هشام الݣروج

	هشام الݣروج
	معلومات عامة
زيادة	14 شتنبر 1974 (51 عام); بركان
لجنسية	لمغريب
لحرفة	جراي د لمسافات الطوال، جراي(ة) د لمسافات لمتوسطة، جراي و بطل د لاطليتيزم
لّوغات لي كيعرف	عربية و لفرانساوية
	لكاريير ديال الشخص
شارك ف	لألعاب لأولمپية د الصيف 2004; لألعاب لأولمپية د الصيف 2000; لألعاب لأولمپية د الصيف 1996
	رياضة
رياضة	أطليتيزم
تخصص	الجرا د لمسافات لمتوسطة ; الجرا د لمسافات الطويلة
لجنسية رّياضية	لمغريب
لجوايز	(12 أبريل 2024) honorary doctorate of Polytechnic University of Hauts-de-France; (2014) قاعة مشاهير الاتحاد الدولي لألعاب القوى; (2004) بطل أبطال ليكيب; (2004) وسام لعرش ب ڭراض كوماندان; (2004) لجائزة د لأميرة د أستورياس د الرياضة; (2000) ميدالية بيسليت;

هشام لݣروج، (بتمازيغت: ⵀⵉⵛⴰⵎ ⵍⴳⵔⵔⵓⵊ)، تولد ف 14 شتنبر 1974 ف بركان، هو جراي مغريبي معتازل ديال لمسافات لمتوسطا. لݣروج واحد من أكتر الجرايا لمغاربة لمعروفين ف التاريخ. ف لأولمپياد د أتينا ف 2004، ربح جوج د لميداليات د الدهب (ف 1500 و 5000 ميطرو). ربح لبطولة د لعالم ف 1500 ميطرو 4 د لمرات (1997 - 1999 - 2001 - 2003)، و هو الجراي اللي ما زال عندو الرّوكور لعالمي د 1500 ميطرو.

ف 2014، تختار الݣروج باش يدخل لقاعة دل مشاهير ديال لجمعية دولية د تيحادات جرا.^[1]

رّوكورات

**رّوكورات لعالمية لي حطم**
سيباق		توقيت	تاريخ	لمونافاسا	لبلاصا	مول أخير راقم قياسي
فل هواء طلق	1500 م	3 د 26 ت 00	14 يوليوز 1998	ݣولدن ݣالا	روما	نورالدين مورسلي (1993)
	مايل	3 د 43 ت 13	7 يوليوز 1999	ݣولدن ݣالا	روما	نورالدين مورسلي (1993)
	2000 م	4 د 44 ت 79	7 شتنبر 1999	إسطاف	برلين	نورالدين مورسلي (1995)
فل قاعة	1500 م	3 د 31 ت 18	2 فبراير 1997	سپاركسن-كاپ	شتوتݣارت	نورالدين مورسلي (1991)
فل قاعة	مايل	3 د 48 ت 45	12 فبراير 1997	فلاندرز إندور	خنت	أمن كوݣلن (1981)

لمسيرة ديالو

فاش كان هشام الكروج صغير، كان كيحماق على كرة القدم وكيلعب حارس مرمى، ولكن الأم ديالو شافت فيه الموهبة ديال الجري ونصحاتو باش يمشي للعدو، خصوصًا أنه كان كيعجبو بزاف العداء المغربي الكبير سعيد عويطة وكيعتابرُو قدوتو. من تما قرّر يركز على العدو، والتحق بالمعهد الوطني لألعاب القوى فالرباط عام 1990 وهو عندو 16 عام.

المسيرة الدولية ديالو بدات فـ1995، ملي ربح ببطولة العالم ف ل قاعة فسباق 1500 متر، ومن بعد جاب الميدالية الفضية فبطولة العالم فالهواء الطلق اللي كانت فكوتبورغ فالسويد. ومن بعد، كمل التألق وربح ثلاث بطولات عالم متتالية فـ1500 متر فـ1997، 1999، و2001.

هشام الكروج هو أكثر عداء عربي متوج فبطولات العالم لألعاب القوى، وزيد على هاد الشي راه حامل الأرقام القياسية العالمية فـ1500 متر، المايل، و2000 متر، وكيتعتبر من أحسن العدائين فالمسافات المتوسطة فالعالم، و حتى فالتاريخ.^[2]

الاولمبياد

هشام الكروج عندو تاريخ طويل مع الألعاب الأولمبية. فاش كان فالقمة ديال العطاء ديالو، دخل لأولمبياد أتلانتا عام 1996 وكان قريب بزاف باش يتوّج، ولكن الحظ ماكانش معاه، حيث تصادم مع العداء الجزائري نور الدين مرسلي وطاح فالأرض وسط السباق.

المشاركة الثانية كانت فـسيدني عام 2000، ودوز سباق زوين ولكن جا فالمركز الثاني، وخدا غير ل ميدالية الفضية.

