ضاية إفني
ضاية إفني
| ||
| ضاية طبيعية ف لمغريب | ||
| ||
ضاية إفني من جهة الغربية
| ||
| لمنطقة | ||
| دولة | لمغريب | |
| لجهة | سوس ماسة | |
| لإقليم | تارودانت | |
| لجماعة | توبقال | |
| أقرب دوار | امسوزارت | |
| لجغرافيا | ||
| لمناخ | قاري | |
| لوحدة تضاريسية | لأطلس لكبير لغربي | |
| روافد | واد محاط | |
| الخصائص | ||
| لعلو عى سطح دلبحر | 2500 ميترو | |
| لمساحة | 26 كتار | |
| طول | 870 ميترو | |
| لعرض | 490 ميترو | |
| الصبيب | 300 ميترو فالتانية | |
| لغرق | 30 + ميترو | |
| لإحداثيات | 31.03055 / 7.88480- | |
| ||
بحيرة إفني من القمر الإصطناعي
| ||
ضاية إفني (ب لأمازيغية: ⴰⴼⵍⵎⴰⵎ ⵏ ⵉⴼⵏⵉ، أَگْلْمَامْ نْ ئِفْنِي) هي ضاية اللون ديالها خضر، كاينة ف لمنتزه لوطني ديال توبقال، ف لجماعة ديال توبقال تيفنوت ف لمغريب، وسط الجبال د لأطلس لكبير، لمناخ ديالها قاري، ؤ تاطل عليها أعلى قمة ف شمال إفريقيا لي هي قمة جبل توبقال، هادا علاش لإنحدار ديال السفوح د ضّاية قوي بزاف، أما لموضع ديالها جا ف اللخر ديال لواد بحال شي سد، كيف ما كاتعتابر من أعلى الضايات ف لعالم، ب رتفاع 2500 متر تقريبا، أما لمساحة ديالها هي 26 هيكطار تقريبا، 870 ميترو ف الطول، ؤ 490 ف لعرض، أما الصبيب ديالها تايوصل ل 300 ميترو ف تّانية، ؤ لغرق تايفوت 30 ميترو.[1][2][3]
على حساب محمد شفيق، كلمة "إفني" ف لأمازيغية براسها كاتعني "ضاية".[4]
ضاية إفني كاينة ف لمنتزه لوطني ديال توبقال ف لأطلس لكبير لغربي، بضبط فتيفنوت لجماعة ديال توبقال، إقليم تارودانت، جيهة سوس ماسة، قريبة ل دوار أمسوزارت.[2]
كاينة ضاية إفني ف اللخر ديال لڨالي محاط، ف منطقة تضاريسها جبلية صعيبة. التشكل ديال الضاية تايرجع لكتر من 245 مليون عام، ؤ ضايرين بيها سفوح لإنحدار ديالهم قوي بزاف من ڭاع لإتجاهات، من غير لغرب لي محلولة منو على لڨالي محاط بواحد لمسطح كبير ديال لحجر، ؤ تاطل عليها مباشرة أعلى قمة ف شمال إفريقيا وهي قمة جبل توبقال 4167 ميترو، جنب على قمة ووانوكريم و غيرها.[2][3]
التاريخ لجيولوجي د لمنطقة تايرجع ل زّمن جّيولوجي اللول، قبل كتر من 245 مليون عام.[3]
كاين ختلاف ف لأراء بخصوص طريقة تشكل هاد الضاية، ف دراسة دارها پول بوني Paul Bonet عام 1919، رجّع التشكل ديالها ل أسباب بركانية، لكن كاين تفسير أخر تايقول بلي لمنطقة شحال هادي عاشت نهيارات كبيرة د لحجر سدات لمجرى د لڨالي، ؤ بتالي تكونات الضاية فاللخر ديالو بحال شي سد طبيعي[2] كاين تفسير تالت تايقول بلي لمنطقة شحال هادي تجمع فيها بزاف ديال لاڭلاص بسبب لمناخ لي كان بارد، ؤ فاش داب هاد لاڭلاص، عطانا هاد الضاية.[3]
صَّبيب ديال ضّاية تايوصل تا ل 300 ميترو ف تّانية، و هي السبب ف التغذية ديال بزاف د لعيون لي كاينة ف لمنطقة، ؤ هادشي لي خلى هاد لمنطقة يكون فيها لإستقرار د الناس، أما لما لي تايغذي الضاية تايجي ب الدرجة اللولة من الدوبان ديال التلج.[3]
هاد لمنطقة فيها مناخ قاري، كاطلع فيه لحرارة تال 45 درجة، ف الصيف ؤ كاتهبط لتحت الزيرو ف الشتا، لي تايخلي ضّاية تتجمد شي مرات.[3]
على حساب ماتايعاودو الناس ف لمنطقة، هاد الضاية تايزوروها لبنات ديال الدواور لي ف لمنطقة، لي بغاو يتزوجو، تايعومو فيها، من بعد تاياخدو حجرة صغيرة من الضاية ؤ تايطليوها ب لحنة، ؤ تايغلفوها بالشراوط على شكل مونيكة، ؤ تايلوحو بيها فوق راس لبنت لي بغات تتزوج، ؤ من بعد تايعطيوها ليها، باش تزيد لخصوبة ديالها. كاينة واحد لقصيدة ف لمنطقة ب لأمازيغية جات على لسان الضاية هادي هي الطّرجامة ديالها ل دّاريجة:
