لكتلة (تحالف سياسي)
ميّز على كتلة.
لكتلة هو تحالف سياسي بين تلاتة ديال لأحزاب مغريبية: حيزب ستيقلال، تيحاد شتيراكي د لقوات شعبية ؤ حيزب تقدم ؤ شتيراكية. هاد تحالف تأسس ف لول ب سميت لكتلة لوطنية ف 27 يوليوز 1970 بين حيزب ستيقلال ؤ تيحاد لوطني د لقوات شعبية كا جبهة باش تعارض تبديلات دستورية لي تطبقات قبل من نتيخابات تشريعية د 1970.[1] هاد تحالف عاود تشكل ف ماي 1992[2] ب سميت لكتلة ديموقراطية ب لأحزاب لي كاينين دابا ب زيادة على منضمة لعمل ديموقراطي شّعبي ؤ تيحاد لوطني د لقوات شعبية، ؤ لي كلهم كانو ف لمعارضة قبل ما تشكل لحوكومة لولة د عبد الرحمان ليوسفي.
مور نتيخابات تشريعية د 1997، قررو تيحاد لوطني د لقوات شعبية ؤ منضمة لعمل ديموقراطي شّعبي يبقاو ف لمعارضة، ؤ خرجو من تحالف، هاكا خلاو تلاتة د لحزاب لخرين يشكلو لكتلة ؤ يشاركو ف لحوكومة.
شارك تّحالف ف بزاف د لحوكومات مورما عاود تشكل، من بينهم حوكومات ليوسفي ب جوج (من 1998 حتال 2002)، لحوكومات بجوج د دريس جطو (2002 تال 2007)، ؤ حوكومة عباس لفاسي (2007 تال 2012).
ف 2011، تفكك تّحالف مورما قرر حيزب ستيقلال ؤ حيزب تقدم ؤ شتيراكية يشاركو ف لحوكومة د لعدالة ؤ تنمية لي ربح نتيخابات تشريعية، ف لوقت لي تيحاد شتيراكي خرج ل لمعارضة.[3]
قبل من نتيخابات د 2016 ؤ 2021، تدارو محاولات باش تعاود تحيا لكتلة والاكين ماصدقوش.[4][5]
- ^ "تأسيس الكتلة الوطنية يوم 27 يوليوز 1970". الاتحاد الاشتراكي (ب لعربية). 2009-09-05. مأرشيڤي من لأصل ف 2022-09-22. تطّالع عليه ب تاريخ 2022-09-20.
- ^ "1992 ميثاق تاسيس الكتلة". الاتحاد الاشتراكي للقوات الشعبية (ب لعربية). مأرشيڤي من لأصل ف 2022-09-22. تطّالع عليه ب تاريخ 2022-09-20.
- ^ Iraqi، Fahd (2016-11-18). "Maroc : il était une fois la Koutla – Jeune Afrique". جون أفريك (ب لفرانساوية). مأرشيڤي من لأصل ف 2022-09-22. تطّالع عليه ب تاريخ 2022-09-20.
- ^ Gattioui، Jihane (2016-01-11). "Tentatives pour ressusciter la koutla, le champ politique bouge". Médias24 (ب لفرانساوية). تطّالع عليه ب تاريخ 2022-09-21.
- ^ El Ouardighi، Samir (2020-02-22). "Le PPS tente de réanimer la Koutla pour survivre aux élections de 2021". Médias24 (ب لفرانساوية). تطّالع عليه ب تاريخ 2022-09-21.
