انتقل إلى المحتوى

إيݣوانا

من ويكيپيديا
لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.
إيݣوانا
معلومات عامة
سمية لعيلمية Iguana
(جوزيفوس نيكولاوس لورنتي، 1768)
لخاصية د ترتاب ڭنس
تابع ل إغوانية


إيݣوانا (ب لحروف اللاتينيين: Iguana، ب الصبليونية: [iˈɣwana])؛ إيغوانا) هو ݣنس ديال زرموميات عشاشبيين لي مستوطنين أصليين ل لبلايص الستيوائيين ديال لميكسيك، أمريكا لوسطانية، أمريكا الجنوبية، و لكاريبي. لݣنس توصف ل لخطرة اللولى من عالم الطبيعة لؤسطرالي دجي. إن. لورينتي ف 1768.[1] جوج نواع تبلاصاو ف لݣنس: لإيݣوانا لخضرا، لي مفرّقة ب شكل عريض على طول لمادى نتاعها و حيوان د الدار شعبي؛ و لإيݣوانا د لانتيل الصغيرة، لي مستوطنة أصلية ل ݣزاير لآنتيل الصغيرة. التحليل الجيني كايعطي بلي لإيݣوانا لخضرا تقدر تجمع واحد التركيب د بزاف النواع، لي شي وحدين منهم عاد توصفو ف اللواخر، و لايني قاعدة الضونيات د الزواحف كاتعتابرهم كاملين كا نوع تحتاني ديال لإيݣوانا لخضرا.[2][3]

لكلمة "إيݣوانا" مشتقة من السمية لأصلية د هاد النوع ب طايينو (Taino)، إيوانا.[4] زيد على الجوج نواع لي ف ݣنس إيݣوانا، بزاف د لݣنوس لمرتابطين لي كاينين ف نفس لفاميلة عندهم سميات شايعين د هاد النوع و منهم السمية "إيݣوانا".[5]

هاد النوع طريدة شعبية ل حيوانات لمربيين، و من لحيوانات لي ماشي مستوطنين أصليين و لي تدخّلو ب شكل عريض برّا لبلايص لأصليين دياولهم، ف ݣزيرة إيشيݣاكي، شبه ݣزيرة فلوريدا، هاوايي، سنغافورة، طايلاند، طايوان، و زيد شلّا ݣزاير فيهم نسمات أصليين من لإيݣوانا ف لآنتيل الصغيرة.[6][7]

لآناطوميا و لفيزيولوجيا

[بدل | بدل لكود]

لإيݣوانات هوما زرموميات كبار ف لقد لي يقدرو يتفاوتو من 1.2 ل 2.0 ميطرو ف الطولة، ب لحساب د لقزيبة. عندهم واحد لكيس جلدي عنقي (dewlap) و واحد التستيفة ديال لحراشف لمطولين لي غاديين من النص د عناقهم ل قزازبهم. لإيݣوانات عندهم شكال مبدلين من لحراشف لي كايغطيو مواطع مبدلين من كسداتهم؛ متلاً، شي حراشف كبار و ضايرين لي مفرّقين ف لموطع الجنبي د لعنق هوما و حراشف صغار مدّاخلين.[8] لحراشف د لموطع لفوقاني/الضهري (dorsal) ديال كسداتهم حتى هوما غلض و مدكسين ب شكل ضيّق على هادوك لي ف لمواطع لكرشيين/التحتانيين (Ventral).[8] هاد لحراشف يقدرو يكونو فيهم تنويعة من اللوان و لي ماكايكونوش ديما باينين من لقرب. عندهم حرشفة كبيرة و ضايرة ف حناكهم معروفة ب سمية الدرع تحت طبلي (subtympanic shield).[9]

لإيݣوانات عندهم شوف مجهد و يمكن ليهم يشوفو الشكال، الضلال، اللوان، و لحركة من مسافات طوال. لمضى الشوفي ( visual acuity) ديالهم كايخلّيهم يجولو وسط لغابات لعامرين ب الشجر و كايخلّيهم يقلّعو لماكلة. هوما كايوضفو السينيالات الشوفيين باش يتواصلو معا أعضاء خرين ديال نفس النوع.[9]

التيمپانوم (tympanum)، لي هو طبلة لودن د لإيݣوانا، موجود فوق من الدرع التحت طبلي (ولا "درع لودن") تحت من كل عين.

