زاݣورة

زاݣورة
‫زاݣورة‬ (ar) ⵜⴰⵣⴳⵓⵔⵜ (tzm)
لبلاصة
لبلاد	لمغريب
لإقليم	إقليم زاگورة
السكان
شحال دالسكان	26,174 (1994)
شحال دلفاميلات	7,898 (2024)
لجغرافيا
لعلو	724 م
خط الطول بـ °	-5.8333
خط لعرض بـ °	30.3333
معلومات خرين
الرمز لجغرافي	2526452
لخريطة

زاكورة (بـ لأمازيغية: ⵜⴰⵣⴰⴳⵓⵔⵜ - تازاڭورت) هي مدينة مغريبية وجماعة ترابية حضرية، او هي العاصمة الإدارية ديال إقليم زاكورة لي تابع لـ جهة درعة تافيلالت. لمدينة جات ف لجنوب الشرقي ديال لمغريب او هي الباب لكبير ديال الصحراء الكبرى ف لمغريب، زاكورة كينة ف الجناب ديال واد درعة المشهور لي كيصاوب وحدة من أطول وأكبر الواحات , لمدينة معروفة من شحال هادي بلي كانت هي البلاصة فين كينطالقو الكوافل ديال التجارة لي كتمشي ل إفريقيا، وباقي تال ليوم فيها داك طبلو الإشهاري القديم لي مكتوب فيه تمبوكتو 52 يوم. على حساب لإحصاء لعام 2024، وصل عدد ديال سكان دلمدينة لـ 42,249 واحد، او هاد العدد غادي وكيكبر بسباب لهنة لي عرفاتو لمدينة او حيتاش تبدلات لبلاصة سياحية او فلاحية كبيرة.

شحال دالسكان او الفاميلات ديال لمدينة

هاد الجدول كيبين المقارنة ديال زيادة ف شحال السكان او شحال دالفاميلات ف زاكورة بين الإحصاء ديال 2014 والإحصاء اللخر ديال 2024، على حساب دكشي لگلتو المندوبية السامية للتخطيط:

العام ديال الإحصاء	شحال دالسكان	شحال دالفاميلات
2014	40,028	6,332
2024	42,249	__

لاصل ديال السمية

السمية د لمدينة جات من جبل زاكورة لي كطل عليه او لي جا ف لجنوب ديالها ف اللغة الأمازيغية، كلمة تازاڭورت كتعني التوام او لا جوج قمام حيت الجبل لي داير بلمدينة عندو جوج قمام باينين او كاين لي كيقول بلي السمية كتعني القلعة حيت لمدينة من ديما كانت كتحمي الواحات ديال درعة من لهجوم د القبايل د الصحرا.

قصة شحال هادي

زاكورة ومنطقة درعة كاملة عندها تاريخ ثقيل ولعبات دور كبير ف تاريخ لمغريب:

• الدولة السعدية: المنطقة د زاكورة اوخصوصا منطقة تڭمدرت لي قريبة ليها هي الدرجة اللولة منين نطلقات الدولة السعدية ف لقرن 16. من هاد الواحة خرجو السلاطين دالسعديين باش يوحدو لمغريب او إجريو على لبرتغاليين من السواحل او هادشي خلى المنطقة تاخد واحد اهتمام كبير ف ديك الوقيتة وتبناو فيها قصبات او زوايات.
• طريق الكوافل (تمبوكتو 52 يوم): زاكورة كانت هي المحطة اللخرة فين كيتجمعو التجار, الجمّالة او الكوافل لي جايين من فاس اومراكش قبل ما يزطمو ف طريق الصحرا القاصحة القافلة كانت كضرب 52 يوم فوق الجمل باش توصل لمدينة تمبوكتو ف مالي هاد التجارة كانت معولة على المبادلة د التمر اوالملحة او حتى بالذهب اوالعبيد او الريش د النعام.
• لمعايشة اواليهود المغاربة: قصر أمزرّو لي جا ف الجنب د زاكورة، كانو ساكنين فيه بزاف د اليهود المغاربة. هاد اليهود كانو حرايفية ف صنعت د النقرة وصنعة النقاب لي كيتزينو بيهم العيالات الأمازيغيات، وبقاو عايشين ف سلام مخلطين مع المسلمين حتى للستينات.

البلاصة او لجو ديال لمدينة

لمدينة جات ف واحد البلاصة قاصحة جغرافيا ولكن عندها سحر ديالها بوحدو:

• واد درعة: هو أطول واد ف لمغريب كيوصل الطول ديالو لـ 1100 كيلومتر كينزل من جبال لأطلس لكبير وكيدوز على وارزازات وزاكورة قبل ما يتكب ف المحيط الأطلسي واخا غالبا كينشف قبل ما يوصل ليه هاد الواد هو العروق د الحياة ف زاكورة او ف الجناب ديالو كاينة غابة د النخل غادية لآلاف الهكتارات.
• لجو: الجو ف زاكورة صحراوي ناشف او قاصح بزاف ف الصيف الحرارة كتقدر تفوت 45 درجة ف الظل او هادشي كيخلي الحركة قليلة بالنهار أما ف الشتا الجو كيكون بارد بزاف ف الليل ويقدر يهبط لتحت الصفر والشتا كطيح قليلة بزاف مكتفوتش 60 ملم ف العام.
• المشاكل ديال البيئة: لمدينة كتعاني من جوج مشاكل كبار: "التصحر" لي كيهدد الواحات بسباب الرملة لي كتزحف، او الجفاف لي هبط المستوى د الما التحتانية بزاف ف السنين اللخرة, هادشي علاش الدولة بدات كدير برامج باش تحمي الواحات.

