الجديدة هي مدينة ساحلية مغربية كاينة فجهة الدار البيضاء سطات، ؤكطل على المحيط الأطلسي. كاينة لمدينة بين خط طول 8°31′22″ غرباً ؤخط لعرض 33°14′3″ شمالاً، ؤبعيدة على الدار البيضاء بحوالي 90 كلم. كتعتبر الجديدة من المدن اللي تأسسات كجماعة ترابية حضرية فـ 8 أبريل 1917.[1]
ف لقديم كانت الجديدة عبارة على برج قديم سميتو برج الشيخ ساكنين فيه ناس لمنطقة،وكان تحث سيادة ديال مملكة فاس فعهد لوطاسين، ولكن من بعد تأزمت لأوضاع ودخلو البرتغاليين واحتلوها بحكم موقعها وخيراتهاوسموها مزاكان وبناو واحد لحي خاص بيهم جنب لبحر لباقي ليومنا هذا شاهد على هاذ الفترة لستعمرو فيها لمدينة، ايوا مور واحد لحصار لطويل بزاف قدر سلطان سيدي محمد بن عبد الله يحررها فعام 1769م،ولكن هاذ لبرتغالين مساهلينش ملي شافو راسهم خارجين ناضو بغاو يخربو لمدينة وفجرو لقنابل فكل لبلايص وهدموا اغلبية داك شي لبناو وبسباب هاذ شي ولات تتسمى لمدينة لمهدومة،ولكن فعهد مولاي عبد الرحمان فعام1832 أمر باش لمدينة تعاود تبنى من جديد وفعلا تبنات وولات سميتها جديدة،ومرة اخرى غادة طيح فيد لمستعمر هاذ لمرة لفرنسي فعام 1912،عاود تسمات من جديد"بمازكان"، ولأنها كشبه في لموقع ديالها لبحال لجزيرة ولجو ديالها لمدينة دوفيل الفرنسية فوصفها "ليوطي"لي هو (أول حاكم فرنسي على لمغرب) "بـدوفيل المغرب". وفي الاخير بعدما المغرب خدا الاستقلال ديالو رجعات لمدينة اسم ديالها لي هو "جديدة"لبقات حتال دابا[2]
الجديدة مدينة لعندها واحد لموقع ستراتيجي واعر بزاف جا حدا لبحر لموقع بحال شي جزيرة وجات حدا غابة و هو لي ك يعطيها لجو رطب و ما سخون بزاف على طول لعام . لبلدية ديال مدينة الجديدة ك يحدها من لجهة ديال شرق واحد جماعة ترابية ك تسمى الحوزية. و من جهة وحدة خرى قرية سميتها مولاي عبد الله. و من جهة ديال لجنوب سيدي أبو زيد لي هي مدينة صغيرة فيها البحر ، ك تبع لإدارة ديالها ل مولاي عبد الله (مركز حضري) ك يسكن ف الجديدة لعامل تاع إقليم الجديدة و بلاصة ديالو هي لعمالة لعنوانها ديالها هو لملاقية تاع شارع لجيش لملكي و شارع حمان الفطواكي.
مدينة جديدة بحال كاع لمدن ساحلية لتطل على لبحر فالجو ديالها غالبا بارد وريح قوي خصوصا هي بحال لجزيرة، الجو فيها متقلب بزاف تقدر في نهار واحد تعيش كاع لفصول،الجو معتدل ف الشتا وف صيف و قليل بزاف فاش كتكون لحرارة طالعة ، ولكن مع رطوبة بزاف تتحس بالصهد على جهد والجو مخنوق
وخا لحرارة ما كتفوتش 24 في لغالب.
تصويرة جوية ديال لجرف صفرهي لمحرك ديال لمدينة هاذ شي بفضل لقطب صناعي ولوجستي ديال ( لجرف صفر) لي يتعتابر لمحرك رئيسي لقتصاد ديال لمدينة ولمغرب بصفة عامة حيتاش هو اكبر ميناء منجمي في افريقا كاملة، ومن بين صناعات لتيصنع هي صناعات لكيماوية لتينتج فيها لأسمدة ولحامض الفوسفوري.. وتيصدرهم لعالم.
