تخربيق

التخربيق ؤلا لهضرة لخاوية هيّ أي شكل ديال التواصل، لهضرة ؤلا لكتابة، ؤلا شي سيستيم أخور د الرشمات، لي ماعندو تا شي معنى ؤلا لوجيك. ف لهضرة لعادية، التخربيق يقدر يكون شي حاجة لي ماعندها لا ساس لا راس، ؤلا شي حاجة لي كاتجيب الضحك. لؤدابا، الشوعارا، لكتاتبيا و لفنانين يقدرو يخدّمو التخربيق إما باش يخلقو إحساس ب لمتعة عند لمتلقي ؤلا باش يوصّلو شي فكرة. ف لفلسفة و الصيونص، التخربيق كيقابل لمعنى، و لفلاسفة و لعولاما كيحاولو يلقاو طرقان متناسقة و لوجيك باش يميّزو مابين لمعنى و التخربيق. ف لكريپطوڭرافيا، كيدرسو لمتخصصين كيفاش يتم التمييز مابين السينيال signal (لمعنى) و الصداع noise (التخربيق) ف شي ميصاج رقمي متلا.

ف لأداب

"لكتاب د التخربيق" The book of nonsense (1875) ديال إدوارد لير

تشومسكي كان دار الجوملة لمشهورة "لأفكار لخضرا لي بلا لون نعسات غضبانة" كا ميتال ديال شي تعبير لي كلمة ب كلمة عندو معنى و تابع لقواعد د لڭرامير، ولاكين لمعنى لعام ديالو تخربيق. وخا داكشي كاينين ناس د التخمام و فلاسفة بحال لودڤيڭ ڤيتڭنشطاين، ڭالو بلي التخربيق يقدر يكون عندو معنى ف شي سياق محدد، و بلي لمعنى متعلّق ب "لقواعد د اللعب ب لهضرة" language game لي كيحطهوم لواحد . متلا يقدر لواحد يعطي شي معنى خاص ل كلمة "خضرا"، "بلا لون"، "نعسات"...

ميتال أخور هوّ لأغنية د لمخيمات أ رام سام سام، لي أصلها من لمغريب، و تشهرات ف لعالم كامل، ولاكين كلماتها ماكيفيدو تا شي معنى.

ف لكريپطوڭرافيا

لپروبليم ديال تمييز لمعنى من التخربيق عندو أهمية كبيرة ف لكريپطوڭرافيا و مجالات خرين متعلّقين ب الداكا؛ حيت متلا خاصهوم يميّزو السينيال من الصداع ف شي داطا ؤلا طرونصفير د لمعلومات. كاينين ألڭوريتمات طوّروهوم لحرايفيا د لكريپطو باش يحددو واش شي تيكست تخربيق ؤلا لا. هاد لالڭوريتمات عادةً كيحلّلو لوجود ديال معاودات repetitions ف التيكست ب واحد التعاويدة متوقّعة ف شي تيكست عندو معنى. بحال حروف ؤلا كلمات لي كيبانو كتر من وحدين خرين، متلا "ديال"، "و"، "ف"، و غيرهوم. ب لموقابيل، ف لكريپطاج كيحاولو لحرايفيا باش يخلّيو التوزيع د الرشمات و لكلمات عشوائي باش لكريپطة ماتعطيش شي دخلة ل شي واحد باغي يفّكّها.