان، لي تقدر تكون يا ب لمجاوجة يا ب التقزاب. تاريخياً، لپيمبروك كانت تنويعة ب قزازب قصار بزاف (bobtail) ب شكل طبيعي. و غير بانت فكرة التقزاب د لكلاب، لقزيبة لقصيرة ماكانتش مطمع، و ف عوض هادشي، لموربيين ركزو على خصايل خرين، و لقزيبة تقصّرات ب شكل صطيناعي يلا كان لازم. و ب لخودان ف لبال شي بلدان دابا كاتمنع التقزاب، شي موربيين كايجربو عاوتاني لعزيلة د كلاب ب جينات ديال لقزازب لقصار بزاف (bobtail).

لوان د لفرو قل كايبانو ف التنويعة د لپيمبروك، بحال لحمر، الرملي، السمر، لبرونزي، و لكحل، كل لون فيهم يقدر يكون ب لعلمات لبويض ولا مايكونش. لبيض لكامل ولا الرمادي حتى هوما كايتشافو، و لايني كايتعتابرو عيوب كبار على حساب الشووات د لكلاب. وخا هاكداك، لكورݣي لويلزي د پيمبروك ماعندو حتى معايير لاتأهيليين حاضرين ف السطونضار د التنويعة. لكورݣي لويلزي د پيمبروك عندو جوج فروات لي مبدلين ف الطول على طول كسدتهم. لفرو اللول كايكون فرو دخلاني قصير لي كايريزيسطي الجو لقاصح، ف لوقيتة لي لفرو لبراوي كايكون حرش و طوْل، ولايني طولتو موسطة. طولة لفرو كاتبدل على التوزيع د لفرو ف لكسدة. لفرو لي مور الطراف لقداميين و اللورانيين كايميل باش يكون طوْل و غلض، و حتى ل تحت من لكسدة. زيد على هادشي، كايبان بلي عندهم فرو كبر ف لحجم ف الصدر، لعنق، و لكتاف. لكورݣي لويلزي د پيمبروك عندو فرو كايتبدل.

الصحة

على حساب واحد الستيطلاع صحي ف 2004، الجوج تنويعات د لكورݣي كان عندهم موعدال لعمر كيف كيف؛ متوسط لعمر د لموت كان 12 لعام و 3 شهور ب النسبة ل لپيمبروك و 12 لعام و شهراين عند لكارديݣان. لمسببات الساسيين د لموت كانو بحال بحال عند التنويعات ب جوج؛ السباب اللولاني كان كونصير لكلاب و لعمر لكبير. غير هو، تنويعة لپيمبروك بينات نسبات د لموت زيْد د فشل لكلاوي و نسيداد مجاري لبول. الستيطلاع ورى بلي السلالة مضرورة من شي حالات صحيين مستامرين ب موعدالات مشابهين ب ستيتناء واحد: ف لوقيتة لي كتر من الربع د لكورݣيات لويلزيين د پيمبروك لي ف الستيطلاع تضرّو من شي نوع د حالة مرضية د لعين (eye condition)، غير 6.1٪ من لكورݣيات د كارديݣان لي تقاصو بيها. لحالات لمرضيين النوعيين د لعين ف سلالة لكورݣي بحال ضمور الشبكية التدريجي (Progressive Retinal Atrophy)، لي دايماً كاتكون موجودة ف لكلاب لي عمرهم كتر من ست سنين، و ݣلوكوما لكلاب (Canine Glaucoma)، لي كاتكون شايعة كتر ف لكلاب لكبار ف لعمر. الجلالة ف لكورݣيات كاتداوى ب التخراج د الجلالة (cataract extraction). نسبات مياويين مشابهين تشافو ف ستيطلاع د الجوج تنويعات ف غراض متعلقين ب لمكاترة، بحال لحاجة ل ولادة سيزاريان (caesarian section) و لحمالة لمزورة (false pregnancie). تشابيهات خرين حتى هوما تشافو بلي متعلقين لغراض السكوليطوعضليين (musculoskeletal)، بحال حريق لمفاصل (arthritis)، وخا هاكداك، خلل تنسوج لورك (hip dysplasia) لي شايع ف شي نواع د لكلاب، كايكون نادر عند سلالة لكورݣي.

التأتيرات التقافيين

لملكة إيليزابيط جاوجات 10 د الجيال من لكورݣيات د پيمبروك، و ملكات شخصياً كتر من 30 كلب من هاد التنويعة، لي كانو ياما كورݣيات ويلزيين د پيمبروك أصيلين (purebred) ياما تكرويزات بين لكورݣي و الداكسهوند لي كايعيطو ليهم الضورݣي (dorgi).

لكورݣيات عاوتاني بانو ف الشاشة، لخشبة، و الريوايات. لكورݣيات ب صيفتهم كاراكطيرات تدخلو ف لكتاب لقصصي د لفنطازيا كورݣيڤيل فير (corgiville fair)، لختيطاف لكبير د كورݣيڨيل (the great corgiville kidnapping) و كريسماس د كورݣيڤيل د لكتاتبية و الرسامة تاشا توضور. ف لفيلم لي من بطولة إلڤيس پريسلي د عام 1961، هاواي زرقا (Blue Hawaii)، واحد لكورݣي لوكال بان ف واحد السين كايعاون ف تحضار د فوطة. ف 1963، واحد لكورݣي بان ف لفيلم د ستوديوات وولت ديزني، كلب صغير موضر (little dog lost)، لي ودى ف واحد الزيادة ف شعبية السلالة ف ميريكان. واحد لآضاپطاسيو مسراحية سميتها لعملاق لكبير الضريف (bif friendly giant) د لكتاتبي لويلزي رولض ضول و لي كان خصها بزاف د لكورݣيات لمبدلين ف لخشبة ب صيفتهوم دوك لكورݣيات د لملكة إيليزابيط. كورݣيات لملكة (the queen's corgis) هو فيلم آنيماسيو بلجيكي كايصور لكورݣيات د لملكة.

ف لآنيمي كاوبوي بيبوپ (cowboy bebop)، لكرو كان عندهم واحد لكورݣي ويلزي د پيمبروك دكي ب زايد، سميتو آين (ختيصار د آينشطاين) ف لمركبة ديالهم. الريواية لمصورة كورݣي (korgi) د دار النشر طوپ شيلف كاتلعب على التقليد لفولكلوري د لكورݣيات ب صيفتهم حيوانات د الجنيات (fairy).

السيرية التلفازية لميريكانية د لانيماسيو، طران لمالانيهاية (infinity train) ورات واحد لبلاد د كورݣيات آنطروپومورفيين (anthropomorphic) معروفين ب سمية كورݣينيا و لي حاكمهم لملك آتيكوس.

ف السيتكوم لميريكاني بروكلين ناين ناين (Brooklyn Nine-Nine)، لكاراكطيرات كاپطن هولت و كيڤن كوزنر مالكين واحد لكورݣي د پيمبروك سميتو تشيدر. تشيدر كايخدم كا تلهية كوميدية و كايعاود يبان ف شي حلقات كل موسم.