لا كاسطيلان

لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.

لا كاسطيلان
لبلاصة
لبلاد	فرانصا
لإقليم	16th arrondissement of Marseille

لا كاسطيلان واحد من الباطيمات ديال كارتيي نور (الدروبة الشمالية ديال مارساي). جات مابين الدائرة 16 و الدائرة 15 ديال مارساي، و جات فاقصى الشمال الغربي ديال المدينة، جات هي من ابعد البلايص من الصونطر ڤيل. تصاوبات علا شكل باطيمات ديال الناس لي عندهم الدخل ضعيف مابين 1969 و 1971.

ف 2018 كانو 1200 دار ساكنين فيها 3810 واحد، مكلاسينها كدرب اولوي، الباطيمات ديال كاسطيلان داخلين حتا ف البلانات ديال التجديد الحضري.

الكاسطيلان كي منين جا زين الدين زيدان، و معروفة ب التبزنيس و ترافيك ديال المخدرات، و محسوبة من اخطر الدروبة ف فرانسا و افقرهم، و هي من مابين هادوك الدروبة ديال الشمال د مارساي لي معروفين بالتبزنيس و الفقر بحال درب ؤليڤيي، فري ڤالون، پارك كورو، لي روزيي ولا حتا بريكارد ڤوازين. ساميا غالي قالت ف 2015 بلي الدروبة ديال الشمال د مارساي منهم لا كاسطيلان دايرين بحال الحبس في الهواء الطلق.

لموضع

باطيمات لاكاسطيلان جات ف اقصى شمال الشرقي ديال مارساي، مابين الدائرة 15 و 16 ديال المدينة، و كينا حتا كاسطيلان (ماشي لا كاصطيلان) لي جات ف وسط مارساي ف الدائرة 6.

ف شمال ديال الباطيمات كان لقاو "الدوار" (village) ديال ڤيردورون و ف الجنوب كين دروبا ديال سان ؤندري و سان ؤنري. شارع ؤنري بارنيي جا حدا لا كاسطيلان من لجيهة الشرقية ديالو، و كيقطعها من بريكارد. جردة الجوڭاريل تاهيا كاتحد لا كاصطيلان من الشمال ديالها، و من الغرب حاداها طريق بيرنيكس. ؤ ف لخر زنقة ألبان مايلان حاداها من الجنوب.

التحضر

رسمة تخطيطية ديال لا كاسطيلان

الباطيمات ديال لا كاصطيلان تبناو ف واحد السياق ديال لأزمة ديال سكنة ف "الثلاثينات المجيدة"، و هادا بسباب الهجرة القروية و بلي الناس بداو كايتولدو بزاف، وحدا انه بداو كيجيو لفرنسا هادوك الزماڭرية باش يخدمو. ف لحالة ديال مارساي، هادوك الفرنسيين لي جاو من الجزائر ف 1962 غادي يزيدو يكفسو المشكل. ف 1958، هاداك فين تبنات لا كاسطيلان كانت ف لول غادا تكون فيها مساباقا ديال 4000 دار، فين بغاو يسكْنو الناس من الكاريانات، ولكن هاد المسابقة غادا تصاوب دروبا خرين بحال مالپاسي، لا ڤيست و سان بارطيليمي.

هاد الباطيمات تصاوبو ف الشمال الغربي ديال مارساي، فواحد تيرَّا سميتها فوريسطا، حدا الشمال الشرقي ديال نيرط و كيطل علا ليسطاك. هاد البرنامج لي دارو عطا حتا واحد المجمعات ديال پلون داو و لا بريكارد. الپروجي تعطا الموافقة ف 1966 و تبنا مابين 1969 و 1971.

