بوسكورة

بوسكورة
‫بوسكورة‬ (ar) ⴱⵓⵙⴽⵓⵔⴰ (tzm)
لبلاصة
لبلاد	لمغريب
لإقليم	إقليم النواصر
السكان
شحال دالسكان	200,359 (2024)
شحال دلفاميلات	23,319 (2014)
لجغرافيا
لعلو	138 م
معلومات خرين
الرمز لجغرافي	6546277

بوسكورة مدينة مغريبية و جماعة ترابية حضرية كاينة ف إقليم نّواصر، جهة دّار لبيضا سطات، ساكنين فيها 100176 واحد، على حسب لإحصاء لعام 2014.

تعليم

• نسبة لأمية (نّاس لّي ما كايعرفوش يقراو ولا يكتبو) : 25,3%
• نسبة سّكان لّي قاريين فوق الليسي (ليسي و جامعة): 15,2%

لمجال لخضر

كتعتبر بوسكورة رية لخضرة ولمتنفس ديال لأوكسجين لمدينة الدار لبيضا، لي كتعاني من التلوت ونقص حاد فلمساحات لخضرة بلإضافة للزحام ديال السكان، وهادشي بفضل غابة بوسكورة، لي هي وحدة من لغابات لكبيرة فلمغريب وكتجذب عدد كبير من السكان ديال الدار لبيضا فلويكاند (نهاية لأسبوع) وفلأعياد. وأغلب الأشجار ديالها هي من "لكاليبتوس".

السكان

لعام	1994	2004	2014	2024
لعدد ديال السكان	22.818	92.259	103.026	200.359

السكان ديال لمنطقة الشاوية كيرجعو لأصل ديالهم لجدور عربية. ولكن بزاف ديال السكان فمدينة بوسكورة، لي كبرات بشكل خيالي فلعقود للخرة، أصلهم أمازيغي، وأغلبهم هاجرو من لمناطق الجبلية والصحراوية ديال لجنوب لمغربي فلنص التاني ديال لقرن لعشرين.

لإقتصاد والتاريخ

​فلبديا ديال لقرن لعشرين، كانت بوسكورة جماعة قروية صغيرة كتركز على لفلاحة، ولكن من بعد لإستقلال ديال لمغريب (1956)، تطورات ولات مدينة كبيرة كتركز على لخدمات، وكيسكنو فيها بزاف ديال الناس لي خدامين فلدار لبيضا. فلنواحي ديالها، تبناو بزاف ديال لمصانع الصغيرة ولمشاريع تجارية ولحرفية.

​وكيتعتبر لمصنع ديال واحد شركة أوروبية من أكبر لمشغلين فلمنطقة، حيت عندها فبوسكورة مصنع متطور كينتج لموصلات لي مصاوبة من "سيلينيوم كاربيد"، وهاد لموصلات كيتستعملو فالطوموبيلات لإليكتريك لعصرية.

• نسبة نّاس نّشيطين (لّي يقدرو يخدمو): 53,3%
• نسبة لبطالة (نّاس لّي ما خدامينش و تايقلبو على خدمة): 12,3%
• نسبة نّاس اللي خدامين ف دّولة (ولا لبيطاليين اللي سبق ليهوم خدمو): 3,8%
• نسبة نّاس اللي خدامين ف لپريڤي (ولا لبيطاليين اللي سبق ليهوم خدمو):65,5%

تعمير

كتوفر لمنطقة ديال بوسكورة على مساحة خضرة واسعة وقرببة من لمحاور ديال الطرقان الجداد، بلإضافة للوجود ديال محطة التران على خط ديال سكة كيدوز وسط مدينة الدار لبيضا نيشان للمرصى،لمناخ ديالها معتدل وصحي.

هادو عوامل مهمة خلاتها قبلة ومحط أنظار بزاف ديال الناس لي كيقلبو على لهدوء ولحياة لصحية.

وبدات كتعرف فهاد لوقت للخر طفرة عمرانية مهمة، بحال لبني ديال لقناطر وتوسيع الطرقان، ولبني ديال بعض لمرافق الخاصة.

وعرفات بوسكورة لإنجاز ديال مشروع عمراني بمقاييس إيكولوجية صديقة للبيئة، حدا لغابة نيت، تحت سمية "مشروع لمدينة لخضرة".

السوق لأسبوعي

لمنطقة فيها نشاط اقتصادي وثقافي تقليدي كيتجلى فالسوق لأسبوعي لي سميتو "أحد بوسكورة" (لي كان كيتسمى تلات بوسكورة شحال هادي)، وكتباع فيه كاع أنواع لفواكه ولخضرة وللحوم لطرية، وفيه محلات ديال لشوا، وأنواع مختلفة ديال لدواجن ولحيوانات لبرية، هادشي بلإضافة للأسواق لتجارية لعصرية، وعرفات لبني ديال بزاف ديال لعقارات لفاخرة ولفنادق ديال لأندية الرياضية.

مصادر

ويكيميديا كومنز عندا تصاور و معلومات على بوسكورة.

هادي زريعة ديال مقالة خاصها تّوسع. تقدر تشارك ف لكتبة ديالها.