جريدة رسمية

لجريدة رّسمية (ب لفرانساوية: Bulletin officiel) هي منشور قانوني رسمي كاين عند أغلبية دّول و عندو أهمية قانونية كبيرة حيت أي قانون ولا مرسوم ما كايولي رسمي و تولي خدامة بيه دّولة تا لنهار كايتنشر ف لجريدة رّسمية. هادشي كايعني مثلا أن لقانون واخا يصادق عليه لبرلمان و يتسنا ظهير تّنفيذ ديالو، ف لحالة ديال لمغريب مثلا، ماكايولي رسمي تا لنهار كايتنشر ف لحريدة رّسمية، وما يمكن يتحاكم بيه تا شي حد ولا يتستعمل ف شي قضية قانونية قبل ديك تّاريخ.

سّميات لجرائد رّسمية ف لعالم

تّسميات ديال لجرائد رّسمية، وحتا لأهمية لقانونية ديالها، يمكن تختلف بين لبلدان، بحيت كاين لّي كايسميهوم Bulletin/Boletín ولا :

• Bulletin officiel ولا Boletín Oficial: ف لمغريب، فرانسا، سپانيا و لأرجونتين.
• Journal officiel ولا Diario Oficial: بحال مثلا ف دزاير و تونس و لبرازيل.
• Federal Register: ف ميريكان.
• Gazette: بحال فدول بحال بريطانيا و صّين و فينيسويلا مثلا.

لجريدة رّسمية د لمملكة لمغريبية

لجريدة رّسمية د لمغريب سميتها ب لعربية الجريدة الرسمية للمملكة المغربية و ب لفرانساوية Bulletin officiel du royaume du Maroc. كاتصدر ب لعربية و لفرانساوية و لوزارة لمسؤولة عليها هي لأمانة لعامة د لحكومة. لجريدة رّسمية د لمغريب كاتخرج فيها بزاف ديال نّواع ديال نّصوص لقانونية:

• ظّهائر، لّي كايوقعهوم لماليك، ويمكن يكونو ظهائر تنفيذ قوانين ولا ظهائر لّي عندها لقيمة ديال قانون (حسب دّستور لمغريبي، هد نّوع لّخر كايتعلق فقط ب لمسائل دّينية ولا ديال دّفاع لوطني).
• لقوانين، لّي كاتدوز من مسطرة تّشريع (قتيراح من عند لحوكومة ولا لبرلمان و من بعد مايصوت عليها لبرلمان)
• لمراسيم، لّي هي قرارات وزارية تقنية يمكن تكون كاتشرح تّنفيذ ديال شي قانون.
• لتيفاقيات و لمعاهدات دّولية لّي كايوقعهوم لمغريب.

عيون لكلام

تقدر تزيد شوف بزاف د تّصاور و لمعلومات ديال Government gazettes ف ويكيميديا كومنز.