زاوية الشيخ

زاوية الشيخ
‫زاوية الشيخ‬ (ar) ⵣⴰⵡⵉⵜ ⵛⵉⴽ (tzm)
لبلاصة
لبلاد	لمغريب
لإقليم	إقليم بني ملال
السكان
شحال دالسكان	25,088 (2024)
شحال دلفاميلات	6,614 (2014)
معلومات خرين
الرمز لجغرافي	6545818

زاوية شّيخ مدينة مغريبية و جماعة ترابية حضرية كاينة ف إقليم بني ملال، جهة بني ملال خنيفرة، ساكنين فيها 25388 واحد، على حسب لإحصاء لعام 2014.

تعليم

• نسبة لأمية (نّاس لّي ما كايعرفوش يقراو ولا يكتبو) : 36,3%
• نسبة سّكان لّي قاريين فوق الليسي (ليسي و جامعة): 15,9%

قتيصاد

• نسبة نّاس نّشيطين (لّي يقدرو يخدمو): 40,9%
• نسبة لبطالة (نّاس لّي ما خدامينش و تايقلبو على خدمة): 27,3%
• نسبة نّاس اللي خدامين ف دّولة : 14,9%
• نسبة نّاس اللي خدامين ف لپريڤي:44,9%

التاريخ

زاوية الشيخ كانت زاوية ديال سيدي أحمد بن ناصر، فين كانو كيجتمعو الأتباع ديالو باش يقراو القرآن ويسمعو لحكايات لصوفية. وكانت عندها علاقات مع زاوية الأم ديال تامكروت فزاكورة. وحتى لدابا باقيين بزاف ديال عائلات الناصري ساكنين تما.

مدينة زاوية الشيخ هي مركز قبيلة آيت أم البخت، اللي ك تتكون من 4 فخدات:

• آيت محى
• آيت عبد النور
• آيت كضيف
• آيت كودي

بحال جميع المراكز الدينية، بزاف ديال العائلات جاو سكنو حد الولي الناصري، وبدات المدينة كتكبر شوية بشوية

لمواقع ديال الزاوية

موقع لمركز «إغرم نواسيف» التاريخي

(إغرم نواسيف واحد لكلمة أمازيغية كتعني: لقصر ديال الواد او دشر الواد. )

كيتعتبر مركز «إغرم نواسيف» اللي جا نيشان على واد أم الربيع هو لمركز ديال "أيت هودي". هاد لبلاصة معروفة تاريخياً هادي قرون، وكتعتبر من أهم لمراكز ف المنطقة حيت عرفات واحد لازدهار كبير. فشي وقت من التاريخ ديالها، كانت كتشبه مدينة فاس فالتجارة والصناعة ولعلوم، وكانت كتجيها لقوافل التجارية من فاس، مراكش، بجعد، تافيلالت ومن بزاف ديال الجوايه. كانت فيه دار السكة وصناعة ديال لبارود، ولمواد الأولية كانت كتجي من مناجم "سيدي يحيى وساعد" فجبال لأطلس لمتوسط أو من لمناجم "أزغار" لقريبة.

من لأخبار لمهمة اللي كتعاود على "دشر الواد"، هي لهجرة ديال بزاف من لمورسكيين اللي هربو من لأندلس (جنوب إسبانيا دابا) ف لبدية ديال لقرن 15 ميلادي، وجابو معاهم لمهارات بحال صناعة ديال الجوهر (الحلي)، النسييج، الزليج ولفسيفسا. لمنطقة عرفات علماء كبار عبر التاريخ، بحال لفقيه القرواوي اللي كان حافظ لـ "سيدي خليل" وقراه قدام الملك الحسن الأول ف لخر ديال لقرن 19. وكاين عاوتاني لفقيه السرغيني اللي كان كيقري لأمراء ففاس؛ هاد لفقيه كان عزيز عليه لبحث لعلمي، قلب على كتاب "العشماوي" ففاس وما لقاهش، وقالوا ليه راه كاين فهاد لمنطقة بضبط، وجا لتم ولقاه، وقرر يستقر فالمنطقة حيت عرف قيمتها العلمية. هادشي كامل كيبين لأهمية ديال زاوية الشيخ فالتاريخ ولعمران، ودابا ما بقى من هاد الحضارة غير لحجار لكتشهد على لماضي.

