رحلة فضائية

لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.

الصاروخ پروتون غادي ل لمحطة الدولية ديال لفضاء.

الرحلة لفضائية ولا التسافيرة للفضاء هي واحد الرحلة پالستية ل لفضاء البراني. و كاين منها جوج ديال النواع؛ لعامرة (فيها بنادم)، و لي ماشي عامرة. و كيتعتابر يوري ڭاڭارين من لإتيحاد سوڤياتي أول إنسان ف الستاريخ كيدير رحلة فضائية. و من بين الرحلات لفضائية لعامرة كاين؛ برنامج أپولو لميريكاني د لهبوط على لقمر، و لبرامج ديال رحلات لمكوك لفضائي، و برنامج سايوز الروسي د رحلات لفضا، و عاد زيد عليهم لمحطة الدولية د لفضاء دابا. أما بالنسبة للرحلات لفضائية لي ماشي عامرين، كاينين لمسابر لفضائية لي كتخرج على لأرض، و كاينين لأقمار صطيناعية لي كادور على لارض. و كتصاڭ الرحلات لفضائية إما ب "طيلي روبوتيكس" (روبوات من لبعد) ولا كتكون مستاقلة بشكل كامل.

الرحلات د لفضاء كتستعمل ف التقلاب ف لفضاء، ف النشاطات د التجارة، السياحة لفضائية، لأقمار صطيناعية، و حتا ف لأرصاد الفضائية، و ف التجسس، و الرصد ديال لارض.

ف لعادة، كتبدا الرحلة لفضائية ب الطليق ديال الصاروخ، الشي لي كيعطي للرحلة دفعة أولية باش تغلب لقوة د لجاذبية دلارض. فاش كتوصل لمركبة للفضاء كتبقى ف لبلاصة ديال الدراسة، شي مركبات كيبقاو فلفضا ل وقيتة ماشي محددة، و كيتهرسو شي وحدين ف الرحلة د الرجوع فاش كيدخلو ف لغلاف د الجو، و كيصطادمو شي وحدين خرين ب شي سطح قمري ولا كوكبي.

التاريخ

كيتعتابر لعالم روسي قسطنطين تسيولكوڤسكي أول واحد شاف بشكل واقعي ف لفكرة ديال التسافير للفضاء، فاش لاح كتابو ف عام 1903، و سماه "الإستكشاف د الفضاء ب لماكينات ديال رد الفعل". ولكن أفكارو مانتاشراتش برا د روسيا. و منبعد ولا التسافير ف لفضاء ممكن ف لهندسة مور ما نشر لعالم روبرت ڭودارد ف عام 1919 ورقة علمية و سماها "الطرقان د لوصول ل علوات طالعين"، و ناقش فيها لفيكرة ديال لإستيعمال د صاروخ ب لفيول سايل. و زاد تبت ف اللابو بلي هاد الصاروخ غادي يقدر يخدم ف لفضاء عادي، ولكن لغالبية د لعولما متيقوهش ف ديك لوقيتة. و راه وخا داكشي ساهمات الأبحات ديالو بزاف ف الرحلات د لفضاء. و ف عام 1944 قدر أول صاروخ يوصل للفضاء، لي كان هو الصاروخ لالماني فاو-2. و ف عام 1957 سيفط لإتيحاد سوڤياتي أول قمر صطيناعي سپوتنيك 1 و كيتعتابر أول جسم كيتسيفط للفضاء، و ف عام 1961 قدرو السوڤياتيين يسيفطو أول راجل للفضاء ولي كان هو يوري ڭاڭارين. و حتا ل دابا كاتعتابر الصوارخ هي لوسايل ديال لمسيفطة للفضاء، ف لوقيتة لي ماقدراتش الطيارات مولات الماطر النفاتة توصل ليه.

لمراحل

الطلقان

الصاروخ ساتورن على لمنصة ديال الطلقان.

كتعتابر الصوارخ هي لوسايل لوحيدة ديال لمسيفطة للفضاء لي كاينة دابا، و ماتبناتش لحد الساعة شي وسايل خرة من غيرها. ف لعادة كتبدا لعملية د الطلقان من لمرسا لفضائي (كوصموضروم). لي فيه لمعدات ديال عملية الطلقان لعمودية، و من مدرجات ديال التقلاع و لهبوط ديال الطيارات. و كتواجد هاد لمراسي ف لبلايص لي بعيدة على الناس على ود الصداع و السلامة.

منصة الطلقان، كتكون عبارة على هيكل تابت مديور باش يطلق لمركبات لمجوقلة، و كيتكون من برج د الطلقان و خندق د لعافية، و كتكون ضايرة بيهم حتا لمعدات لي تيستعملوها ف عملية الطلقان باش يخليو الصاروخ واقف، و يزيدو ليه لفيول، و يصلحوه. و يقدر يوصل لوزن ديال صاروخ قبل لعملية د الطلقان لمئات د لأطنان، و وصل لوزن ديال لمكوك د لفضا تاع كولومبيا ف رحلة الطلقان ديالو (STS-1) لـ2030 طن (2.030.000 كيلوڭرام).

لوصول للفضاء

كيتعتابر لفضاء لبراني هو أي حاجة فاتت لخط ديال كارمان، لي بعيد على سطح دلارض بـ100 كيلوميتر. أما لولايات لمتاحدة كتقول بلي لفضاء لبراني هو أي حاجة فاتت 80 كيلوميتر على سطح ديال لأرض.

و كايتعتابرو الصوارخ هي لوسايل لوحيدة باش يوصل بنادم للفضا. فلوقيت لي مكيقدرش فيه لموطورات ديال الطيارات يوصلو للفضاء بسباب نقص ديال لوكسجين.

دوز على لمدار

باش يمشي لواحد للرحلات لقمرية ولا لكوكبية ماشي ضروري يدوز على شي مدار. بحال لمركبات روسية لي كانت كتعلي بزاف و بلا ماتدوز على حتا مدار. و حتا نازا كانت ف اللول كتسيفط رحلاتها للقمر نيشان بلا ميدوزو على حتا شي مدار، ولكن فاش لقات بلي هاد الطريقة كتاكل الفيول بزاف، قررات تبقا تخلي رحلاتها يدخلو فشي مدار ف اللول و موراها يعوجو و يمشيو للقمر.

الأسطروديناميك

الديناميك د لفضا ولا الأسطرودايناميك هي لقراية ديال الطرقان لي كاتمشي فيها لمركبات لفضائية، و لعلاقة ديالها ب لجادبية و الدفيع. و لمعرفة د لقواعد تاعها كتعاون بزاف لمركبات باش توصل للهدف ديالها فوقت قليل و محدد، و حتا تاكل غير شوية ديال لفيول.