كريستين دوغ
كريستين دوغ
| ||
| معلومات عامة | ||
| زيادة | 12 نونبر 1926 مونبلييه | |
| لموت | 28 ماي 2014 (87 عام) الدائرة العشرون في باريس | |
| لجنسية | فرانصا | |
| لحرفة | ناشطة حقوق الإنسان و كاتيبة | |
| لّوغات لي كيعرف | لفرانساوية | |
| لفاميلة | ||
| لواليد | Pierre Daure | |
| شريك | أبراهام سرفاتي | |
| لولاد | Christophe Aguiton | |
كريستين دوغ، ولا كريستين دوغ-سرفاتي، تولدات فـ12 نونبر 1926 ف مونپوليي ؤ ماتت فـ28 ماي 2014 ف باريز، كانت كاتيبة ؤ مناضلة د حقوق لإنسان فرانصاوية.
تولدات فـ1926 ف مونپوليي، كريستين كبرات ف لوقيتة ديال لمقاومة لفرانصاوية ف لحرب لعالامية تانية. باها پيير دوغ كان فيزيائي ؤ عميد ديال لجاميعة د كون حتا جرا عليه ڤيشي حيت مابغاش يطبق قوانين ضد ليهود، موراها فـ1944 عينو دو ݣول پريفي ديال كالڤادوس.[1] خالها فرونسوا كولي كان ديپلوماسي دخل ف لحركة ديال فرانصا حورا ؤ تعين فـ1944 كوميسير ديال لجومهورية ف نورموندي.[2]
تزوجات كريستين ب پيير أݣيطون، لي كان قاضي ؤ تعين ف لمحكمة د لأمن لعسكري ف لجزاير، ؤ كان قريب من تيارات ليمنية، ف لوقت لي هي كانت كاتدافع على لموناضلين ديال ل ف.ل.ن. حاولات كريستين تدي ولادها بجوج كريسطوف ؤ ليز لجزاير والاكين باهم كان رافض لفكرة، وبسباب هادشي طلقاتو.[1]
موراها عاودات تزوجات كريستين ب هنري جوڤان، ؤ رحلات معاه ؤ ولادها بجوج للمغريب. ولادات معاه بنت سميتها لوسيل.[1]
فـ1963 ملي جات للمغريب، خدمات كريستين ؤستادة ديال تاريخ ؤ لجغرافيا ف طانجا، ؤ مشات موراها تقري لفرانصاوية ف ليسي محمد لخاميس ديال دارلبيضا. داك ليسي كانو فيه بزاف ديال لموناضلين ديال 23 مارس ؤ إلى لأمام.[3]
فـ1972، خبات كريستين جوج ديال لموناضلين يساريين، عبدلطيف زروال ؤ أبراهام سرفاتي، لي كانو بجوج كي قلب عليهم لمخزن. والاكين موراها بعاماين عاودو تشدو بجوج، زروال غبروه ؤ ماعاودش بان ؤ سرفاتي تحكم عليه ب لمؤبد. ؤ بقات كريستين كاتدافع على سرفاتي باش مايطيحش ف نفس لمصير د زروال. فـ1986، تزوجات بيه ؤ هو مسجون باش تقدر تبقا تزورو ف لحبس ديال لقنيطرة، مورما تدخلات فهاد لقضية مرات رائيس لفرانصاوي ميطيرون.[3]
فـ1989، عاونات جيل پيرو ف توجاد ديال لكتاب صاحبنا لماليك، ؤ عطاتو معلومات على لوضعية د حقوق لإنسان ف لمغريب ؤ شي تفاصيل على لحباسات لي كاينين، من بينهم تازمامارت لي مازال ماكان معروف.[3] لكتاب واخا تمنع ف لمغريب، خلا سلطات تعفي على ݣاع لموعتقالين سياسيين، من بينهم أبراهام سرفاتي، ؤ تسد لحبس ديال تازمامارت فـ1991.
ماتت كريستين دوغ فـ28 ماي 2014 فسبيطار طينون ف باريز، ؤ كان عندها 87 عام.[4]
- (1992) Tazmamart : une prison de la mort au Maroc
- (1993) Rencontres avec le Maroc
- (1993) La mémoire de l'autre
- (1993) La Mauritanie
- (1997) La femme d'Ijoukak
- (2000) Lettre du Maroc
- ^ a b c "Christine Daure-Serfaty". bibliomonde.com (ب لفرانساوية). 2014-05-28. مأرشيڤي من لأصل ف 2021-03-09. تطّالع عليه ب تاريخ 2020-07-10.
- ^ Edwy Plenel (2014-05-28). "Christine Daure-Serfaty, résistante et Juste, entre France et Maroc". Mediapart (ب لفرانساوية). مأرشيڤي من لأصل ف 2021-09-21. تطّالع عليه ب تاريخ 2020-07-10.
- ^ a b c Montassir Sakhi (2010-04-14). "Christine-Daure Serfaty : "Je place beaucoup d'espoir en l'USFP"". libe.ma (ب لفرانساوية). مأرشيڤي من لأصل ف 2022-12-09. تطّالع عليه ب تاريخ 2020-07-10.
- ^ Meriama Moutik (2014-05-28). "CHRISTINE DAURE-SERFATY EST MORTE". le360.ma (ب لفرانساوية). مأرشيڤي من لأصل ف 2023-01-28. تطّالع عليه ب تاريخ 2020-07-10.