لا كاسطيلان فيها 1249 دار مفروقة علا 10 ديال موبلات فيهوم مابين 5 و 7 ديال ليزيطاج و كين واحد البرج فيه 15 ايتاج. بحيث تساوبو الباطيمات فواحد المساحة ديال 1،58 هكتار، الكثافة ديال السكان كبيرة بزاف و جات فواحد البلاسة عالية، تقريبا مابين 71،1 و 96،3 ميترو فوق مستوى ديال البحر. الموبلات تبناو كيتشابهو، تساوبو بالطوب و القوالب. برج K فيه جوج موبلات بيناتهوم واحد الطريق رابطاهم. المهندس جاتو الفكرة ديال هادشي من واحد الستيل ديال الهندسة المعمارية سميتها البروطاليزم (mouvement brutaliste)، و جا كيشبه لواحد الباطيمات ف نيم سميتهوم (Pissevin-Valdegour).

الباطيمات ضايرين علا برج K فالشمال ديال لا كاسطيلان كينا دريبة ديال جوڭاريل و هيا اطول وحدة فالبلاصة و فيها 170 ميترو، وفالجنوب كينين البنايات علا طول 300 ميترو، زنقة پيسكادو.

تجديد الحياة الحضرية

البرج K لي ريبوه ف 2020، التصويرة موخودة من شارع هنري بارنيي

حي لا كاسطيلان ماداوهاش فيه ف هاداك المشروع ديال التجديد ديال العمران د انرو (Anru) لي تدار من 2004. ولكن كان تاهوا داخل ف برنامج تاني لي تدار ف 2014، و كان تصنف "مصلحة وطنية". في 15 يناير 2015، تم توقيع علا الپروطوكول الاعداد المسبق ما بين المدينة و الدولة و صحاب العقارات الاجتماعية خصوصا. و هادشي تدار باش يقادو المحور الشرقي و الغربي لي كان مسدود ب جوج موبلات. ف 2016، الموبل G و باركينڭ (Tartane) تحيدو، و هادشي رييب 12 دار ف جوج ديال ليزيطاج، و دارو بلاستهوم واحد الجردة. و لكن هاديك البرطمة كانت مهمة شوية حيت هيا فين كبر زين الدين زيدان.

و بما ان البرج K كان معروف بالتبزنيس، ريبوه، و تريب معاها 95 دار، الترياب داروه ايطاج ب ايطاج ف 2020، و خسرو عليه 5،5 مليون اورو. اذن 70 عائلة بدلوها و داوها لبلاصة خرا يا حدا لا كاسطيلان يا ف الدائرة 14، ولا كانو ستافدو من واحد البرنامج جديد ديال (Euroméditerranée) ولا تحولو ف الدروبة ديال الجيهة الشرقية ديال مارساي. و باش يساليو دوك الاشغال ديال التجديد، ريبو حتا واحد الصونطر اجتماعي لي بدلوه ف واحد البلاصة جديدة.

الناس لي ساكنة تما

زين الدين زيدان ولد لا كاسطيلان

لا كاسطيلان ساكنين فيها 3810 واحد ف 2018، ساكنين ف 1190 دار لي بقاو، اذن 3 ديال ناس ف الدار. الناس تما غالبا شباب، 47% ديال السكان عندهم قل من 25 عام. و هاد لا كاصطيلان فيها الشوماج و الفقر بزاف، و الديور لي فيها غي ديورة ديال الدولة داروهوم للناس لي عندهم الدخل محدود. ف 2015، جورنال ديال لوموند قال بلي الشوماج تقريبا 54%. و الناس كيعانيو انهم ماكيلقاوش خدمة حيت ملي الشركات كيشوفوهم ولاد لا كاسطيلان، ماكيبغيوش يخموهم.

الباطيمات ديال لا كاصطيلان داخلين ف سياسة ديال المدن الاولوية () لي المساحة ديالهم كاتبلغ 59 هكتار، يذن 6 مرات كتر من لا كاصتيلان. و هاد المنطقة داخلا فيها هتا () و () و حتا شي قنات حداهم. هاد المنطقة ساكنين فيها 9109 واحد ف 2018 ساكنين ف 3200 دار، 77% ديالهوم للناس لي عندهم الدخل المحدود و 18% ديالهم ديال المدينة.

هاد المنطقة فيها 56،4% ديال نسبة الفقر، مارساي فيها غي 26،4% و معدل نسبة الفقر فالدروبة الشعبية ففرانسا هيا 43،5%. الدخل المتوسط ديال الناس فيها هي 1020 اورو ف الشهر، ناس ديال مارساي الدخل المتوسط ديالهم هوا 1580 اورو. المدخول ديالهم 54% ديالو جاي من الخدمة و 34% من المساعدات ديال الدولة، و داكشي لي بقا من لانتريت.

