زعلوك
زعلوك
| ||
 | ||
| معلومات عامة | ||
| سّمية لأصلية | زعلوك | |
| نوع د لماكلة | شلاضة | |
| لبلاد لأصلية | لمغريب | |
| مصاوب من | دنجال، فلفلة حلوة و ماطيشة | |
زعلوك من الماكلات المغربية التقليدية اللي عندها شعبية كبيرة،[1] هاد الماكلة نتاقلات من المغريب للدزاير و تونس واخا كاينين شي ختلافات فالطريقة باش كتصاوب وفالمكونات، ولايني تيبقى البودنجال المقلي، المشوي، ولا المسلوق مع ماطيشة هما الساس ديالها،[2] زيد عليهم الفلفلة الحلوة والحارة. كيتقدم زعلوك يا إما كماكلة رئيسية، ولا غير كشلاضة، تتكون الفايدة ديال زعلوك كتر منين ما تيكونش مقلي؛ زعما يا إما يتصاوب بالشوا ولا بالسليق ولا بتفوار البودنجال والفلفلة وماطيشة والتومة، حيت هكا تيكون فيه بزاف ديال الألياف الغدائية، من حيت مصاوب من شلا خضاري.
كاين اللي تيݣول باللي الأصل ديال زعلوك يهودي. كانو ليهود ديال لمغريب تيصاوبوه زمان نهار الجمعة و تيحافضو عليه حتى ل نهار السبت باش ما يشعلوش العافية حيت ممنوعة عندهم نهار السبت.[3]
تنشرات لوصفة ديال الزعلوك ف جورنال ديلي تيليݣراف البريطاني ف عام 2011 من عند واحد سميتو ستيڤي پارلي.[4] كيما شارت لو نيو يورك تايمز المريكانية فواحد المقال تنشر ف 2005،[5] كيما نعتاتو المريكانية پاولا وولفرت اللي فازت ببزاف ديال الجوائز على لكتوبا ديالها اللي كتباتهم على الماكلة باللي هو أفضل شلاضة مغربية.[6]
- 4 د الحبات ديال البودنجال مقطع دويرات.
- جوج حبات ديال ماطيشة مقشرة ومقطعة مكعبات.
- حبة ديال التومة.
- حبة ديال فلفلة حلوة وحارة
- قزبور ومعدنوس
- كامون والملحة والزيت البلدية مع شوية ديال الخل
تنديرو ماطيشة والتومة وزيت الزيتون والعطرية فمقلا فوق عافية مهيلة وتنبقاو نحركو مرة مرة حتى تكون عندنا واحد لاصوص خاترة. من بعد كنزيدو البودنجال اللي سبق لينا قليناه ولا فورناه ولا شويناه من بعد ما كنقطعوه طريفات صغار وكنبقاو نقلبوه مع المكونات الخرة؛ تنخليو هادشي كامل على العافية واحد 3 د دقايق، ومن بعد تنزيدو القزبور والمعدنوس وحتى طريفات ديال الحامض.[7][8]
تيتقدّم زعلوك فطبسيل يا إما سخون ولا بارد ولا دافي حسب الرغبة ديال كل واحد، كيما يمكن نخليوه فالتلاجة مدة طويلة.
- ↑ "Datebook Diner: Little Morocco wows with pop-up dinner". The Des Moines Register (ب American English). Retrieved 2023-05-29.
- ↑ "Zaalouk (Moroccan eggplant salad) - Toronto Star". web.archive.org. 2017-05-18. Archived from the original on 18 ماي 2017. Retrieved 2023-05-29.
- ↑ Idrissi, Khaoula (2020-01-22). ""زعلوك" أكلة يهودية الأصل". Maroc Local et Nouvelles du Monde - Nouvelles juives du Maroc, dernières nouvelles - מרוקו ג׳וייש טיימס, חדשות מרוקו והעולם - Morocco News - أخبار المغرب (ب العربية). Archived from the original on 2023-06-14. Retrieved 2023-05-31.
- ↑ "Zaalouk recipe". www.telegraph.co.uk. Archived from the original on 2023-05-29. Retrieved 2023-05-29.
- ↑ Bruni, Frank (2005-07-06). "At the Intersection of France and Morocco". The New York Times (ب American English). ISSN 0362-4331. Archived from the original on 2023-06-04. Retrieved 2023-05-30.
- ↑ "Eggplant zaalouk recipe, Paula Wolfert". Gourmet Traveller (ب الإنجليزية). Archived from the original on 2023-06-04. Retrieved 2023-05-29.
- ↑ "Zaâlouk d'aubergines". www.choumicha.ma (ب الفرنسية). Archived from the original on 2023-06-08. Retrieved 2023-05-29.
- ↑ "طريقة تحضير الزعلوك المغربي". موضوع (ب العربية). Archived from the original on 2023-06-14. Retrieved 2023-05-29.