تيزنيت

تيزنيت
ⵜⵉⵣⵏⵉⵜ (shi) ‫تزنيت‬ (ar)
لبلاصة
لبلاد	لمغريب
لإقليم	إقليم تيزنيت
السكان
شحال دالسكان	43,001 (1994)
شحال دلفاميلات	23,860 (2024)
لجغرافيا
لعلو	244 م
خط الطول بـ °	-9.73011017
خط لعرض بـ °	29.69103527
معلومات خرين
توقيت ديال لمدينة	ڭريتينش
السيت الرسمي	tiznit.ma
الرمز لجغرافي	2527089
لخريطة

تيزنيت مدينة مغريبية و جماعة ترابية حضرية كاينة في إقليم تيزنيت، جهة سوس ماسة، ساكنين فيها 74067 نسمة، على حسب الإحصاء العام 2014.

إحصائيات

• نسبة الأمية : 22,2%
• نسبة السكان اللي قاريين فوق الليسي (ليسي و جامعة): 22,9%
• نسبة الناس النشيطين (اللي يقدرو يخدمو): 45,2%
• نسبة البطالة: 14,4%
• نسبة الناس اللي خدامين في الدولة (و البيطاليين اللي سبق ليهوم خدمو): 23,3%
• نسبة الناس اللي خدامين ف لپريڤي (و البيطاليين اللي سبق ليهوم خدمو):40,6%

أصل السمية

مدينة تزنيت عندها بزاف ديال الألقاب، أشهرهم "عاصمة لفضة" حيت لمدينة واعرة فإنتـاج لمجوهرات د لفضة، وكتسمى عاوتاني "اعين الزرقاء". أما السمية ديال "تزنيت" فكيقولو باللي هي نسبة لواحد لمرا سميتها "للا زنينية" وبالأمازيغية كتقرا "تزنيت". كتحكي لأسطورة باللي للا زنينية كانت دايزة من هاد لبلاصة اللي كانت ناشفة، وجاها واحد لعطش شديد كان غادي يقتلها، وبدات كتدعي الله. لكلب ديالها بدا كيحفر برجليه حتى نبع لماء من تحتهم، شربات وحمدات الله، وجلسات تما كتعبد الله.

ومن بعد جاو عند هاد لماء أمازيغ رحالة (إد مكنون) باش يسقيو لبهائم ديالهم وجلسوا حداها. وفاش ماتت "للا زنينية" (تزنيت بتشلحيت) تدفنات فداك لمحل فين كانت كتعبد. ومن بعد سكنوا تما قبائل إدو طلحة و إدوكفا و إدوزكري اللي تسمى عليهم حومات لمدينة وبناو جوامع بسمياتهم.

التاريخ

تأسسات مدينة تزنيت عام 1882م فاش كان السلطان المولى الحسن الأول كيدير لحركات ديالو فمناطق سوس. لغرض من التأسيس كان هو يوقف أي محاولة ديال لأوروبيين باش يدخلو من جيهة المحيط الأطلسي ويحد من نفوذ زاوية تازروالت بإليغ.

تم اختيار لموقع ديال تزنيت حيت قريب من لبحر (14 كلم) وجاي فطريق التجارة اللي غادة من كلميم لـ الصويرة، وزيد عليها أن لبلاصة أصلا كانت مسكونة من ناس "أزاغار تزنيت". تجمعات الدواور الصغيرة بسور لعلو ديالو 8 متر وطولو 7 كلم. هاد السور خدا عامين ديال لبني؛ و تصاوب بحال السور ديال لمدن لعتيقة، فيه 56 برج و6 د لبيبان (باب آكلو، باب الخميس، باب تاركا، باب المعذر، باب أولاد جرار، باب العوينة). لهندسة ديال هاد لبيبان كتشبه للهندسة العلوية وكتشبه بزاف لبيبان مدينة الصويرة. لداخل ديال لمدينة مقسوم لحومات بسميات لعائلات لقديمة، والديور مبنيين على الطراز لمغربي لأندلسي (الرياض).