طرونسپور

الطوبيس ديال مارساي

بزاف ديال الناس ديال لا كاصطيلان كيجيهوم بلي النقل ماموجودش بزاف الدرب ديالهوم، يالله كاتدوز من حداهم 2 خطوط ديال طوبيسات لي كيديو بجوج ل الخط 2 ديال ميطرو دمارساي. الخط 25 كيدوز علا زنقة ليون، و الخط 98 اسرع بجوج مرات حيت كي مشي ف لوطوروت. من هنا ل 2031، لا كاسطيلان غادا تكون هي الطيرمينيس ديال واحد الخط جديد ديال طرامواي رقم 3.

تعليم

لا كاسطيلان فيها جوج مركبات تعليمية ابتدائية، فيها مدرسة ابتدائية و حتا ديال دراري الصغار. فالشمال ديال جردة الجوڭاريل، مدرسة الابتدائية (Saint-André Barnier) تصاوبات ف 1969 و فالجنوب كين مدرسة () تصاوبات ف 1971 و فيها 400 تلميذ.

و فالشرق ديال شارع ؤنري بارنيي كاين مدرسة الاعدادية عندها نفس سمية تصاوبات ف 1969، تهرسات ف 1995 و تعاود تصاوبات ف 200. فيها 600 تلميذ جايين من لا كاصطيلان و حتا من بلايص خرين.

فالشرق، كين ليسي تقني فيه باك تقني و شواهد خرين لي موجة لحوايج تقنية ف مجال البني و الضو، و كيقراو فيها شي 100 واحد.

لإجرام

لا كاسطيلان لا شفناها من وبيديوم فيردورون

باطيمات ديال لا كاسطيلان معروفة بزاف ب التبزنيس ف المخدرات، و هي كاتعتابر من اكبر مناطق كيتباعو فيها ف مارساي، و شحال من مرا كيوقعو فيها تصفية حسابات مابين هادوك البزناسا. البوليس كيديرو عمليات كبيرة ديال مكافحة المخدرات كل عامين و لا تلاتة من 2010.

,ف يوليو 2013، تقريبا 200 بوليسي مشاو دارو واحد الفخ باش يشدو البزناسا، و هادشي ورا تقريبا 7 شهور ديال التحقيق من طرف المكتب المركزي لمحاربة الاتجار الغير المشروع بالمخدرات (Orctis). 28 بزناس تشد و معاهم الفرادا بزاف و المخدرات و الفلوس. ميدياپارط كتقول بلي كينين تقريبا 5 ديال الشبكات ديال بيع لي كيكون بيناتهم بعد المرات تصفية الحسابات فين كيموتو بزاف ديال الناس، مثلا مابين الشبكة ديال البرج (K) و ديال (la barre Jougarelle) و حتا (place Mérou). هادوك لي كيحضيو من البوليس و كيعلمو البزناسا بلي البوليس جايين (les guetteurs) كيشدو 50 اورو للنهار، اللي كيبيعو كايشدو 100 اورو فالنهار، و هادوك (les nourrices) لي كيخبيو عندهم المخدرات كيشدو 2000 اورو فالشهر. عالمة جتيماع كلير دوپور قالت بلي هادوك لي كيكونو محكمين فالشبكة ديال البيع كيبداو ضاربين علا راسهم و كيفكرو فيجمعو فلوس، ادن ف 2013 ملي البوليس حيدو البزناسا الكبار كان واحد الفراغ و كان خاص يعمر، اذن جاو وحدين و كانو بزاف ديال تصفية الحسابات بيناتهم.

بزاف ديال العمليات لمحاربة الممنوعات كبار كانو ف يناير 2010، ف دجنبر 2010، ف يونيو 2015، يونيو 2018، ف ماي 2021 و كانو حتا عمليات صغر شوية ف دجنبر 2019، يناير 2020 و فبراير 2020.