لإيݣوانات ف لغالب صعاب يتقشعو، حيتاش كايميلو باش يتموهو ف لبلايص لي ضايرين بيهم، و التلوينة ديالهم كاتخلّيهم قادرين يتخباو من لمفتارسين لي كبر.[9]

كيف لاغلابية د الزواحف، إيݣوانا وحدة عندها قلب تلاتي لبيوت ب جوج آتريات (Atria)، بطيّن (ventricle) واحد، و جوج آيورطات (aortae) ديال الدورة السيسطيمية.[10] لعضلات ديال شي إيݣوانا كايكونو فاتحين ف اللون ب زايد ب سباب النسبة الزايدة من اللياف لعضليين لهدّاما د لݣليكوز (glycolytic muscle fibers)، و لي كايتفتلو ب الزربة (fast-twitch) (النوع A). هاد اللياف مافيهمش بزاف ديال لوعية د الدم و فيهم نسبة قليلة من لميوݣلوبين، هادشي لي كايعطيهم لمنضر لباهت ديالهم. هاد لكتافة الزايدة د اللياف كاتخلّي لإيݣوانا تحرّك ب الزربة ف وقيتة قصيرة، هادشي لي كايسهل ليها التحروكات لقصار و لمزروبين، ولايني ماكايكونش عندها مفعولية ف لوقيتات الطوال د لحركة، مادام التنفوس لخلوي كايكون لاؤكسيجيني (Anaerobic) ف اللياف.

لعين لحيطية

[بدل | بدل لكود]

بزاف د النواع من الزرموميات، بحال لإيݣوانات، عندهم واحد لحرشفة باهتة ف جيهة اللور د ريوسهم لي كاترشم لعين لحيطية (parietal eye). هاد لعضو كايكون حساس ل التبدالات ف الضو و كايسيفط سينيالات ل لغدّة الصنوبرية هادشي لي كايخلّيهم يعرفو لفرق بين النهار و الليل. واحد الصبغة ضويّة (photopigment) كاتلقى ب شكل شايع ف اللومپروا (lamprey)، معروفة ب سمية پاراپينوپزين (parapinopsin)، كاتلقى عاوتاني ف لإيݣوانا، و كاتكون حساسة ل الضو لفوق بنفساجي و كاتعاون ف السنياليزاسيو بين النهار و الليل.[11]

مورفولوجية الجمجومة و الريجيم

[بدل | بدل لكود]

لإيݣوانات طوورو واحد الستيل د لعيشة عشاشبي، ب لعليف ب شكل حصري على لغطا النباتي.[12] و لوراق. باش ياخدو، يعالجو، و يهضمو لمواد النباتيين، الزواحف لعشاشبيين كايخصهم واحد الجهد زايد د لعضة ب النسبة ل قدهم ب لموقارنة معا الزواحف اللحايميين ولا لقارتين. الجمجومة ديال لإيݣوانا طراو ليها تعدالات لي ودّاو ل واحد الجهد قوي د لعضة و مفعولية ف لمعالجة د النبات، هادشي على حساب واحد الديراسة.[13] و باش يوصلو ل هادشي ب شكل بيوميكانيكي، الزواحف لعشاشبيين عندهم جماجم طوْل و عرْض، قنانف قصر، و كسدات كبر ب لموقارنة معا الزواحف اللحايميين و لقارتين.[13] الزيادة ف لقوة د الجمجومة كايودي ل زيادة ف حضور لعضلات و كاتزيد ف قدرة الجمجومة باش تصبر على قوات كتر ف الجهد. [14]

