علي أومليل

علي أومليل
معلومات عامة
زيادة	25 دجنبر 1940 (84 عام)
لجنسية	لمغريب
لحرفة	ديپلوماسي و فيلسوف
لّوغات لي كيعرف	لوغات أمازيغية و عربية
لفاميلة
شريك	زهور العلوي المدغري

علي أومليل مفكر و حقوقي و ديپلوماسي مغريبي تزاد ف 25 ف شهر طناش 1940 ف قنيطرة.

حياتو

العائلة فين تزاد أومليل ما كانش ف حالها. باه، لي كانت سميتو حمد، كان شيفور. مو كانت سميتها فاطمة السملالي.

ف 1960 شد أومليل ليصونص ف الفلسفة ف الجامعة ديال القاهرة. من بعد رجع للمغرب، ومور ما شد ديبلوم ديال التعليم العالي ف 1962 ف الجامعة ديال محمد الخامس ف الرباط، ولا أستاذ مساعد ف نفس الجامعة، قبل ما يولي انطلاقا من 1981 أستاذ جامعي.

ف اللخر ديال الستينات مشى أومليل يقرى ف باريس وبالضبط ف جامعة الصوربون، فين ف 1977 شد دوكطورة ديال الدولة ف الأدب. كان الموضوع ديال الأطروحة ديالو هو المنهجية ديال ابن خلدون ف المقدمة ديالو، وكان المؤطر ديالو هو روجي أرنالديز، لي كان عالم فرانساوي مختص ف الدراسات على الإسلام. هاد الرسالة ديال الدوكطورة كانت من بعد هي الركيزة ديال كتاب الخطاب التاريخي لي نشر أومليل ف 1979 ف لبنان وخلاه يولي واحد من المختصين الكبار ديال ابن خلدون ف العالم العربي.

ف نفس العام ديال 1979 كان أومليل واحد من المؤسسين ديال الجمعية المغربية ديال حقوق الإنسان، لي كان هو أول رئيس ديالها. عشر سنين من بعد، ف 1989، ساهم حتى ف التأسيس ديال المنظمة المغربية ديال حقوق الإنسان، لي كان حتى هي رئيس ديالها بين 1990 و1993. هاد الشي كامل خلا أومليل يولي بارز حتى ف المجال ديال حقوق الإنسان ف الدول العربية، وف شهر ستة 1997 ولى الرئيس ديال المنظمة العربية ديال حقوق الإنسان لي كان هو واحد من المؤسسين ديالها ف 1983.

نطلاقا من 1998 نخارط أومليل ف السلك ديال الديپلوماسية ديال المغرب، و ف 2000 ولى سفير ديال المملكة ف مصر. ف شهر طناش 2003 عينو الملك سفير ف لبنان.

عل المستوى الفكري كيتحسب أومليل على التيار الحداثي، و هاد الشي يقدر يبان حتى من كونو دخل للاتحاد الوطني ديال القوات الشعبية لي كان أكبر حزب تقدمي ف المغرب من مور ما تأسس ف شهر تسعود 1959. كاتڭول على أومليل المؤسسة ديال النهضة العربية للديمقراطية والتنمية، لي هو عضو ف المجلس ديال الإدارة ديالها، أنو "درس على واحد النطاق واسع العلاقة بين السلطة الفكرية والسلطة السياسية، و التعددية الإجتماعية والتفسيرات الإيديولوجية ديالها وحتى الإتجاهات الإصلاحية ف الفكر العربي ديال دابا.

ف المجموع، أومليل عندو حضاش لكتاب.

كان أومليل مجوج قبل بالنسائية زهور العلوي المدغري، لي عندو معاها جوج بنات سميتهوم بهية و كنزة. و من غير هاد جوج بنات، عندو بنت ثالثة سميتها سامية و جوج ولاد خرين سميتهوم تاشفين و إلياس.