قائمة بلعوشي

قائمة بلعوشي
معلومات عامة
زيادة	8 شتنبر 1964 (61 عام) وهران
لجنسية	لمغريب
لحرفة	صحافي رياضي
لّوغات لي كيعرف	عربية

قائمة بلعوشي (خلاقت ف وهران ف دزاير ف 8 شتنبر 1964) صحفية رياضية مغريبية. هي أول مرا ف لمغريب خدمات صحفية ف رّياضة و أول مرا علقات على ماتشات و منافسات رياضية و دارت تّغطية د أحدات مهمة ف تاريخ رّياضة لمغريبية و ب دّات ف لاطليتيزم و لألعاب لأولمپية.

حياتها

قائمة خلاقت ف تارݣا ف لولاية د وهران ف دّزاير ف عائيلة مغريبية. فاش كانت عندها عشر سنين، ف 1975، و ب سباب صّراع بين لمغريب و لجزائر على ود صّحرا، جراو على لعائلة ديالها (مع لآلاف ديال لمغاربة) من دّزاير، وتما دخلات ل لمغريب و كبرات ف وجدة.

عندها ليصونص و ديو إيس ف تّاريخ، و من بين لأساتيدة لّي قراوها كان أحمد التوفيق، و قرات حتا لمسرح مع ممتلين بحال رشيد لوالي و عبد لكبير رّݣاݣنة و بنعيسى لجيراري.

دخلات ل تّلفزة ف 1985 و كانت أول صحفية رياضية مغريبية و غطات 3 ديال لألعاب أولمپية ف 1996، 2000 و 2004.

ل مسار ديالها

بالنسبة ل قرايا ، قائمة بلعوشي قراّت التاريخ المعاصر وخدمات حتى فالمسرح، حيث كان عندها اهتمام كبير بالفن والثقافة.

فالمسيرة المهنية ديالها، خدمات فالقسم الرياضي فالتلفزة المغربية، وكانت من أول العيالات اللي خدمو فمجال الصحافة الرياضية. واشتهرات بتعليقها على مسابقات ألعاب القوى وبطولات كبيرة بحال الألعاب الأولمبية وبطولات العالم.

وخلال السنوات الأخيرة، تكرمات من معهد علوم الرياضة فجامعة الحسن الأول بسطات، ف النسخة الخامسة من أسبوع الرياضة، عرفانًا بالعطاء ديالها الطويل فمجال الصحافة الرياضية.

وف المستوى الشخصي، تزوجات من رجل أعمال مصري سميتو تامر حسن، والزواج ديالهم بان فوسائل الإعلام سنة 2020.

التصريحات ديالها فل ميدان رياضي

كالت قائمة بلعوشي فواحد من الحوارات ديالها:

"أنا اخترت الصحافة الرياضية حيث كنت ديما كنبغي نكون صحافية، مع العلم أنني كنت ديما الأولى فمساري الدراسي. ولكن واخا هاكاك ، الأساتذة ديالي اللي كنلقاهم هنا فالإذاعة ما كانوش راضيين على الاختيار ديالي، حيث كانوا باغيني نكون أستاذة جامعية أو باحثة فالتاريخ."

وزادت كالت :

"كنقصد هنا أستاذي أحمد التوفيق (وزير الأوقاف والشؤون الإسلامية حالياً) والأستاذ لعوينة. ورغم رأيهم، أنا ديما كنت كنفتخر حيث حققت الحلم ديالي فـ1985، ملي وليت صحافية رياضية. هاد الحلم تزاد فقلبي حيث تربّيت فوسط رياضي: الوالد كان عضو فمكتب نادي توموشانت، وأنا كنت كنلعب الكرة مع خوتي، وكنت كنموت على كرة القدم، خصوصاً حيث الوالد ديالي كان صاحب والد الإخوة الفيلالي اللي كانو كيلعبو فالمولودية الوجدية. ومنين جينا نسكنو فـوجدة، وليت كنشجع المولودية اللي ربحات البطولة فـ1976."

وكتكول بلعوشي:

"لعبت بزاف ديال الرياضات، حتى الريكبي لعبتو مع الرجال! كنت مولوعة بالرياضة بزاف، وحتى الصحافة الرياضية جات من هاد العشق. كنت كنسمع بزاف لتعليق المرحوم اكديرة، وكنت مرات كندّعي المرض باش نبقى فدارنا، ونوقف قدام المراية وندير بحالي كنت كنعلّق على المباريات. وصدفة أخرى، كنت كنقرأ فثانوية مولاي يوسف اللي قريبة من دار لبريهي، وكل نهار كندوز من قدام الإذاعة، كنشوف سعيد زدوق، محمد لحمر، الحسين الحياني، رشيد شباك... وكنت كنحلم نكون بحالهم."

"منين دخلت دار لبريهي أول مرة، كنت عاجبني بزاف. كنت ومنين كنت كنكون بوحدي ،كنت كنو قف قدام المراية ونسول راسي: واش بصح وليت صحافية؟ أنا قائمة بلعوشي، بنت أسرة بسيطة فيها الأب والأم وثمانية خوت، كنسكنو غير فـ جوج ديال البيوت فدوار الحاجة... كنت ما ممتيقاش ، لدرجة كنت كنضرب وجهي باش نتأكد أنني ما كنحلمش!"

وزادت:

"كنت كنشوف قدامي أسماء كبار بحال بديعة ريان، الطاهر بلعربي، خديجة المراكشي، الصديق معنينو، وعبد القادر البودخيلي، وكنت كنحس براسي عندي زهر نخدم معاهم."

"فالقسم الرياضي ديال التلفزة المغربية، كنا كنخدمو فظروف زوينة، عندنا مكاتب مريحة، وعدد الصحافيين تزاد بزاف من 4 حتى لـ13. اللي تبدّل هو أن الوقت اللي كان مخصص للأخبار والبرامج الرياضية نقص شوية بعدما خرجات القناة الرياضية اللي تخصصات فالرياضة. ومع ذلك، بقينا مهتمين برياضة النخبة، وكنا مرجع للإعلاميين الأجانب."

"أنا والزملاء محمد زمان وحسن الحريري كنا محظوظين بزاف حيث حضرنا الألعاب الأولمبية ديال 1996 و2000 و2004، وعدة بطولات عالمية. وكنا ديما كنلقاو المواضيع اللي نخدمو عليها. فاختيار أحسن رياضي، كنا كنعتامدو على المسار الدولي ديالو، وما كناش كنعتامدو على المقاييس المحلية أو الجهوية."

مصادر

هادي زريعة ديال مقالة علا موضوع عندو علاقة ب شخصيات د لمغريب خاصها تّوسع. تقدر تشارك ف لكتبة ديالها.