تانيت
| سمع | (ملف) |
تانيت ؤلا تينيت ؤلا تانايت ؤلا تانيث ؤلا تنت ؤلا تانيس كانت ربة بونيقية ؤ أمازيغية، و كانت كبيرة رّبايب بلاد قرطاج لقديمة هيا ؤ راجلها رّب بعل هامون. ؤ كانو كايعبدوها حتى لأمازيغ لقدام.[1]
أول ما كاتبان تانيت ف سّيجيل لأركيولوجي هيّا ف نقيشات من لقرن سّابع قبل لميلاد علا أقصا تقدير، حدا مدينة صيدا ف لوبنان، ؤ كيتشار ليها كا تانيت ديالت عشتار. نّدرة ديال لإشارات ليها من بين لحوايج لي كاتبين بلي كانت غير ربة تانوية ف دّيانة ديالت بلاد كنعان. ف قرطاج ب لموقابيل، تانيت كاتولي عندها شعبية كبيرة كا ربة معبودة، ف خيلال لقرن رّابع قبل لميلاد.[2]
حيت سميتها كاتّكتب 𐤕𐤍𐤕 (تنت) بلا تشكال (بحال لكتبة د لعربية)، لعولاما كانو تّافقو باش يقراو سميتها تانيت، ولاكين واحد نّقيشات تّلقاو ف سيرتا (لي دابا ولات قسنطينة ف دزاير)، مكتوبين ب ليونانية، بينو بلي سميتها، علّاقل تماك، كانت كاتݣال تينّيت. هادشي ماكينفيش بلي تقدر تكون كانت معروفة ب سميّة ؤ لا سميات خرين ف بلاص خرين.[2]
تانيت كانت كاتّعتابر ربة د لخصوبة ؤ لؤمومة، ؤ كانت كاتسما "لوجه ديال بعل". طّقوس ديال لعيبادة ديالها ؤ ديال بعل هامون كانو كيدخلو فيهوم حتا دّبيح ؤ تّضحية ب لحيوانات، ؤ شي مرات حتا بنادم، سيرتو دّراري صّغار، ولاكين غير ف لمنطقة لي كاتسمّا دّايرة ديال تّوفيط، لي كانت كاتشمل لمناطق لي دابا تابعة ل شّمال د تونس (سيرتو ف قرطاج ؤ هادروميتوم)، مالطا، صقلية (ف موتيا)، ؤ سردينيا (ف بزاف د لبلايص بحال ثاروس، سولكيس، ؤ نورا)، لي كاينة ف لوسط ديال لبحر شّامي. ف لغرب ديالو ماتّلقاو حتا شي أدلة بلي بحال هاد طّقوس ديال تّضحية كانو كيتمارسو.[2]
ف تونس ديال دابا، باقية عادة د طليب ؤمك طنّو (ولّا ؤمك طنݣو، علا حساب لجيهة) فوقات لجفاف، ب واحد لؤغنية لي كاتبدا هاكا: ؤمك طانو يا نسا طلبت ربي عالشتا، لي تقدر تكون من لبقايا ديال عيبادة رّبة تانيت. ؤ ف شمال إفريقيا، كانقولو علا فلاحة لبور: لفلاحة لبعلية.
|
تقدر تزيد شوف بزاف د تّصاور و لمعلومات ديال Tanit ف ويكيميديا كومنز. |
عيون لكلام[بدل | بدل لكود]
 هادي زريعة ديال مقالة خاصها تّوسع. تقدر تشارك ف لكتبة ديالها. |