موقع مركز أوعبيد الله التاريخي

مركز «أوعبيد الله» جا فواحد لبلاصة متميزة فحضن ديال جبال لأطلس لمتوسط، وكيطل على مدينة زاوية الشيخ. هاد الموقع كان كيصلح للناس اللي بغاو يتفرغو لطلب العلم، والتأمل، والبعد على لملذات ديال دنيا.

هاد المركز عرف وجود بنادم من عصور قديمة، وكانت عندو علاقة بمراكز حضارية أخرى بحال «أم ورفروفن» ف لفوق ديال جبل، «دشر الواد» و«أنكَال». كان أوعبيد الله بحال منارة للعلماء اللي جاو ليه من كاع لقنوت فالمغرب : من تودغة (ورزازات)، إداوسملال (سوس)، قبائل ولاد دليم (الساقية الحمراء ووادي الذهب)، وتافيلالت. فوقت لمرينيين، كان كيتسمى "لقصبة ديال لمرينيين". والناس ديالو عبر التاريخ كانو معروفين بالتشجيع ديال الطلبة ولعلماء، كانو كيخدمو فالفلاحة والكسيبة باش يوكلوا الطلبة ، وكانوا كيحبسو (يوقفو) الجنانات ولأراضي ديالهم باش يمولوا طلب لعلم. هاد النشاط بقى مستمر حتى للستينات ديال القرن العشرين. ومن أهم لعلماء اللي مدفونين تما كاين "سيدي عبد الرحمان بوزيان".

موقع مركز انكَال التاريخي

مركز «انكَال» جا فالهضبة اللي تحت الجبل، وهو لمركز ديال قبيلة "أيت بوملال". هاد لبلاصة معروفة من بكري بالبنيان وفيه مدافن قديمة بزاف. عرف حركة علمية كبيرة، وأكبر دليل هو الجامع لعتيق ديالو اللي تخرجو منو بزاف ديال الرجال د لعلم و لفكر، بحال: سيدي واكريم ، سيدي اوحماد، سيدي لفروكي، وأخيراً سيدي أحمد أموكَان. هاد لفقيه لجليل جا من "فركلة" بقصر أسرير، وقرا على يد أكبر فقهاء تافيلالت وهو لمجاهد الحاج العربي ابن المحاج البدوي الأنصري التجموعتي. الطلبة كانو كيفتخرو حيت قراو عندو، وكانو كيقصدوه من بزاف ديال لبلايص فالمغرب، هادشي اللي كيبين لمكانة لعلمية ديال سيدي احماد اموكَان.

موقع مركز تاسْضرت التاريخي

(تاسضرت كلمة أمازيغية كتعني "الهبطة" نظراً لصعوبة ديال التضاريس)

مركز «تسضرت» أو «تمجوضين» (اللي معروف دابا بتبيهيت) كان مركز لحراسة لقوافل من الشفارة، وكانو الناس ديالو كياخدو لخلاص على هاد لخدمة (اللي كان كيتسمى قديماً "الماكوس"). هاد لموقع أتري قديم بزاف و اللي جا فوق لهضبة ، والآثار ديال لبني والمقابر لقديمة بحال مقبرة "عجلاين" كتشهد على هادشي.

