لݣويرة

لݣويرة
بير الذئب (ar)
تاريخ التأسيس	30 نونبر 1920
لبلاصة
لبلاد	MAR لمغريب
لجيهة	جهة الداخلة وادي الذهب
لإقليم	إقليم أوسرد
لجغرافيا
لعلو	2 م
خط الطول بـ °	-17.0893836
خط لعرض بـ °	20.83250212
معلومات خرين
الرمز لجغرافي	2462651
لخريطة

لݣويرة مدينة مغريبية مهجورة و سميتها لقديمة بير الديب وقريبة لمدينة نواديبو فموريطانيا، حيتاش هاد الجوج مدون كيتشاركو شبه جزيرة نواديبو. الناس ديال لݣويرة ساكنين ليوما فمدينة الداخلة (700 كيلوميتر ديال طريق) و صعيب لواحد يوصل ليها بسباب لألغام لي مزروعين فالطريق لي غادية ليها. ليوما كيعس فلمدينة قشلة ديال موريتانيا لي كاتحمي لحدود.

تاريخ

لإستعمار الصبليوني

​فعام 1900، داروا لعسكر ديال لحماية لإستعمارية لفرنساوية ولصبليونية بتقسيم شبه جزيرة راس لبيض لجوج طراف بالطول، فين خداو لفرنساويين لجيهة الشرقية لي تدار فيها لمرسى سميتو إيتيان (نواذيبو دبا)، فلوقت لي خداو فيه الصبليون لجيهة لغربية (لكويرة دبا). ومن بعد سنين على ترسيم لحدود، بدا لإستقرار الصبليوني فلمنطقة عن طريق توجاد مركز عسكري باش يحميو معمل ديال تصبير وتمليح لحوت فلجنوب لغربي ديال راس لبيض، وهكدا تبنات مدينة لكويرة.

​فلوقت ديال لإستعمار لصبليوني، كانت لكويرة مدينة صغيرة وفيها كاع لبنيات لتحتية لمهمة بحال مدرسة، سبيطار، بوسطة، كنيسة، وبنكة. وكان فيها حتى مطار بمدرج ما مزفتش لطلوع ولهبوط ديال الطيارات، وبطوات بلبخار لي كتزدي لمدينة بجزر لكناري باش ينقلو لبشر والسلعة. وكان الصيد لبحري من أهم لأنشطة تيجارية فلكويرة ديك الساعة، وعاون لبني ديال معمل خاص بتصدير وتمليح لحوت فلإستقرار ديال الناس تما. وكتشير لإحصائيات لقديمة ديال الصبليون لوجود 250 أوروبي، وأكثر من 1600 صحراوي من قبائل مختلفة ساكنين فلمدينة، ولكن هاد لإستقرار والتطور لي عرفاتو لكويرة دغيا حبس بسبب صداعات لمسلحة لي زادت بين جبهة البوليساريو ولعسكر الصبليوني، هادشي لي بزز على السكان لأوروبيين يخويو لمدينة.

من عام 1975.

​من بعد ما خرج الصبليون من الصحرا، وتسينات اتفاقية مدريد فعام 1975، تقسمات الصحرا بين لمغرب وموريتانيا، فين دارت موريتانيا منطقة تيرس الغربية لي فيها الداخلة ولعركوب وأوسرد، فلوقت لي تزادت فيه لكويرة لنواذيبو. وبقى صداع لعسكري بين موريتانيا ولبوليساريو على لكويرة، فين سيطرو مجموعة من لبوليساريو عليها وهزو فيها الراية ديالهم، وبقى لوجود ديالهم تما حتى هجم عليهم لعسكر ديال موريطانيا باش تحرر لمدينة، وهاد لهجمات طيحات بزاف ديال لقتلى. وفلخر، شدات موريتانيا عاوتاني لكويرة.