فوق من هادشي، سنان لإيݣوانا كايكونو آكروضونت (acrodontal)، يعني بلي سنانهم محطوطين لفوق د السورفاص ديال لعضم لفكي[15] و كايبرزو ل لفوق. السنان ب ريوسهم صغار و مشنقرين - مصاوبين باش يشقمو و يشرݣو لماكلة.[16]

لمكاترة

[بدل | بدل لكود]

دكور لإيݣوانا، بحال ليكزومپلات لخرين د دكور لحرشفيات (Squamata)، عندهم جوج قضبان نصيين (hemipenes). ف وقيت لملاقية (copulation)، نص قضيب واحد كايتخشى ف التفويهة لمدرقية (cloacal vent) د النتوا.[17] نتوا وحدة تقدر تخزن لماني ديال لمجاوجين لفايتين ل بزاف د لعوام باش تكمّل ف تخصاب بيضها يلا ما لقاتش حتى دكر ف الزون ديالها منين كاتكون واجدة باش تحط لبيض مرة خرة.[18][19][20]

لمجاوجة و لمحابة

[بدل | بدل لكود]

لإيݣوانات كايميلو باش يتبعو واحد الستيل د لمجاوجة لي كايكون خلّاط (promiscuous) ولا معدد الجواج ف الجنسين (polygynandrous) ف وقيت لموسم الناشف. لمجاوجة ف وقيت لموسم الناشف كاضمن بلي ولادهم غايفقسو ف وقيت لموسم لفازݣ ولا الشتوي فين لماكلة كاتكون كتر. النتوات كايحكمو زونات كبار، فين كايديرو بزاف د لعشاش. الدكور كايتنافسو عل النتوات ف شي موطع و كايرشمو الزون لي ربحوها ب واحد لفيرومون لي كايتّفرز من لمسامات لفخديين (femoral pores) من لموطع لفوقاني/الضهري د طرافهم اللورانيين. سلوك الدكر ف وقيت لمنافسة الجنسية كايجمع تضوار الراس، تجباد و تكماش لكيس الجلدي لعنقي ديالهم، تحساس و عضان لعناق د النتوات، و ف شي مرات، تبدال اللون. غير كاتعزل شي نتوا شي دكر، كايركب عليها و كايحكمها ف بلاصتها ب عضان لكتف ديالها، هادشي لي شي مرات كايخلّي يمارات ف النتوات. من مور لملاقية، لبيض كايتحط ف بزاف د لعشاش و كايتسمح ليهم ب لحضانة. هاد النيڤو الطايح ديال التدخول د لوالدين معا ولادهم كايخلّي لإيݣوانات متال ديال السطراتيجية r د لمكاترة.

لفيلوجينيا

[بدل | بدل لكود]

واحد لفيلوجينيا مبازية على الجينات د كوضاج لپروتين، راجعوها ڤيضال و هيدجيس (2009) عطات بلي التقسيمة التحتانية إيݣوانيا (Iguania) ف واحد لݣروپ معا اللفاعي و بدغيات الشكل (زرموميات). هاد لݣروپات كايشركو واحد لغدّة فمّية كاتقدر تفرز الطوكسينات (واحد لمزيّة مشتقة).[21] وخا هاكداك، لفيلوجينيا تبازات على الجينومات لكاملين د لميطوكوندريا كيف ما قتارحو ريست و وحدين خرين (2003)، لي كاتبلاصي لإيݣوانا لخضرا ب صيفتها أقرب قريب ل السكينك الطوپين (Plestiodon egregius).[22] الليپيدوصورات (Lepidosaurs) واحد الزواحف ب حراشف مدّاخلين، و وسط هاد لݣروپ لإيݣوانيات و التواطارات (tuataras) ب جوج بيهم كايخرّجو لسانهم باش يهرفو على لفرايس ف بلاصة ما يخدّمو فكاكهم، هادشي لي كايتسمى ب لقبيط ب اللسان (tongue prehension). لإيݣوانيات هوما النسل لفرّادي وسط لحرشفيات لي كايوريو هاد لمزيّة، هادشي لي كايعني بلي هاد لمزيّة تخادت ب شكل مستاقل ف لإيݣوانيات و التواطارات ب جوج.[21] لإيݣوانيات عاوتاني لحرشفيات لفرّاديين لي كايخدّمو ب شكل لولاني الشوفان ديالهم باش يعرفو لفرايس و يتسلّتو ليهم ف عوض ما يعولو على الريسيپطورات لكيماويين ولا الشمان، و كايوضفو واحد الطيكنيك د لغفلة ف قبيط لفرايس ف بلاصة ما يقلّبو عليهم ب شكل آكتيڤ.[21]

