عروسة السما
عروسة الشتا ؤلا عروسة السما (نّݣليزية: rainbow، لعربية: قوس قزح) فينومين ديال لوپتيك لي كيطرا تحت ضروف جوية خاصة. هاد لمصطلح هوّ طرجامة حرفية ديال التعبير لأمازيغي تيسليت ن ؤنزار "ⵜⴰⵙⵍⵉⵜ ⵏ ⵓⵏⵥⴰⵕ" (عروسة الشتا) ولّا "تيسليت ن إڭاوان" ⵜⴰⵙⵍⵉⵜ ⵏ ⵉⴳⵏⵡⴰⵏ (عروسة السما).
السباب فيه هوّ لإنعكاس، التهراس، و التشتات ديال الشعا على لقطرات ديال لما ف السما (شتا)، لي كيفرّق الشعا لبيض ديال الشمش ل لمكوّنات ديالو، بحيت كيبان السپيكتر ديالو.[1]
عروسة السما كتبان على شكل قوس ديال سبعة د اللوان لي هوما ب هاد الترتيب: حمر، ليموني، صفر، خضر، زرق، إنديڭو (زرق غامق) و قوقي. هاد اللوان غير ضاهريين بسباب لقدرات لمحدودة ديال لعين و لمخ د بنادم، حيت ف لواقع السپيكتر كيكون مستامر (ماشي متقطع) و مافيهش لوان محددين. قبل من نيوتن كانو بعض لكتّاب كيهضرو على 5 د اللوان ف عروسة السما، ولاكين نيوتن حيت كان كيآمن بزاف ب الروحانيات، و كيعتابر النمرة 7 نمرة سحرية، أوّل السپيكتر د الشعا ف التجارب ديالو بلي فيه 7 د اللوان.[2]
ف التقافات ديال شمال إفريقيا، سيرتو ف لمغريب، و الجزاير و تونس، فاش كاتكون الشتا كاتطيح و الشمش كاينة، كايتسمى هاد لفينومين ب عرس الديب، لي هوّ طرجامة حرفية من التعبير لأمازيغي "أورار أووشن" ؤلا "تريد أو ؤشن" "ؤلا تامغرا ن أوشن ⵜⴰⵎⵖⵔⴰ ⵏ ⵓⵛⵛⵏ".[3] هاد لمصطلح عندو قصة ف الترات لأمازيغي لي كاتعاود على واحد الديب وصل سن الجواج، ولاكين بقا كيتهرّب منو حيت مابغاش لمسؤولية. الدياب صحابو بقاو كيبززو عليه، فا جاوبهوم بلي ماغادي يتجوج تا تكون الشتا كاتطيح و الشمش طالعة ف السما و تبان عروس السما، حيت حساب ليه بلي هادا شرط تعجيزي ماعمّرو يتحقق. ملي طرا هادشي نيت، ضطر الديب باش يتجوّج داك النهار و تسمى ب "عرس الديب".[4]
- ↑ "Britannica, rainbow". Archived from the original on 2023-06-30. Retrieved 2023-05-20.
- ↑ "Why are there seven colours in a rainbow?". نيو ساينتيست. 2021-09-08. Archived from the original on 2023-08-03. Retrieved 2023-05-20.
- ↑ "عصيد وعرس الذئب". هيسپريس. 2013-02-25. Archived from the original on 2023-05-20. Retrieved 2023-05-20.
- ↑ ""عرس الذيب" و"سن الغزال" أساطير وخرافات تعيش مع الجزائريين". 2021-01-13. Archived from the original on 2022-12-26. Retrieved 2023-05-20.