وتينتج طاقة: فيه محة كبير لتتنج طاقة لحرارية للتؤمن لحتياجات ديال لمغرب من الضو، وزيد راه خدام على لمستقبل باش ينتج لمواد ديال بطاريات اللوثيوم ولهيدروجين لخضر لي هو لمستقبل، ولجرف وهو لي كيساهم فرواج تجاري لمدينة كيشتاغلو في الاف ديال ناس من جنسيات ومدن مختلفة، كين بعيد على جديدة بديك 17 كلم في جنوب .
بحكم ان لمدينة جات فواحد لمجال لسهلي وفيه تربة مزيانة لي هو سهل دكالة لتتعابر جديدة هي لعاصمة ديال دكالة، فلفلاحة هي واحد ركيزة مهمة ومصدر درزق لبزاف لفلاحة وتجار.
بحكم ان جديدة جات على لبحر فهي ديما لجو ديالها معتادل ولمكانتش شتا تتكون ضبابة خصوصا لبلايص لقراب لبحر، هاذ لجو وزيد عليه تراب ديالها متنوع ومزيان لفلاحة كاين (لحمري، ورمل).
هاذ دايرة سقوية ديال دكالة من بين اكبر دواير يال سقو في لمغرب كلو، وتيسقوها من لما لجاي من سد ديال لمسيرة لواخد لما من واد أوم ربيع، وهاذ لمنقطة فيها جوج نواع ديال لفلاحة سقوية، ولفلاحة لبورية.
لمنطقة معروفة بلي فيها لحليب بزاف حيتاش كاين لخير موجود ربيع ولما هاذ شي لتيخلي لفلاحة يكسبو لبهايم بزاف وينتجو لحليب ويدفعوه لثلاجات لتيدفعوه لوزين سونطرال لكاين في دخلة دجديدة.
بحكم ان لمدينة ساحلية فراه بفضل بحورها تتجدب سياح وزوار كثار، خصوصا في صيف لبحور ديالها لمزيانة لعومان ومعروفة هي.
لمنتجع ديال مازكان:
لمعروف عالميا بالفخامة ديالو، فيه كل ليبغيه اي سائح من راحة وقهاوي ومطاعم و صالات درياضة وملاعب ديال لغولف، وترفيه وزيد زيد كلشي فيه، تيجيو ليه غي رجال لأعمال ولبورجوى حيث دخلة ليه خالية بزاف.
سيدي بوزيد:
بحر ديال سيدي بوزيدبعيد تقريبا بديك 5 كليومتر على وسط لمدينة، معروف بالبحر ديالو زوين وصافي ورملة لمذهبة ونقية، وزيد لقهاوي ولمطاعم لتطل على لبحر، وسكن موجود لفيلات بزاف فين تيجيو زوار يكريو اتمنة زوينة مقارنة مع بلايص اخرين[3].
لحدا لحي لبرتغالي هاذ لبحر تيقصدو اغلبية ناس حيث زوين لعومان وفيه رملة ماشي صخر تيتمشاو فيه ناس ويمارسو مختلف رياضات وتيجيو يديرو فيه لكوتي تيجيو طوابل ولكراسى ويدوز وقت زوين، وفيه حتى هو قهاوي بحال امواج ومطاعم تيطلو على لبحر فواحد لجو ولا في لخيال.
لماكلة في جديدة متنوعة بزاف وطاغي عليها لاكل تقليدي لبلدي بحال كسكسو رفيسة بحكم ان لمدينة جات قريبة لبزاف دواور لمزال محافظين على ثرات وخصوصا لماكلة طبيعية ديال جدودنا.
ولمدينة بحكم فيها لبحر راه معروفة بحوت بانواعو وكاين مطاعم متخصة غي فهاذ نوع وبجودة مزيانة.قصرية كسكسووفيها بزاف لقهاوي ولمطاعم باثمنة وجودة مزيانة.
تعليم تيتعابر هو ركيزة ديال الامم وتطور ديالها، ومدينة جديدة واعية بهاذ سياسة على هكاك كاين تنوع في لعرض وبنية تحتية قوية بزاف كتغطي كاع لمسوتيات دراسية من تعليم لاولي حتال لجامعة.
لفيه ( روض، لبتدائي، لاعدادي، ثانوي) عدد تلامذ لتيقراو فهاذ لمستويات على حساب لاحصاء ديال المديرية الاقليمة لموسم ديال 2025و 2026 بلغ تقريبا 200000 تلميذ وتلميذة في لمدراس بجوج لعمومي ولخصوصي[5].