واحد الديراسة من بغوي و وحدين خرين. (2020) لقات بلي الطاكسونوميا د ݣنس إيݣوانا كيف ما جاي، إ. ديليكاتيسيما (i. delicatissima-إيݣوانا ݣزاير لآنتيل) هي لعضو لبيدائي (basal) ݣاع د لݣروپ.[2] النواع تكلاصاو كا نواع تحتانيين كيف ما مبازي ف تعريفات قاعدة ضونيات الزواحف (ReptileDatabase).




صوريات فطحين (Sauromalus)


إيݣوانا (Iguana)

إ. ديليكاتيسيما (I. delicatissima)


إ. إيݣوانا (I. iguana)

"إ. إ. رينولوفا" (I. rhinolopha)





إ. إ. إنسولاريس (I. i. insularis)



إ. إ. سانطالوسيا (I. i. sanctaluciae)





إ. إ. ميلانوديرما (I. i. melanoderma)



إ. إ. إيݣوانا (I. i. iguana)







ق.ض.الزواحف كايعتابرو إ. رينولوفا (I. rhinolopha) موراديف ل إ. إيݣوانا (I. iguana)، و غير سلالة مفرّزة ديالها، و كايعتارفو ب إ. إينسولاريس (I. insularis) و إ. ميلانوديرما (I. melanoderma) كا نواع تحتانيين ديال إ. إيݣوانا. 4 د النواع تحتانيين د لإيݣوانا لخضرا تعتارف بيهم تحت من هاد لمعاملة: إ. إينسولاريس (سان ڤينسنت & ݣرينادين و ݣريناضا)، إ. إ. سانكطالوسيا (سان لوسيا)، إ. إ. ميلانوديرما (شي بلايص ف شمال ݣزاير لآنتيل الصغيرة، و واقيلا ف لكوشطات د ڤينيزويلا، ݣزاير لعدرا، و پويرطو ريكو)، و إ. إ. إيݣوانا (قارة د أمريكا الجنوبية).

النواع لباقيين

[بدل | بدل لكود]

جوج نواع باقيين ف ݣنس إيݣوانا كايتعتارف بيهم ب شكل عريض.

  • إيݣوانا ديليكاتيسيما (إيݣوانا ݣزاير لآنتيل الصغيرة)
  • إيݣوانا إيݣوانا (إيݣونا خضرا)

النواع التحتانيين

[بدل | بدل لكود]

تلاتة د النواع التحتانيين كاريبيين ديال لإيݣوانا لخضرا حتى هوما معتارفين بيهم:

