إمزورن
إمزورن
| ||||
|
إمزورن (ar) | ||||
 | ||||
| لبلاصة | ||||
| لبلاد | لمغريب | |||
| لإقليم | إقليم لحسيمة | |||
| السكان | ||||
| شحال دالسكان | 34,848 (2024) | |||
| شحال دلفاميلات | 7,440 (2014) | |||
| لجغرافيا | ||||
| لعلو | 129 م | |||
| معلومات خرين | ||||
| الرمز لجغرافي | 6547071 | |||
إمزورن مدينة مغريبية كاينة ف إقليم الحسيمة، جهة طنجة تطوان الحسيمة، ساكنين فيها 33493 واحد، على حسب لإحصاء لعام 2014.[1]
كل عام كيزوروا إمزورن آلاف السياح اللي جايين من أوروبا. المدينة فيها بزاف ديال القهاوي والطيراسّات، والحياة فيها بالليل حيوية بزاف. وهي فين كاين قرية SOS للأطفال.
ففبراير 2004، وقع زلزال الحسيمة قريب من إمزورن، وكانت القوة ديالو 6.3 على سلم ريختر. ماتوا فيه على الأقل 564 واحد وتجرحوا أكثر من 250.[2]
إمزورن كاتّعتابر جماعة ترابية حضرية.
إمزورن جات على لطريق الوطنية رقم 2 اللي كتشد من الناظور لـ تطوان، وجات فجنوب مدينة الحسيمة بـ 18 كلم، وبعيدة على مطار الشريف الإدريسي بـ 5 كلم.
و مدينة إمزورن (بالأمازيغية ⵉⵎⵣⵓⵔⵏ)، مدينة جات فشمال المغرب فجبال الريف. كتحادّها من الشمال والغرب الجماعة القروية لآيت يوسف أوعلي، ومن الشرق بلدية بني بوعياش، وجماعة لوطا القروية من جهة الجنوب.
لمساحة ديال إمزورن كتقدر بـ 16,44 كلم2، وطالعة على لبحر بـ 50 متر تقريباً، وهاد لبحر (شاطئ السواني) بعيد عليها بـ 7 كلم. هي جماعة داخلية ما عندهاش مرسى ولا خروج نيشان على البحر.
- نسبة لأمية (نّاس لّي ما كايعرفوش يقراو ولا يكتبو): 30,4%
- نسبة سّكان لّي قاريين فوق الليسي (ليسي و جامعة): 14,9%
إمزورن فيها بزاف ديال لمدارس لابتدائية: مدرسة أبي طالب، مدرسة إمزورن 2 (اللي كانت سميتها "الجديدة")، مدرسة ابن رشد، مدرسة واد الذهب، مدرسة الحسن الأول، ومدرسة محمد الزرقطوني. كاينين حتى مدرسة أحمد بوكماخ ومدرسة أم البنين (حي بركم).
وبالنسبة للإعداديات، كاينين ربعة: إعدادية القدس، إعدادية محمد السادس (اللي كانت سميتها "ابن سينا")، إعدادية النصر (آيت موسى وعمر)، وإعدادية الحي الرابع (حي بركم).
أما ثانويات، كاين ثانوية إمزورن التأهيلية (اللي فيها بزاف الدريات)، وثانوية مولاي إسماعيل (للدراري)، وثانوية ابن الحزم اللي تحلات فموسم 2014/2015 فالحي الرابع.
- نسبة نّاس نّشيطين (لّي يقدرو يخدمو): 43%
- نسبة لبطالة (نّاس لّي ما خدامينش و تايقلبو على خدمة): 23,3%
- نسبة نّاس اللي خدامين ف دّولة (ولا لبيطاليين اللي سبق ليهوم خدمو): 12,5%
- نسبة نّاس اللي خدامين ف لپريڤي (ولا لبيطاليين اللي سبق ليهوم خدمو): 47,1%
المدينة معروفة بلي هي "قطب اقتصادي" خاصة فالتجارة. الناس كيجيو ليها من كاع الجماعات ديال إقليم الحسيمة باش يتقداو كاع داكشي اللي كيحتاجو من السلعة.