أما المشاركة الثالثة فـأثينا عام 2004، فكانت بصح أسطورية ، حيث ربح جوج ديال الميداليات الذهبية فسباقي 1500 متر و5000 متر، ودخل التاريخ كواحد من أعظم العدائين فالعالم.^[3]

الفوز ف اثينا 2004

فأولمبياد أثينا عام 2004، عاش هشام الكروج اللحظة اللي كان كيتسناها من سنين طويلة، لحظة الانتصار اللي مسحت بزاف ديال الألم من قبل من قبل. هاد المرة قدر يغلب على “اللعنة” اللي كانت معاه من أولمبياد أتلانتا سنة 1996، ملي كان قريب بزاف من الميدالية الذهبية ولكن الزهر ما كانش معاه بعدما تواجه مع العداء الجزائري نور الدين مرسلي وطاح وسط السباق.

من داك النهار، ولى عند الكروج هدف واحد فالحياة: يرد الاعتبار لنفسو وللمغرب، ويحقق الحلم اللي ضاع منو فآخر لحظة.

من بعد، جا أولمبياد سيدني سنة 2000، واللي دخل ليه الكروج بأمل كبير باش يعوض، ولكن الظروف ما كانتش فصالحو، واخا كان الأداء القوي ديالو، جا فالمركز الثاني وربح الميدالية الفضية. كانت فرحة ناقصة، حيت بقى كيشوف فالميدالية الذهبية حلم مازال ما تحققش .

ولكن القدر كان مخبّي ليه المفاجأة الكبيرة فأثينا 2004. كان الموسم قبل الأولمبياد صعيب بزاف، الكروج عانى من مشاكل صحية خطيرة، خصوصًا الحساسية المفاجئة اللي كانت غادي تحرمو من الجري نهائيًا. بزاف ديال الناس قالو أنه ما غاديش يقدر يرجع، ولكن هو ما استسلمش. الإصرار والعزيمة ديالو كانو أكبر من كل العقبات. كان كيعبر دايمًا ويقول: “السباقات هي عشقي الكبير، وأنا ما نقدرش نعيش بلاها”.

دخل هشام الكروج لأثينا بعقلية جديدة، عقلية ديال بطل حقيقي مؤمن بنفسو وبقدر الله. وفـالسباق ديال 1500 متر، دار واحد الأداء تاريخي، قدر يربح الميدالية الذهبية الأولى فمسيرتو، والأولى فالتاريخ ديال العدائين المغاربة فهاد السباق. الجماهير المغربية والعربية كانت فرحانة بزاف بحال الا كانو كلهم كيجريو معاه ف سباق.

وما حبسش الحلم هنا، حيت زاد وربح سباق 5000 متر، ودار “الثنائية الصعيبة” اللي ما قدر حتى واحد يديرها من بعد بافو نورمي الفنلندي سنة 1924. ولى الكروج من قلة العدائين اللي جمعو بين المسافتين وربحو فيهما بجوج، وهاد الإنجاز خلاه يدخل التاريخ من أوسع الأبواب كواحد من أعظم العدائين اللي عرفاتهم ألعاب القوى فالعالم.

هاد التتويج ما كانش غير ميداليتين، بل كان انتصار على الألم، وعلى الشك، وعلى الخوف، وعلى كل لحظة تعب عاشها الكروج فطريقو الطويل. وقال من بعد السباق: “فـسيدني كنت كنبكي فالطريق للاستاد حيت كنت حاس بالعجز، أما فأثينا بكيت بحال طفل صغير من شدة الفرح، حيت عرفت أن الحلم اللي كنت كنعيشه كل ليلة تحقق أخيرًا.”

من بعد التتويج، ما نسا الكروج الناس اللي ساندوه، شكر زوجتو اللي وقفات معاه فكل لحظة ضعف، وشكر المدرب ديالو عبد القادر قادة اللي كان كيعرف شنو محتاج يسمع في كل لحظة. وقال أن كل هاد الشي ما كانش غادي يتم لولا مشيئة الله وتوفيقو.

هاد الإنجاز التاريخي ديال هشام الكروج ما كانش غير فخر شخصي، ولكن كان فخر لوطن كامل. الاتحاد المغربي لألعاب القوى عبّر عن فرحتو الكبيرة وقال أن هاد النجاح غادي يعطي دفعة جديدة للرياضة المغربية، ويفتح الباب قدّام جيل جديد من العدائين، بحال ما دارو نوال المتوكل وسعيد عويطة فـ1984.

فأثينا، المغاربة كاملين، داخل البلاد وخارجها، وقفو ورا هشام الكروج، اللي ولى رمز للإصرار والعزيمة والتحدي. وحتى هو، عبر على فرحتو وقال أنه كيتمنى بنتو “هبة” تفخر بيه ملي تكبر، وتشوف فالقصة ديالو مثال أن الحلم ما كيموتش، غير خاصك تآمن بيه وتقاتل عليه.

القصة ديال هشام الكروج ماشي غير قصة عداء ربح سباقات، ولكن قصة إنسان ما فقدش الأمل، وواجه كلشي بالإيمان والعمل، ودار من كل سقوط انطلاقة جديدة نحو المجد.^[4]

ل جوايز لي خدا

الألعاب الأولمبية

الألعاب الأولمبية الصيفية 2000 في سيدني أستراليا

ميدالية فضية في سباق 1500 متر.

الألعاب الأولمبية الصيفية 2004 في أثينا اليونان