وعلى ذكر "عجلاين"، كاين تما واحد الضريح باقي كيبان لدابا بنفس السمية. كيعاودو عليه الرواة بلي فداك لموقع وقعات معركة قوية بين جوج جيوش. وفوسط لحرب والروينة، تسرقو لخزاين ديال واحد لملك، وكانو فيها تحف غالية بزاف ، منها جوج تماثيل ديال "عجول" مصنوعين من الذهب. كيقولو بلي اللي سرقهوم او مخرهوم راه دفنوهم فوسط المقبرة، ومن تما جات السمية ديال "عجلاين". لمنطقة كيعاودو عليها بلي عامرة بكنوز الذهب ولفضة اللي تدفنات فايام الحروب والفتن اللي عرفها "طريق السلطان". هاد الأرض دازو منها ملوك وعلماء كبار بحال "أبو الوليد ابن رشد" (AVEROES)، صاحب كتاب "تهافت التهافت" و"فصل المقال". هاد لمفكرين كانو كيدوزو من هنا إما مشيا على الرجلين أو على الدابة، وكانو ضروري كيوقفو باش يرتاحو فهاد لمراكز، وأرض "الفيض" (كيف كانت كتسمى) كانت أحسن بلاصة للاستراحة من عياء السفر.

موقع مركز بوالصومعت التاريخي

مركز «بوالصومعت» كان شاد مساحة جغرافية كتبدا من الشمال بـ "دشر الواد" و"بوسلمان"، ومن "سيدي عيسى" حتى لـ "بوالدليت" و"تمزكيدة" جنوباً. ومن الشرق "أوعبيد الله" و"أيت شباب" حتى لمنابع "تمسكورت" و"تفسورين"، وهابط مع وادي "أوبشا" حتى لسهل "بوحابو" وواد "أم الربيع".

هاد لمدينة لأثرية عرفات واحد لعمران كبير من لعهد لموحدي (القرن 12 ميلادي) وبقى لإشعاع ديالها حتى لمنتصف القرن 17. كانت هي لبلاصة ديال قبيلة "أيت ايمور" اللي ولات قوية بزاف وبدات كتهدد لأمنديال لقوافل وطريق السلطان. هادشي خلى واحد من الملوك فلقرن 17 يحاربهم بجيش كبير، هدمو لمدينة ديال "بوالصومعت" كاملة وسدوا لعيون ديال لماء باش ما يرجعوش ليها، ورحلو لآلاف ديال لعائلات منهم لـ " حوز مراكش" جيهت "تحناوت".

دابا ما بقى من هاد المدينة غير لبقايا ديال الحجر، الياجور، أو طروفة ديال الزليج ولفسيفسا اللي كانت كتجي من لأندلس أو فاس. ومن بين لآثار اللي باقة باينة، كاين اللي كيشبه لصومعة ديال جامع فوسط واحد الجنان كيتسمى «أورتي نيت أوشرو»، وشي حفريات أخرى جيهت وادي أوبشا. وكيتقال بلي "الصومعي" المشهور فبني ملال، الأصل ديالو كيرجع لـ «بوالصومعت» فزاوية الشيخ.

.

السكان

زاوية الشيخ كان فيها ف2014 تقريباً 42.600 نسمة.

الفلاحة

زاوية الشيخ عندها أراضي خصبة كتوفر ليها ثروة فلاحية كبيرة. كيدوزو منها جوج ديال الوديان كبار:

• واد أم الربيع
• عين تامدة

نشاط لفلاحي رئيسي فالمدينة هو استغلال الزيتون، وزيد عليه تربية الماشية وزراعة الشعير والقمح والخضر.

السياحة

رغم نقص لبنيات التحتية السياحية، فالمدينة والمناطق اللي حداها كاينين بلايص زوينة للزيارة، منهم:

• شلالات بوگنداز، على بعد 15 كلم تقريباً.
• أگلمام، ومعناها "البحيرة" بالأمازيغية، وهوا مكان طبيعي فجبال ديال المنطقة.

مصادر

هادي زريعة ديال مقالة خاصها تّوسع. تقدر تشارك ف لكتبة ديالها.

ويكيميديا كومنز عندا تصاور و معلومات على زاوية الشيخ.