شاروخان
شاروخان، و سميتو كاتكتب ب لأوردو شاه روخ خان (خلاق ف 2 نونبر 1965 ف ديلهي - لهيند)، ممتل و منتج د سّينيما هيندي. هو من أكبر و أشهر لممتلين ف تاريخ السينيما لهندية.
حياتو[بدل | بدل لكود]
شاروخان مسلم و كبر ف عائيلة من الطبقة لمتوسطة ف لعاصمة د لهند. قرا لقتيصاد و التواصل ف الجامعة و فيها بدا كايلعب ف فراقي د لمسرح. بدا التمتيل ف مسلسلات د التلفزة و بان فيهوم، الشي اللي خلا منتجين ف بومباي (لعاصمة د السينما ف لهند) يعيطوليه باش يلعب أفلام ف السينيما.
أول فيلم لعب فيه كان ديڤانا ف 1992 اللي حقق نجاح كبير و خدا بيه جائزة أحسن ممتل طالع. ف ظرف عوام قليلة، قدر شاروخان يولي أكبر نجم ف بوليود و وصلات الشهرة ديالو ل بلدان آخرا ف لعالم و ب الدات ف الدول لعربية.
لأدوار اللولة ديالو كانت مختالفة على لأدوار اللي تعرف بيها من بعد: كان كايلعب بزاف أدوار ديال لبطل لخايب/الشرير بحال ف لفيلم د رام جاني. من بعد رسخ النمط ديال البطل لمحبوب عند لجمهور و قدر يبان ب شكل مختالف ف كل فيلم واخا لعدد لكتير د لأفلام اللي متل.
من أهم لأفلام ديالو ف تسعينات لقرن 20 كانت بازيݣار، دارّ و ب الدات ديلڤالي دولهانيا لي جايينݣي، اللي تّعرف عند لجمهور لمغريبي ب سميت "عودة العاشق المجنون" و اللي ولّا من الخالدات د السينيما الهندية و تّدارو بزّاف د التلميحات ليه ف لأفلام لّي جات من بعد د الشاروخان.
من بعد جات لمرحلة ديال الكوميديات الرومنسية لعالمية بحال موهابّاطين، كوتش كوتش هوطاهي و كابي كوشي كابي غام.[1]
عيون لكلام[بدل | بدل لكود]
|
تقدر تزيد شوف بزاف د تّصاور و لمعلومات ديال Shahrukh Khan ف ويكيميديا كومنز. |