سمعو يا لبنات، سمعو يا لبنات
شتنبر هاهو جا يا لبنات
واهلي على لي ماتزوجاتش فيه
غاتبقا معلقة تال لعام الجاي
شوي ديال الصوف ف الصميقلي
حسن من ڭربة ديال لفلوس
هاد ضاية عزيزة على لعشاق ديال الرياضات د الجبل ف لمغريب ؤ على برا، واخا التضاريس الصعيبة لي ضايرة ب الضاية، لكن الجهة لغربية فيها منبسط، ؤ فيه شي خربات داروهم الناس د المنطقة، تايجمعو فيهم لبهايم، ولا تايقدمو فيهم خدمات ل سّياح، خصوصا بلي بزاف ديال الناس تايعجبهم يخيمو فهاد لبلاصة، سيرتو بعد ما صاوبو الطريق ديال الطوموبيل لي كاتوصل تا ل ضّاية من الجيهة د الشرق، على الدوار ديال أمسوزارت لي فيه بزاف ديال لخدمات د السياحة، بما فيها لؤبيرجات و ليجيت.[ماواضحش] هاد الضاية كاتعتابر محطة مهمة ل نّاس لي بغاو يطلعو ل لقمة ديال توبقال من الشرق، هادشي كامل تايحرك لإقتصاد ديال لمنطقة شوي، خصوصا فالشتا، حيت تايجيو الناس يشوفو الضاية فالتلج.[2][3][5][6][7]
لعومان فهاد الضاية صعيب ؤ خطير، حيت غرقو فيها بزاف ديال الناس، بما فيهم لمحترفين.[8]
كتر من عشرة ديال الدواور فهاد لمنطقة تايستافدو من لما ديال هاد الضاية، لي دايرة بحال شي سد طبيعي تايوفر لما ل نّاس على قبل لفلاحة. حيت التضاريس ف لمنطقة صعيبة، الزراعة ف لمنطقة كاتدار ف السفوح على شكل تريبيل.[ماواضحش] الناس ديال هاد لمنطقة كاملين شلوح من قبائل ايت تيفنوت، ؤ معروفين ب الضيافة ديالهم. ؤ اللغة لي كاتستعمل ف لمنطقة هي اللغة لأمازيغية. بجنب الزراعة و سّياحة، الناس ديال هاد لمنطقة تايعتامدو بشكل كبير على السرحة، خاصة لمعيز.[3]
- ^ "Google Earth". earth.google.com. مأرشيڤي من لأصل ف 2023-10-16. تطّالع عليه ب تاريخ 2022-08-24.
- ^ a b c d e "بحيرة إفني - جبل توبقال". Explore Agadir Souss Massa (ب لعربية). 2020-07-26. مأرشيڤي من لأصل ف 2023-10-07. تطّالع عليه ب تاريخ 2022-08-24.
- ^ a b c d e f g h "AmouddouTV 07 Lac d'Ifni / أمودّو 07 Error: The retired template [[موضيل:!|{{!}}]] has been transcluded; see [[mw:Help:Magic words#Other]] for details. To fix this, use only the code {{[[MW:Help:Magic words #!|!]]}} to generate the | character. [[تصنيف:Pages which use a template in place of a magic word|Mضاية إفني]] بحيرة إفني" (ب لعربية). 2020-05-25. مأرشيڤي من لأصل ف 2023-10-07. تطّالع عليه ب تاريخ 2022-08-28. line feed character in
|title=at position 281 (معاونة); URL–wikilink conflict (معاونة) - ^ محمد شفيق. الدارجة المغربية، مجال توارد بين الأمازيغية و العربية. ص. 52.
- ^ "الجمال في بحيرة إفني". هيسپريس (ب لعربية). 2022-02-28. مأرشيڤي من لأصل ف 2023-10-07. تطّالع عليه ب تاريخ 2022-08-24.
- ^ wael.rimawi. "هنا رابعة: حوار وطني في مسرح الجريمة". alaraby.co.uk (ب لعربية). مأرشيڤي من لأصل ف 2023-10-07. تطّالع عليه ب تاريخ 2022-08-24.
- ^ "فيديو: بحيرة إفني.. موقع سياحي يحظى بشهرة عالمية". دوزيم (ب لعربية). مأرشيڤي من لأصل ف 2023-10-07. تطّالع عليه ب تاريخ 2022-08-24.
- ^ "تارودانت .. "بحيرة الموت" تخطف روح شاب في العشرينيات من عمره". al3omk.com (ب لعربية). مأرشيڤي من لأصل ف 2023-10-07. تطّالع عليه ب تاريخ 2022-08-24.