لبنية تحتية ديال لمدينة فيما تيتعلق بتوفير لمدارس فراه كاين عدد كبير من لمدارس للتتغطي لمدينة كاملة وكاين توجه لمدارس ديال ريادة بزاف باش يحسنو من لجودة ديال تعليم.
وتعليم لولي عرف واحد تطور كبير في سنين لاخرى وولى فكاع الاحياء وحتى دواور لقراب لمدينة.
صورة ديال ريئاسة جامعة شوعيب دوكاليجديدة تتوفر على جامعة كبيرة لهي جامعة شعيب دوكالي، للتجذب كل عام طلاب من كاع لمدن لمغربية بالخصوص لمدن لمجاورة لجديدة بحال سيدي بنور وزمامرة وولاد فرج.. لعدد ديال طلبة تجاوز 31000 فلموسم لجامعي 2025 و2026 .[6]
هاذ لجامعة تضم لينا بزاف ديال لكليات بحال ( كلية لاداب والعلوم الانسانية، وكلية لعلوم، وزيد كلية لعلوم لقانونية ولقتيصادية وجتماعية) ، وفيها مدارس لي هي ( لمدراسة لوطنية لتجارة وتسيير، ولمدراسة لوطنية لعلوم تطبيقية، وزيد مدراسة لعليا ديال تكلنولوجيا.
وهاذ لكليات ولمدارس فيها تقريبا 710 أوستاذ جامعي وكثر من 270 واحد في الادراة[6].
مدينة جديدة تتميز بصورة مشرفة فمجال ديال رياضة، عدها تاريخ طويل وزوين وحتى لبنية تحتية طورات في سنين لاخرة، هاذ شي عطاها صورة مزيانة في لمغرب وخصوصا جهة دار لبيضا سطات
جديدة معروفة بالفريق تاريخي ديالها لي هو ديفاع لحسني لجديدي لتأسس فعام 1956، وهو راه من لاندية لعريقة في لبطولة وعندو بلاصتو، جاب كاس لعرش ف 2013، ومثل لمغرب في منافسات على برى. وعندو لمحبين ديالو لكثار وتكونو فيه لاعبين كبار.
لمدينة فيه بزاف دلملاعب لبزاف رياضات، كاين ملعب لعبدي وهو لملعب لكبير في جديدة لتتلعب فيه لكورة، وملعب شهب، ولقاعة لمغطاة ديال نجيب نعايمي وديال شاكري هاذ لقاعات تتلعب فيهم كورة لقدم، وليد، وسلة..
وزيد لملاعب ديال لقرب لكاينة تقريبا فكاع لأحياء، بحال سعادة، حي سلام، سيدي موسى، لحي لبورتغالي.. [7]
بسباب لموقع ديال لمدينة لمتميز على لبحر فهي وجهة لزاف مبحي هاد لالعاب لبحرية، بحال لالعاب ديال شراع والكاياك وكيديو مسابقات فهاذ رياضة، ولكرة شاطئية خصوصا في بحر دوفيل في صيف تيكونو لمسابقات، وركوب فوق لماج خصوصا في بحر سيدي بوزيد لمعروف بهاذ رياضة خصوصا في لوقت ديال شتا. [8]
كاين مركز دلمعارض محمد سادس لي كل عام في شهر اكتوبر تيدار فيه معرض لفرس دولي لي كي عتابر اكبر تظاهرة ديال هاذ رياضة في افريقيا كاملة، وتيجيو ليه متسابقين وعارضين من لعالم خصوصا لخليج، وكي عرف واحد لاقبال مهم من زوار من كاع لمدن بالخصوص لعشاق هاذ رياضة ولخيل بالخصوص.
كاين محطة تران بحي نجد للتوفر خط مباشر من جديدة لدار بيضا ومن تم لكاع لمدن بحال مراكش رباط طنجة، رحلات تتكون تقريبا كل جوج سوايع رحلة للمدة ديالها تقريبا ديك ساعة وعشرين دقيقة لدار بيضا.
لكنتي جاي لجديدة سياحة تمتع بالجو زوين ديالها وتشوف لماتر ديالها ولا جاي لمعرض لفرس ولا موسم مولاي عبد الله ولا شي سفر ديال لعمل، وبغيتي تعرف فين ممكن تكلس هاذ لفترة عندي ليك قائمة بكلشي ممكن تبغيه ولاخيار تيبقى لك نتا وجيبك:
.jpg)