​كملات لبوليساريو حرب لعصابات ديالها على منطقة تيرس الغربية حيت لجيش لموريطاني كان ضعيف بزاف، وحتى لخط ديال التران لي كيهز لحديد من الزويرات لنواذيبو ولا ديما كيتخسر. وبقى هاد لوضع هكدا حتى لعام 1978، فين خرجات موريطانيا من صراع من بعد لإنقلاب لعسكري لي طيّح نظام الرئيس المختار ولد داداه، وسينات موريطانيا ف 1979 اتفاق سلام مع جبهة البوليساريو. ومن بعد هاد لإتفاق، قامت القوات المسلحة الملكية المغربية بالسيطرة على تيرس الغربية، وقدمو لأعيان ديال لمنطقة من مختلف لقبائل لبيعة للملك لحسن لتاني فالرباط فمراسيم دازت مباشرة فلتلفزة، وبهادشي ولات تيرس الغربية طرف من التقسيم لإداري فالمغريب، وتعطاتها سمية إقليم وادي الذهب.

​تخوات لمدينة من كاع السكان ديالها فعام 1989، وأعلنات موريتانيا بلي ما غاديش تخرج لعسكر ديالها من لكويرة، حيت دُخول لعسكر لمغربي للكويرة كيعني طرو مصدعات عسكرية تما، وهادشي غادي يأتر على مدينة نواذيبو لي جات حدا لكويرة، والي هي لعاصمة لإقتصادية لموريتانيا. وتدار اتفاق باش يحرصو لعسكر لموريتانيين لكويرة، ولكن لمياه لإقليمية تكون تابعة للبحرية لملكية لمغربية.

من عام 2020 .

​فنونبر 2020، رجعات لهضرة على لكويرة للواجهة، بالأخص من بعد لعملية لعسكرية لي دارت لقوات لمسلحة لملكية باش تأمن لمعبر لحدودي فالكركرات، فين طرا تبدال كبير فلحزام لأمني لي تحول جيهة لجنوب لجهة موريطانيا من بعد ما كان كيوصل حتى للشرق باش يسالي فسواحل لأطلسي، وهكدا ولى من لمستحيل على لبوليساريو يوصلو للبلاصة فين كاينة لكويرة.

​فأبريل 2021، دوزات التلفزة لمغربية الرسمية (لقناة للولة) فلنشرة ديال لأخبار روبورطاج خاص على لمرسات لبحرية لي غادي تبنى فلأقاليم لجنوبية بالأخص فجهة الداخلة وادي الذهب. هاد روبورطاج بيّن تصويرة فيها بني 3 ديال لموانئ:

• ميناء الداخلة الأطلسي،

• ميناء امهيريز،

• ميناء لكويرة.

​وعلى حساب لمحللين السياسيين، السيادة لمغربية فلكويرة و تعمار ديالها هو كمالة للعملية ديال لكركرات، فلوقت لي مصادر خرى كتقول بلي لمغرب زرب فتعمار ديال لكويرة خوف من لبوليساريو باش ميدوزو ليها من جيهة موريطانيا.

ف التقسيم لإداري

لݣويرة كاتّعتابر مدينة مغريبية و جماعة ترابية حضرية لي جات ف إقليم أوسرد، جهة دّاخلة واد دهاب، فالأقليم دلجنوب ديال بلاد لمغريب ساكنين فيها 0 واحد، على حسب لإحصاء لعام 2014.

تعليم

• نسبة لأمية (نّاس لّي ما كايعرفوش يقراو ولا يكتبو) : 0%
• نسبة سّكان لّي قاريين فوق الليسي (ليسي و جامعة): 0%

إقتصاد

• نسبة نّاس نّشيطين (لّي يقدرو يخدمو): 0%
• نسبة لبطالة (نّاس لّي ما خدامينش و تايقلبو على خدمة): 0%
• نسبة نّاس اللي خدامين ف دّولة (ولا لبيطاليين اللي سبق ليهوم خدمو): 0%
• نسبة نّاس اللي خدامين ف لپريڤي (ولا لبيطاليين اللي سبق ليهوم خدمو):0%

بلاكة ف الطريق الوطنية نمرة 1 كتبين شحال بعيدة الكويرة فلمسافة

مصادر

ويكيميديا كومنز عندا تصاور و معلومات على لݣويرة.

هادي زريعة ديال مقالة خاصها تّوسع. تقدر تشارك ف لكتبة ديالها.