ويكيپيديا:توضيح

التوضيح ف ويكيپيديا هوّا واحد لپروصي لي كيتطبق باش يتحيّد اللتيباس ديال شي عنوان د مقال، حيت يقدر يحيل ل كتر من موضوع واحد. متلاً ڤينوس تقدر تشير ل الربة الرومانية ڤينوس ؤلا ل كوكب ڤينوس و ل مواضيع خرين بحال عناوين د أفلام.

التوضيح كيتدار ف لعادة ب الزيادة ديال صفحة خاصة لي كاتسمّا "صفحة د التوضيح"، و لي كاتحيل ل جميع لمواضيع لي يقدر يشير ليهوم واحد لعنوان. الصفاحي د التوضيح كيتدارو سيرتو ف لمجال السمياتي الرئيسي (ديال لمقالات)، و بدرجة قل ف لمجالات السمياتية د لپروجي (ويكيپيديا:) و د لمعاونة (معاونة:).

فوقاش تزيد صفحة د التوضيح

يلا كان واحد لعنوان يقدر يحيل ل كتر من موضوع، كلا واحد منهوم عندو ؤلا يقدر يكون عندو صفحة خاصة بيه، ؤلا فقرة من صفحة. خاص يكون لعنوان لي داير اللتيباس عنوان مومكين ل أي وحدة من الصفحات لي كيحيل ليها، يعني بحال تحويل ل بزاف د الصفحات. متلا جتياح مايمكنش تكون صفحة توضيح ديال جتياح روسي د ؤكرانيا د 2022، حيت "جتياح" ماشي مصطلح لي كيرادف "جتياح روسي د ؤكرانيا د 2022"، ولاكين لعنوان "لحرب الروسو-ؤكرانية" تقدر تّدار منو صفحة د التوضيح لي كاتدي ل جتياح روسي د ؤكرانيا د 2022، حيت من غير تحديد التاريخ، لعناوين بجوج مترادفين.
يلا كان لعنوان كيشير غير ل جوج مواضيع و مايمكن يشير ل تا شي موضوع أخور (وخا مايكونش عندو صفحة ف ويكيپيديا)، من لأحسن ماتّدارش صفحة د التوضيح، مي غير يتخدّم لموضيل {{ميز|عنوان د لموضوع لأخور}} ف الصفاحي بجوج.

لعنوان ديال صفحة التوضيح

لعنوان ديال صفحة د التوضيح كيقدر يتّكتب ب هاد الشكال:

عنوان حافي كيشير ل كتر من صفحة. متلا ڤينوس
"عنوان (توضيح)". متلا زوهري (توضيح)
"عنوان (صفحة توضيح)". متلا محمد مجاهد (صفحة توضيح)
"عنوان (صفحة د التوضيح)".

من لأحسن مايتخدّموش شكال خرين باش مايطراوش لتيباسات.

كيفاش كاتدار صفحة د التوضيح

الصفحة د التوضيح كيكون فيها لموضيل {{توضيح}} لفوق، واحد لميصاج تحت منو بحال هاكا "كلمة عنوان تقدر تعني:"، و تحت منها ليستة ديال لمواضيع لي يقدر يشير ليها لعنوان، عادةً ب شرح قصير باش يقدر لقاري يعرف إينا عنوان فيهوم لي يبغي يتبّع. يلا كانو بزاف د لمواضيع من بزاف د النواع يقدر يكون عندهوم داك لعنوان، يقدر يتدار تقسيم ديالها على شكل فقرات ب كلا نوع (متلاً: أشخاص، بلايص، أفلام..). باش توضاح الصورة شوف لأمتلة لي مديورين لفوق.

يلا كانو صفاحي خرين د التوضيح عندهوم عناوين مشابهة ؤلا مرتابطة، خاصهوم يتزادو ف فقرة خاصة لتحت، لي عنوانها "شوف تا"، ؤلا "صفاحي مرتابطة" ؤلا شي عنوان بحال هاكا. ماخاصهومش يتزادو معا الليستة د لمواضيع لي كاتدّي ليهوم الصفحة د التوضيح.

يلا كانو شي عناوين مرادفين ل لعنوان د الصفحة د التوضيح (يعني تاهوما يقدرو يخلقو لتيباس ف لمعنى ل نفس لمواضيع لي كاتدّي ليهوم الصفحة د التوضيح)، خاصهوم يتزادو كا تحويلات ل الصفحة د التوضيح، من غير يلا كانو ديجا مخدّمين كا عناوين ديال صفاحي خرين.