وكاين فـتزنيت قصر لخليفة (ممثل السلطان) وساحة لمشور فين كيدوزو لمراسيم. من بعد ما تبنى السور، ولات تزنيت مركز إداري وقاعدة عسكرية مهمة للمخزن باش يحمي لبلاد من لأطماع ديال لأوروبيين فالسواحل د أيت باعمران وطرفاية. وفبداية لقرن 20، جا لـتزنيت الشيخ ماء العينين، زعيم لمقاومة فـالصحراء، وجلس فيها حتى مات وتدفن فيها عام 1910. وخلفو ولدو أحمد الهيبة اللي قاد لحركة د لجهاد ضد لفرنسيين. وفمارس 1917، دخلات لقوات لفرنسية لـتزنيت من بعد ما جات بحركة عسكرية من مراكش عبر أكادير.

السكان

على حساب الإحصاء ديال 2014، لمدينة فيها 699 74 نسمة.

التعليم

مدينة تيزنيت فيها اعدادات و ثانويات من بينهم :

* إعدادية مولاي رشيد

* إعدادية النور

* ثانوية ابن سليمان الرسموكي

* ثانوية الحسن الثاني

* ثانوية الإمام مالك

* ثانوية أركان

* ثانوية الوحدة

* ثانوية المسيرة الخضراء (فيها عاوتاني أقسام ديال ب ت س)

لمعالم التاريخية

القصبة لمخزنية

جات حدا لعين الزرقاء، لمساحة ديالها 6704 م² وفيها 5 د لبروج. كترجع للقايد الحاحي محمد أغناج اللي دار حملة على سوس فعهد المولى سليمان عام 1810م. كانت مركز باش تثبت سلطة لمخزن فمناطق سوس.

لعين الزرقاء

كتسمى عاوتاني "العين أقديم"، وهي لعين اللي كتحكي لأسطورة باللي وحدة من لعيالات هي اللي اكتشفتها بالصدفة، وهاد لحدث كان هو لبداية د لمدينة وتجمع لقبايل لخمسة: إدطلحة - إيدكفا - إيداو مكنون - إدزكري - أيت محمد.

لمسجد لكبير

من أهم لمراكز العلمية والدينية فسوس، جا فـحومة إدطلحة. عاود بناه القايد سعيد الكيلولي، ومن بعدو كملوه قياد خرين. تخرجوا منو علماء كبار بحال الحسن بن الطيفور السموكني.

لقصر الخليفي

ساحة المشور

معلمة تاريخية فـلمدينة لقديمة، تبنى فـلخر ديال لقرن 19 من بعد ما كمل لبني د السور. سكنوا فيه بزاف د لقياد اللي كان كيصيفطهم لمخزن.

السور لحسني

فاش زار السلطان الحسن الأول منطقة سوس فـ 1882م، قرر يبني سور يدور على الدواور د تزنيت باش تولي حصن كيحمي لبلاد وكيربط بين الصويرة و الصحراء. السور عاون باش لمخزن يراقب السواحل لجنوبية ويحد من التحرشات ديال لأوروبيين. لبني بدا فـ 1882م (1300هـ) وخدا عامين ونص. طول السور 7.5 كلم ولعلو ديالو 8 متر، وفيه 5 د لبيبان وزادو من بعد 2 خرين. تبنى بالطين، لحجر، والتبن والجير.

لمرافق لعمومية

لمدينة فيها بزاف تاع لمرافق :

1. دار الثقافة.
2. لمراكز سوسيوثقافية.
3. خزانة المختار السوسي (لوسائطية).
4. ملعب لمسيرة.
5. قاعة مغطاة (أناروز).
6. لمسبح لبلدي.
7. سبيطار إقليمي.
8. محطة طرقية.
9. مجمع الصناعة التقليدية.

الرياضة

تزنيت فيها أقدم فريق فـالجنوب هو نادي أمل تزنيت اللي تأسس فـ 1948. لعب فلقسم التاني من 1975 لـ 1988، ووصل لثمن نهائي كأس العرش فـ 2010.

مدن تومية( بحال الخوت)

تزنيت دايرة تومية مع:

* فرانسا - سان دوني
* ميريكان - سومرفيل
* تركيا - إزميت

شخصيات

* محمد المختار السوسي.
* ربيعة الشهبة.
* الحسن بن الطيفور السموكني.
* الشيخ ماء العينين.
* الرايس الحاج بلعيد.
* محمد خير الدين.

مصادر

ويكيميديا كومنز عندا تصاور و معلومات على تيزنيت.

هادي زريعة ديال مقالة خاصها تّوسع. تقدر تشارك ف لكتبة ديالها.