  • إ. إ. إينسولاريس
  • إ. إ. ميلانوديرما

إ. إ. سانكطالوسيا

لإيݣوانا لأمريكية لوسطانية (إ. رينولوفا ولا إ. إ. رينولوفا)، شي خطرات كاتعتابر نوع مفرّز، هي كاتعتابر ب شكل كبير ب صيفتها موراديف ل إ. إيݣوانا، حيتاش لحضور د لݣرون عندها ماكايلمحش ب الضارورة بلي هي نوع ولا نويع جديد. الجوج نواع تحتانيين لموصوفين د إ. إينسولاريس (لإيݣوانا مو ݣرون د سان لوسيا، إ. إ. سانكطالوسياي، و لإيݣوانا مو ݣرون د لݣرينادين، إ. إ. إينسولاريس)ف لأصل توصفو كا نواع تحتانيين ديال إ. إيݣوانا، وخا هوما مشابهين جينياً ب زايد و يقدرو مايكونوش نواع تحتانيين مفارقين على بعضياتهم.[3] عطاو الديراسات الجداد لي مبازيين على الجينات بلي إ. رينولوفا و إ. إينسولاريس نواع مفرّزين على بعضياتهم، بلحق قاعدة ضونيات د الزواحف ماكايتافقوش معا هاد الستينتاجات، و كايكلاصيفيو إ. رينولوفا كا موراديف د إ. إيݣوانا، و كايكلاصيو إ. إينسولاريس كا نوع تحتاني د إ. إيݣوانا.[23] النسمة د كوراصاو ديال لإيݣوانات لخضرين كايوريو مباعدة جينية كبيرة و يقدرو عاوتاني يمتلو شي نواع ولا نوع تحتاني باقي ماموصوفش.[2][24]

ب صيفتهم ماكلة

[بدل | بدل لكود]

لإيݣوانات بانو ب شكل تاريخي ف التقاليد الطبخيين ديال لميكسيك و أمريكا لوسطانية. لحم لإيݣوانا حتى هو كايكونصوما ف شي بلايص ف ميريكان و پويرطو ريكو.[25] زيد، بيض لإيݣوانا كايكونصوما ف شي قنات ف أمريكا اللاتينية، بحال النيكاراݣوا و كولومبيا.[26]

