جمهورية لكونݣو

لجمهورية د لكونݣو (بلفرانساوية:République du Congo - بلكيتوبا: Repubilika ya Kôngo - باللينݣالا: Republíki ya Kongó)، اللي معروفة تا ب "لكونݣو برازاڤيل" ولاّ غي "لكونݣو" هي بلاد جات ف وسط إفريقيا. تاتحدّها من لغرب لݣابون، من الشمال لغربي لكاميرون، من الشمال جمهورية وسط إفريقيا، من الشرق جمهورية لكونݣو ديموقراطية، من لجنوب أنݣولا، من لجنوب لغربي لمحيط لأطلسي.

لبلاصة اللي فيها لجمهورية د لكونݣو سكنو فيها لقبايل د لبانطو هادي شي 3000 عام، و كانو تيخدمو ف لبيع و الشرا على لواد د لكونݣو. ف 1880 ستعمرات فرانسا لبلاد، و دخلاتها مع لمستعمرات لفرانساوية د إفريقيا لإستوائية. ستاقلات لجمهورية د لكونݣو ف 1960، و دازت من بزاف د لحوايج موراها (ولاّت دولة ماركسية لينينية من 1969 ل 1992، و موراها تحلو لبيبان باش يكونو نتخابات فيها بزاف د لأحزاب). الرئيس د لكونݣو هو دونيس ساسو نݣيسو، هو الرئيس د لبلاد من 1979 لدابا (من غير 5 سنين ما بين 1992 و 1997 اللي كانت فيها حرب أهلية).

تسيكنو ف لجمهورية د لكونݣو تقريبا 5.2 مليون د الناس و لعاصمة ديالها هي برازاڤيل. اللغة الرسمية د لبلاد هي لفرانساوية، و عاد كاين جوج لغات وطنية هوما: اللينݣالا ف الشمال، و لكيتوبا ف لجنوب. لفلوس اللي كاتخدّم هي لفرنك د وسط إفريقيا. لإقتصاد د لكونݣو تيعوّل بزاف على لپيطرول^[1]، اللي تيدخّل 85% من لمدخول ديال الدولة. لجمهورية د لكونݣو داخلة مع بزاف د لمنضمات دولية، بحال لأمم لمتحدة، ليتيحاد ليفريقي، لمنضمة لعالمية د لفرونكفونية، لمجموعة لإقتصادية د بلدان وسط إفريقيا، و لحركة د عدم لإنحياز.

مصادر

^ "في الكونغو - إنتاج النفط القياسي لا يشفع للاقتصاد المأزوم - العن الإخبارية (2019)". مأرشيڤي من لأصل ف 2022-09-29. تطّالع عليه ب تاريخ 2021-03-13.

ويكيميديا كومنز عندا تصاور و معلومات على جمهورية لكونݣو.

[1] "في الكونغو - إنتاج النفط القياسي لا يشفع للاقتصاد المأزوم - العن الإخبارية (2019)". مأرشيڤي من لأصل ف 2022-09-29. تطّالع عليه ب تاريخ 2021-03-13.

[1]