زوهري
الزوهري ؤلا الزوهرية ف لمعتقدات السحرية ف لمغريب هوّا واحد الطفل دكر ؤلا نتوة لي كيتوفّرو فيه مجموعة د لمواصفات لجسدية، كاتدل بلي راه ولد الجنون، على حساب لمعتقد ديال بعض الناس، و بلي يقدر يعاون ف لبحت و لماخدة د لكنوز لي مخبّيها و حاميها ڭنسو، و طقوس خرة د السحور.[1] من بين لمواصفات ديال الزوهري هوّا بلي ماكيقدرش يشوف من بعيد و كفوف يدّيه و لسانو مفروقين ب لعرض. يقدرو يكونو فيه مواصفات خرين، بحال شعر زعر ؤلا حمر، عينين زورق ؤلا خوضر، ؤلا عينين مامتناسقينش.[2]
الزوهري، على حساب لمعتقد، يقدر يكون ولد ديال الجنون لي خدا بلاصت رضيع بشري فاش كان صغير، ؤلا إنسان تّولد ب مواصفات و قدرات خارقة كاتخليه يتواصل معا عالم الجنون. الناس لي كيمارسو السّحور باش يلقاو كنز ديال الجنون كيستاعنو ب فرقة ديال الطّلبا كيقراو لقرآن، و ب زوهري لي كيعاون تا ف لهزان د لكنز، حيت كيعتاقدو بلي ماكيخافش من ڭنسو و هوّا بوحدو (ؤلا بوحدها) يقدر يقيس لكنز بلا مايتعرض ل نتيقام د مّالينو. ف بزاف د لحالات السحارا كانو كيخطفو دراري صغار فيهوم مواصفات ديال زوهري بش يديرو هاد لعملية، لي كاتسالي ب دبيح الدري ؤلا الدرية فوق لكنز كا قربان ل لحراس الجنون. بشكل عام، الدم ديال الزوهري كان كيدخل ف عدد ديال الطقوس السحرية لمغريبية لقديمة.[2] هاد لقضية ف لقديم كانت ف لغالب مرتابطة ب معتقدات وتنية ديال تقديم قرابين بشرية باش تهدّن و تسترضي لأرواح، ولاكين مابقاتش ؤلا قلالت ف لممارسات لعصرية.[1] وخا داكشي كاينين جرائم ديال تعدي و خطف و قتيلة د الدراري الصغار لي طراو ف لمغريب، لي يقدر يكون عندهوم رتيباط ب هاد لمعتقدات، لي باقة ماغبراتش ف بعض لمناطق بشكل كامل.[3][4][5]
لأصل د لكلمة[بدل | بدل لكود]
تختالف على لأصل ديال كلمة "زوهري". شي وحدين ڭالو بلي جات من زهر حيث الدري الزوهري تيكون مزهار ب الصفات والقدرات ديالو على بنادم العادي، و شي وحدين ڭالو بلي الكلمة مهزوزة من الزوهار وهو سمية واحد من الكتوبا لي تاتشرح سحر الكابالا اليهودي.
الطبيعة ديال بنادم الزوهري[بدل | بدل لكود]
ختالفو الناس ف الطبيعة ديال بنادم الزوهري. فا يقدر يكون:
- شخص لبسو جن منين تولد وبقا معاه حياتو كاملة.
- ماشي بنادم أصلا، وهو راه جن تبدل ببنادم منين تزاد.
- بنادم عندو طاقة روحية كبيرة لي تاتخليه يوصل مابين عالم بنادم و عالم الجنون.
ف لأداب و لفنون[بدل | بدل لكود]
- 2022: "طريق لخلوة" فيلم فرانساوي مغريبي، من إنتاج ماري ڭوتمان، و سيناريو أيوب لهنوب، كيعاود لقصة ديال "رحال" لي كيعتق دري زوهري سميتو "طاهر" كان غادي يتدبح ف طقوس لبحت على كنز، و لمغامرة ديالهوم بجوج.[6]
عيون لكلام[بدل | بدل لكود]
- ^ a b مصطفى واعراب (2003). المعتقدات السحرية في المغرب - الجان والتنقيب عن الكنوز. ص. 238. مأرشيڤي من لأصل ف 2020-08-09. تطّالع عليه ب تاريخ 2022-12-26.
- ^ a b "Zouhri Children and Witchcraft: Morocco's Darkest Beliefs". 2 شتنبر 2013. مأرشيڤي من لأصل ف 2022-10-17. تطّالع عليه ب تاريخ 2022-12-26.
- ^ "Au Maroc, le kidnapping des «enfants zouhris» et le mythe d'«extraction des trésors»". 2 أكتوبر 2020. مأرشيڤي من لأصل ف 2022-10-19. تطّالع عليه ب تاريخ 2022-12-26.
- ^ "9أشهر ولم يتم العثور عليه بعد.. اختفاء طفل "زهري" بزاكورة في ظروف غامضة!". 1 أكتوبر 2020. مأرشيڤي من لأصل ف 2022-12-26. تطّالع عليه ب تاريخ 2022-12-26.
- ^ "Le trésor maudit". 23 ماي 2005. مأرشيڤي من لأصل ف 2022-12-26. تطّالع عليه ب تاريخ 2022-12-26.
- ^ "LE CHEMIN DES SUSPENDUS". مأرشيڤي من لأصل ف 2022-12-26. تطّالع عليه ب تاريخ 2022-12-26.