لجو فإمزورن هو مناخ متوسطي: دافئ وشتا فيه مطر، وصيف كيكون حار وناشف. لحرارة ف لعادة ما كتفوتش 28 درجة ف صيف، وما كتهبطش على 8 درجات ف لبرد. شتا كطيح قليلة بلمقارنة مع لبلايص لي حداها (ما كتفوتش 300 ملم ف لعام)، و ريح كتوصل سرعة ديالو لـ 100 كلم ف ساعة.
لمنطقة بدات كتزدهر بزاف مورا زلزال 2004. فهاديك لوقية بدات كتعرف للعموم وتشهرات. وزيارات لمتكررة ديال لملك خلات لمدينة تنمى كثر.[3]
لمدينة تأثرات حتى بالحراك الشعبي ديال الريف حيت هي مسقط رأس الشهيد محسن فكري.[4]
من لمعالم ديال إمزورن كاين زاوية لطريقة العلوية. هي من المؤسسات لعلمية ودينية لمهمة لي كتحافظ على لقيم وروحية وثقافة ديال لمنطقة. هاد لزاوية عندها تاريخ طويل وقديم، وتعتبر من أقدم زوايا ف لمغرب. ف لبداية كانت فواحد لبلاصة سميتها "أرابضا" ومازال كاينين لآثار ديالها تما.
شيوخ كانوا كيجيو ليها من كاع دواور ديال إمزورن وبني بوعياش. من بعد تحولات زاوية لقلب إمزورن، حدا لمسجد لمركزي لكبير. أسسوها شيوخ علويين ف لبداية ديال الثلاثينات، بحال سيدي يوسف وخوه سيدي محمد والشيخ سيدي اليزيد وغيرهم.
تأسسات فظروف صعيبة حيت ما كانوش الفلوس وبسباب التضييق ديال الاستعمار الإسباني، اللي كان كيهاب من زوايا حيت هي اللي كانت كتقود ثورات ضدهم. هاد الزاوية لعبات أدوار كبيرة فالتوعية والمجالس الروحية فالمناسبات بحال المولد النبوي، الإسراء والمعراج، وليلة النصف من شعبان، وليلة القدر.
مدينة معروفة بكثرة ديال القهاوي لي فيها.
لمدينة فيها بزاف ديال جوامع، ومن أكبر جوامع فالإقليم كاين للي جا ف الطريق لوطنية قبل جوندارم. وكاينين مساجد أخرى مشهورة بحال مسجد الإمام مالك ومسجد خالد بن الوليد.
إمزورن معروفة بزاف بالهجرة. بزاف من سكان ديالها كاينين ف دول لأوروبية بحال إسبانيا، فرنسا، بلجيكا، وهولندا (اللي فيها الأغلبية)، وكاينين حتى فـ إيطاليا، ألمانيا، الدانمارك، النرويج، والسويد.
- ↑ "RGPH 2014 - Site HCP". Archived from the original on 2023-07-02. Retrieved 2020-08-20.
- ↑ "Quake flattens Moroccan villages" (بالإنجليزية البريطانية). 24 Feb 2004. Archived from the original on 2023-01-09. Retrieved 2023-01-09.
- ↑ NADORCITY. "زلزال الحسيمة.. 14 سنة مرت عن الكارثة و الذكرى تابى النسيان". NadorCity.Com (ب العربية). Retrieved 2026-04-30.
- ↑ khadija (2018-06-29). "أجواء التوتر تخيم على إمزورن .. وحقوقيون: نعيش "حالة استثناء"". Hespress - هسبريس جريدة إلكترونية مغربية (ب العربية). Retrieved 2026-04-30.