اللوحة الإشهارية التاريخية والمشهورة ف قلب زاكورة: تمبوكتو 52 يوم

لقتيصاد: الفلاحة، السياحة او الصنعة التقليدية

لقتيصاد د زاكورة واقف على 3 ديال سواري: 1. الفلاحة الواحاتية (التمر اوالدلاح): زاكورة من لكبار المنتجين ديال التمور ف لمغريب. الواحة فيها أنواع مخيرة بحال بوفڭوس، الجيهل او بوسكري وليني ف السنين اللخرة ازدادت فيها الزراعة د الدلاح لي دخلات فلوس صحيحة للفلاحة ولكن دارت مشكل بيئي خطير حيت كتشرب الما بزاف ونشفات الفرشة المائية او هادشي لي خلى الدولة تقنن هاد الزراعة. 2. السياحة ديال الصحرا: لمدينة كيقصدوها السياح الأجانب لي كيبغيو يعيشو الأجواء د الصحرا من زاكورة، كيشدو الطريق فوق الجمال ولا ف الطوموبيلات د الكاط كاط للرملة ف تنفّو او المخيمات ف محاميد الغزلان اوعرق الشڭاڭة 3. الصنعة التقليدية (فخار تامڭروت): على بعد 18 كيلومتر من زاكورة كاينة قرية تامڭروت لي معروفة ف لعالم كامل بـ الفخار الخضر هاد الفخار كيتصاوب بطريقة بلدية قديمة ورثوها الحرايفية من عند بوتهم او جدودهم اوكيعطي واحد اللون خضر فشكل ما كاينش ف حتى بلاصة خرى ف لعالم بسباب تخليطة د الطين او النحاس.

لبني البلدي

لي جا زار زاكورة او النواحي غادي يلاحظ بلي البني البلدي هو لي مسيطر لمدينة دايرين بيها عشرات ديال القصور والقصبات لي مبنية بـ لطوب اولا التراب مخلط بالتبن هاد البني ماشي غير كيعطي منظر زوين مي راه حل ذكي للحرارة المجهدة د المنطقة, حيتاش الطوب كيبرد الدار ف الصيف وكيدفيها ف الشتا لقصور بحال قصر أسكجور او قصر أمزرو باقين شاهدين على هاد الهندسة ديال لبني اللول لي كتحاول وزارة الثقافة تحافظ عليها باش متريبش

لبنية ديال المدينة

واخا زاكورة جات ف القنت د لجنوب، راها مربوطة مع لمدن لخرين:

• مطار زاكورة: لمدينة فيها مطار كيستقبل طيارات من الدار البيضاء، وهادشي كيسهل بزاف على السياح والمستثمرين يوصلو ليها بلا ما يضربو مئات الكيلومترات ف الطريق وخا هو مشي مطار كبير ولين قطي غرط
• الطريق الوطنية رقم 9 : هي الطريق الرئيسية لي كتربط زاكورة بـ وارزازات ومراكش، وكتدوز من جبال تيزي ن تينيفّيفت او واد درعة او كتعرف ديما أشغال باش يوسّعوها وخا هكك باقي فيه مشاكيل بحال فالشتا فبزاف ديال الوقت كتقطع هد الطريق بسباب الشتا او لحجر لكيطيح من الجبال

لعرف او لاصل ديال جماعة

الجماعة د زاكورة فيه تخليطة زوينة د الناس كيعيشو فيه الأمازيغ، العرب اوالدراوة لهما السكان الأصليين د الواحات

• الزاوية الناصرية: زاكورة قريبة بزاف من زاوية تامڭروت اولا الزاوية الناصرية لي تبنات ف لقرن 17 هاد الزاوية كانت مركز ديال العلم او الدين كبير ف شمال إفريقيا، وباقية تال ليوم كتحتضن مكتبة فيها مخطوطات قليلة بزاف ف الطب، الفلك، اوالفقه مكتوبة على جلد الغزال.
• المهرجانات: لمدينة كتنظم كول عام مهرجان زاكورة الدولي للفيلم عبر الصحراء او مهرجانات خرى كتحتافل بـ التمر والتراث اللامادي بحال شطحة الرڭبة, أحيدوس او الشمرة

مصادر

ويكيميديا كومنز عندا تصاور و معلومات على زاݣورة.

هادي زريعة ديال مقالة خاصها تّوسع. تقدر تشارك ف لكتبة ديالها.