مصادر

[بدل | بدل لكود]
  1. ^ Laurenti, J.N. (1768). Specimen Medicum, Exhibens Synopsin Reptilium Emendatam cum Experimentis circa Venena [Medical specimen, presenting a revised synopsis of reptiles with experiments on venom] (in Latin).
  2. ^ a b c Breuil, M.; Schikorski, D.; Vuillaume, B.; Krauss, U.; Morton, M.N.; Corry, E.; et al. (2020). "Painted black: Iguana melanoderma (Reptilia, Squamata, Iguanidae) a new melanistic endemic species from Saba and Montserrat islands (Lesser Antilles)". ZooKeys (926): 95–131.
  3. ^ a b "Iguana iguana". The Reptile Database.
  4. ^ Coles, William (2002). Green iguana (PDF) (Report). U.S.V.I. Animal Fact Sheet. Vol. 08. Department of Planning and Natural Resources, US Virgin Islands Division of Fish and Wildlife.
  5. ^ Wildlife Review. Fish and Wildlife Service. U.S. Department of the Interior. 1968 – via Google.
  6. ^ "Iguana iguana". The Reptile Database
  7. ^ van den Burg, M.P.; Goetz, M.; Brannon, L.; Weekes, T.S.; Ryan, K. V.; Debrot, A.O. (23 March 2023). "An integrative approach to assess non-native iguana presence on Saba and Montserrat: Are we losing all native Iguana populations in the Lesser Antilles?". Animal Conservation. 26 (6): 813–825.
  8. ^ a b Chang, Cheng; Wu, Ping; Baker, Ruth E.; Maini, Philip K.; Alibardi, Lorenzo; Chuong, Cheng-Ming (2009). "Reptile scale paradigm: Evo-devo, pattern formation and regeneration". The International Journal of Developmental Biology. 53 (5–6): 813–826.
  9. ^ a b c Lazell, J.D. (1973). "The lizard genus Iguana in the Lesser Antilles". Bulletin of the Museum of Comparative Zoology. 145: 1–28.
  10. ^ de Voe, Ryan S. "Reptilian cardiovascular anatomy and physiology: Evaluation and monitoring (Proceedings)". dvm360.com.
  11. ^ Wada, Seiji (June 2012). "Expression of UV-Sensitive parapinopsin in the iguana parietal eyes and its implication in UV-sensitivity in vertebrate pineal-related organs". PLOS ONE. 7 (6): 6.
  12. ^ Lichtenbelt, Wouter D. van Marken (1 August 1993). "Optimal foraging of a herbivorous lizard, the green iguana in a seasonal environment". Oecologia. 95 (2): 246–256.
  13. ^ a b Metzger, Keith A.; Herrel, Anthony (1 December 2005). "Correlations between lizard cranial shape and diet: a quantitative, phylogenetically informed analysis". Biological Journal of the Linnean Society. 86 (4): 433–466.
  14. ^ Herrel, Anthony (2009). "Jaw and hyolingual muscle activity patterns and bite forces in the herbivorous lizard Uromastyx acanthinurus". Archives of Oral Biology. 54 (8): 772–782.
  15. ^ Kuss (28 April 2017). "The teeth of vertebrate animals". Digestive system. inside.ucumberlands.edu (course notes). Biology course. University of the Cumberlands.
  16. ^ Banzato, Tommaso; Selleri, Paolo; Veladiano, Irene A.; Martin, Andrea; Zanetti, Emanuele; Zotti, Alessandro (January 2012). "Comparative evaluation of the cadaveric, radiographic, and computed tomographic anatomy of the heads of green iguana (Iguana iguana), common tegu ( Tupinambis merianae) and bearded dragon ( Pogona vitticeps)". BMC Veterinary Research. 8: 53
  17. ^ Lenny Flank (2007). Iguanas: Their Biology and Captive Care. Red and Black Publishers.
  18. ^ "The Mating Behavior of Iguana iguana"
  19. ^ "Iguana Behavior- Coterc" (PDF).
  20. ^ Pianka, Eric R.; Pianka, Eric R.; Vitt, Laurie J. (24 September 2003). Lizards: Windows to the Evolution of Diversity. University of California Press.
  21. ^ a b c Vidal, Nicolas; Hedges, S. Blair (2009). "The molecular evolutionary tree of lizards, snakes, and amphisbaenians". Comptes Rendus Biologies. 332 (2–3): 129–139.
  22. ^ Rest, Joshua S.; Ast, Jennifer C.; Austin, Christopher C.; Waddell, Peter J.; Tibbetts, Elizabeth A.; Hay, Jennifer M.; Mindell, David P. (2003). "Molecular systematics of primary reptilian lineages and the tuatara mitochondrial genome". Molecular Phylogenetics and Evolution. 29 (2): 289–297.
  23. ^ Stephen, Catherine L.; Reynoso, Víctor H.; Collett, William S.; Hasbun, Carlos R.; Breinholt, Jesse W. (2013). "Geographical structure and cryptic lineages within common green iguanas, Iguana iguana". Journal of Biogeography. 40 (1): 50–62.
  24. ^ Breuil, Michel; Vuillaume, Barbara; Schikorski, David; Krauss, Ulrike; Morton, Matthew N.; Haynes, Pius; et al. (8 November 2018). "A story of nasal horns: A new species of Iguana Laurenti, 1768 (Squamata, Iguanidae) in Saint Lucia, St Vincent & the Grenadines, and Grenada (Southern Lesser Antilles) and its implications for the taxonomy of the genus Iguana". bioRxiv: 466128.
  25. ^ Campo-Flores, Arian (20 August 2012). "To battle iguanas, Puerto Rico has [a] new plan: Put them on [the] menu". The Wall Street Journal.
  26. ^ "Nicaragua's government suggests eating iguana as massive food crisis looms". Vice. 20 August 2014
مرجّعة من "https://ary.wikipedia.org/w/index.php?title=إيݣوانا&oldid=407145"