فاطنة ݣبوري

فاطنة ݣبوري
معلومات عامة
زيادة	1924
لموت	27 يناير 2012 (87/88 عام)
لجنسية	لمغريب
لحرفة	رسامة

فاطنة ݣبوري فنانة تشكيلية عصامية تزادت عام 1924 ف تنين غربية، دوار صغير قريب ل أسفي. ماتت ف 27 يناير 2012.

كيفاش بدات

بحال ڭاع لعيالات ديال الدوار، فاطنة كبوري دوزات وقتها كامل كا تخدم فالفيرمات وكا تنسج فالزرابي.

تزادت وسط عائلة محافضة بزاف، فاطنة عمرها دخلت لشي مدرسة و قرات فشي تكوين ديال الفن، حتا ل 1984، وهي عندها 59 عام، ومن بعد ما شجعها ولدها أحمد مجيداوي اللي حتا هو فنان تشكيلي وأستاذ ديال الفنون التشكيلية، بدات فاطنة كا ترسم.

فواحد التصريح ديال ولدها أحمد كا يقول فيه

من بعد الموت ديال الوالد، الواليدة كانت مضيومة ومنعازلة. فاش شفتها هكاك، واحد النهار عطيتها شيتة والصباغة ولوحة وقلت ليها رسمي أي حاجة. وهي ترسم واحد المرا كا تنسج زربية. صراحة كانت لوحة زوينة بزاف واللي غادي نبقا محافض عليها.

الموهبة تقدر تبان بالصدفة، و وخا داكشي، الروعة ديال الطابلوات اللوالا د فاطنة كبوري ما فيهم نقاش، ومع مرور السنين، الموهبة ديال ديك المرا اللي غادي تّسمى من بعد "ذاكرة آسفي" غادي تزيد تتطور، الفنانة بدات كا تخدم فالسكات وبلا ما تبان، مواضيعها هي عبارة على مظاهر الفرحة والذاكرة ديال الأحياء الشعبية، الشي اللي غادي يزيد فالشهرة ديالها.

الستيل ديال لوحاتها

حيت هي عصامية وما عمرها قرات على الفن، فاطنة كبوري كا ترسم بكل طلاقة وأريحية، اللوحات ديالها كا يطغى عليهم الألوان الساطعة اللي كا تعكس ذكريات طفولتها، والعيش ف البادية والثقافة الشعبية ف المغرب. اللوحات ديالها بسيطة، أصلية، الفهم ديالها ساهل. فلوحاتها كا نلقاو مواضيع شعبية بحال الطبيعة ديال البادية، اللباس الفلكلوري، قطيع الغنم، مشاهد ديال حياة البادية، العراسات، و عيالات كا ينسجو الزرابي، كا يطرزو، ؤلا كا يطيبو. كانت فاطنة كا تعطي أهمية كبيرة للحوايج الصغار، وللألوان اللي كا ترمز لشي حاجات، بحال:

• قوقي: الحب
• زرق: البحر
• خضر: الربيع والغابة اللي قريبة منها، واللي كانت هي الرية ديال المدينة بحالها بحال البحر
• صفر: الشمس
• وردي: الأزهار