انتقل إلى المحتوى

فيلم خلعة

من ويكيپيديا
لمرايات كيتخدّمو بزاف ف لأفلام د لخلعة باش يديرو لإتارة

فيلم خلعة هو نوع فني ديال لأفلام كاينوي باش يزرع لخوف و لعيفان ف لي كايتفرج ل أغراض ترفيهية. أفلام د لخلعة ف أغلب لوقات كاتستكشف مواضيع كحلة و تقدر تعالج مواضيع غيبية بحال لوحوش، الجنون، أحدات د مور لقيامة و لفولكلور.[1]

كاين بزاف ديال لأنواع لفرعية د أفلام لخلعة بحال، لخلعة لجسدية، لخلعة-كوميديا، التقطاع، سپلاطر، لخلعة ما فوق الطابيعية و لخلعة النفسية.

لخصايل د هاد النوع[بدل | بدل لكود]

هاد النوع معروف ب التخدام ديالو للإيضاءة، أغلب أفلام د لخلعة مضلمة و أغلب مشاهيد لخلعة فلأفلام كاتكون ف الليل. و لحراكة د لكاميرا حتى هي عندها دور حاسم ف تكوين لخوف ف لي كيتفرج، الكاميرا لمهزوزة ب الراس كاتستخدم ديما، و زيد التخدام د الصوت عندو دور أساسي فتأتير على لموشاهيد، كيعاون ف صناعة لخلعة ف شي لاحاضات و كايخليك متحمس ف شنو غايوقع ف اللقطة الجاية.

لأنواع لفرعية[بدل | بدل لكود]

لخلعة نوع فني فليكسيبل و يقدر يتخلط معا بزاف د لأنواع لاخرى بحال لخيال لعيلمي، هادشي لي كايخلي شي أفلام صعيبة تكاطيݣوريزا.

  • خلعة جسدية : هو نوع بان ف السبعينات كيركز على التحولات لجسدية، ف هاد لأفلام، لجسد كايتأتر بشي طاريقة ب تاعفون باكتيري ولا پارازيت، ف هاد النوع مكايكونش التركيز على الناس ولا لموجتاماع، و لاكين على لأفراد و لإيحساس ب لهوية و لحالة النفسية منين كايشوفو لجسد ديالهوم كايتبدل.
  • خلعة فلكلورية : هاد النوع كايستخدم عاناصير من لفولكلور و لموعتقادات الدينية باش يلصق لخلعة ف لجمهور.
  • خلعة د التسجيلات : هو نوع كايوصل لخلعة ب واسيطة تسجيل (سي دي، كاسيطة) أبرز ميتال هو فيلم (پارانورمال آكتيڤيتي - 2007).
  • خلعة نفسية : هو نوع فرعي ديال لخلعة و التعاويد النفسي كايركز على لحالة الديهنية، لعاطيفية و النفسية باش يخوف، يصدم ولا يخلي لي كيتفرج مامرتاحش، هاد النوع ديما كايتداخل معا لإيتارة النفسية.
  • تقطاع : هو نوع كايكون فيه قتال كايقتل بزاف د الناس، ب آلات ماضية. هاد النوع د لأفلام ديما كايكون ف شي مخيم، مدرسة ولا عوطلة و غاليبا كايكونو لموراهيقين هوما الضاحايا.

عيون لكلام[بدل | بدل لكود]

  1. ^ "Genre Theory: The Horror Film".