صلوڤاكيا
صلوڤاكيا، رسميا لجمهورية د صلوڤاكيا (بالصلوڤاكية: Slovenská republika) هي بلاد ماكاطلش على لبحر جات ف لوسط د أوروپا. تاتحدّها من الشمال لغربي التشيك، من الشمال پولونيا، من الشرق أوكرانيا، من لجنوب هنݣاريا، و من لجنوب لغربي لوطريش. لأغلبية د لأراضي د صلوڤاكيا هي جبال، و لمساحة لكاملة د لبلاد هي 49.000 كم مربع.
دخلو الصلاڤيين للبلاصة اللي فيها صلوڤاكيا ما بين لقرن لخامس و السادس، و أسسو بزاف د الدول صغيرة تما. ف لقرن لعاشر، ولات لبلاصة تابعة للمملكة د هنݣاريا، و اللي دخلاتها معاها ف لإمبراطورية النمساوية لهنݣارية. من مورا لحرب لعالمية اللولا، تفككات لإمبراطورية و تأسسات الدولة د تشيكوصلوڤاكيا، اللي تبعات النضام الشيوعي من مورا لحرب لعالمية التانية. ف 1989 وقعات تورة اللي طيحات النضام الشيوعي ف لبلاد، و ف 1993، تقسمات لبلاد و خرجو منها جوج بلدان: لجمهورية د التشيك، و لجمهورية د صلوڤاكيا.
تيسكنو ف صلوڤاكيا تقريبا 5.5 مليون د الناس و لعاصمة ديالها هي براتيسلاڤا. اللغة الرسمية ديال لبلاد هي الصلوڤاكية، و لفلوس اللي كاتخدّم هي لأورو. النظام د لحكيم هو جمهورية برلمانية. صلوڤاكيا داخلة ف بزاف د لمنضمات دولية بحال لأمم لمتحدة، ليتيحاد لأوروپي، الناطو و لمنضمة د التعاون ليقتيصادي و التنمية. صلوڤاكيا معروفة بالصناعة ديال الطوموبيلات، و كايتصنعو فيها كتر من مليون طوموبيل كل عام.[1]
- ↑ "سلوفاكيا تنتج أكثر من مليون سيارة في 2015 - إرم (2016)". Archived from the original on 2022-05-27. Retrieved 2021-04-06.
 |
ويكيميديا كومنز عندا تصاور و معلومات على صلوڤاكيا. |
 هادي زريعة ديال مقالة خاصها تّوسع. تقدر تشارك ف لكتبة ديالها. |
