طوموبيل
طّوموبيل ؤلا طّونوبيل هو مركوب تيتحرك على ربعة ديال روايض و تايشرويه ناس بزاف باش يسهال عليهم متلا السفر. يقدر يهز لباشار أولا السلعة من بلاصة ل بلاصة خرة ولكن تايحتاج ل شي فيول، بحال ليصانص أولا لمازوط باش يخدم لموطور.[1]
لمخترع لفرانساوي نيكولا جوزيف كونيو كان أول واحد صاوب مركوب د الطريق كيخدم ب فوّار لما ف 1769. ف 1808، ختارع السويسري فرونسوا إيزاك دو ريڤاز أول موطور د لحريق الدخلاني (باش كيخدمو الطوموبيلات ديال ليصانص و لمازوط دابا). الطونوبيلة لعصرية، لي يقدر يصوڭها أي واحد كلا نهار، صاوبها لمخترع لألماني كارل بينز ف 1886.
ف لقرن 20، ولّاو الطونوبيلات منتاشرين بزاف، و كان هينري فورد هوّ لي طوّر الطونوبيلة لي يقدر بنادم لعادي يشريها (ماشي غير لمرفّح). ف لميريكان، الطونوبيلات ضغيا خداو لبلاصة ديال لكرويلات لي كيجرهوم لعودان.[2] ف ؤروپا و بلايص خرين، الطلب على الطونوبيلات ماتزاد بزاف تال مور لحرب لعالمية الجاوجة.[3]
الطونوبيلة كيكون فيها دوزان ديال التحكم ب الصوڭان، الصطاصيوناج، و الراحة د الركاب، زيادة على الضواو. معا مرور الزمان، تزادو ليها مزيّات و وسايل د التحكم، بحال لمراية د اللور، لكليماتيزور، سيستيم د لملاحة، و وسايل د لمتعة بحال الراديو و الليكتور ديال الدياسك.
أغلبية د الطونوبيلات لي كاينين دابا كيخدمو ب موطور د لحريق الدخلاني لي كيمشيو ب حريق مواد مشتقة من لپيطرول، و شي وحدين كيخدمو ب التريسينتي ؤلا ب لهيدروجين. وخا الطونوبيلات د التريسينتي تّختارعو من شحال هادي، ماولاو متاحين ل عموم الناس تال عوام 2000، و كاينين توقعات بلي غادي يوليو رخص من الطونوبيلات د لپيطرول ف جوايه عام 2025.[4][5] التحول ل الطونوبيلات د التريسينتي كيتّعتابر من أهم لخطوات ف لحد من التبدال د لمناخ.[6]
- ↑ "automobile". Archived from the original on 6 أكتوبر 2023.
- ↑ "The Motor Vehicle, 1917". ساينتيفيك أميريكان. Archived from the original on 26 أكتوبر 2022.
- ↑ "Automobile History". www.history.com. Archived from the original on 27 نونبر 2018. Retrieved 2021-08-29.
- ↑ "EV Price Parity Coming Soon, Claims VW Executive". CleanTechnica (ب American English). 2019-08-09. Archived from the original on 14 شتنبر 2019. Retrieved 2019-08-10.
- ↑ "Electric V Petrol". British Gas. Archived from the original on 18 أكتوبر 2019. Retrieved 2019-10-18.
- ↑ "Factcheck: How electric vehicles help to tackle climate change". Carbon Brief (ب الإنجليزية). 2019-05-13. Archived from the original on 25 غشت 2021. Retrieved 2020-07-28.
 |
ويكيميديا كومنز عندا تصاور و معلومات على طوموبيل. |
 هادي زريعة ديال مقالة خاصها تّوسع. تقدر تشارك ف لكتبة ديالها. |
