كتيئاب
لكتيئاب ولا دّيپريسيو ولا غمامة هي واحد لمرضة نفسانية (تزعزيعة عقلية) واللي فيها واحد لحالة دلغبينة معا واحد لحسان بهم عميق، بنادم اللي مغبون و مغموم مكاتكونش راشقة ليه ومكاتكونش عندو لا ݣانة لا خاطر و عندو تخميمات كحلة زحلة و لواعرة هيا كايحس براصو قيمتو كاتسوا زيرو فهاد الدنيا.
ماخافيش باللي غمامة واحد لمحنة شايعة و صعيبة ماشي على لمريض بوحدو اللي كاتهاوشو على فكارو و خدمتو ماكيبقاش مسوق ؤلا مشتاق لشنو عاجبو ولايني حتا على قرابو و صحابو و دوارو(محيط ديالو)، لمريض كايصدق ماباغي والو كايميل لعزولية وفلغالب شاد فراشو جامد مضمر كرابو وبالو مغيب.
حݣا، غمامة داخلة فلكلاصمة ديال DSM-5، و اللي كاتعتابر لمرضة الجاوجة اللي كاتعضّر بنادم فحياتو لجتيماعية و لفاميلية و ف لخدمة ديالو، بلمعاينة دلحسابات، بان باللي من عام 2000 ل 2020 لغمامة دازت من لموضع الرابع للموضع الجاوج مورا مرضات لقلب، علا حساب لمونضامة دالصحة لعالامية (OMS) غادي تكون هي اللولة بلمجية ديال 2030 هادشي كايبين لوعورية ديال هاد لمرضة اللي ماساهلاش واللي ضاربة 15% دلبشري فلعالام و اللي ماقالتهومش من ضرارها ؤ باسها.
لمديدة ديال غمامة مامشابهاش؛ تقدر دّوّز غير شي يامات و لا ݣاع شي سيمانات ولايني تقدر تݣلس شهور معدودة شوف حتا شلا عيمان، داكشي علاش كانفرتّوها لتلاتة د النوايع :
- عيانة.
- وسطانية.
- مجهدة (واعرة): فاش كاتكون مجهدة، غمامة تقدر تدفع بنادم باش يقتل راصو.
لغمامة عندها بزاف د ليماري، بحال دابا :
- حسّان بلحزينة ؤ لهموم.
- مايبقاش يعجبك داكشي اللي كان كايعجبك ياد(ديجا).
- باس(بأس) فالشهية.
- باس فالنعاس ، بزاف ولاً شوية.
- غبران الجهد ولاً زيادة فالعيا.
- لحسّان بالدنب وباللي داك فلان مابقات عندو حتا قيمة .
- صعوبة فالتخمام و لملاݣية ديال لفكار و قلة التاكوصونطريت على لخدمة.
- التفكار فلموت و قتيلة الدات.
هاد ليماري خاص يبقاو فلقليلة جوج سيمانات باش يتكاشف مولاها باللي راه مريض بلغمامة. سبايبها تقدر تكون طبية بحال توحيمة فلمخ، ولا غير نقصان فشي نوايع دلفيتامينات فداتو، يقدرو يكونو ليماريهوم بحال دلغمامة. هادشي علاش خاص يتعرف السباب لمزوار (الرئيسي) ديال هاد ليماري.
- 1 من 15 ملّ[1] غاشي يقدر يمرض بلغمامة فوقيتة من حياتو.
- لغمامة تقدر تجي ل شي فلان فݣاع لعمار، و لايني فلعادي، كايبان فاللخر دلمراهقة حتال النصاصة دلعشرينات.
- لعيالات ملحوݣين كتر من الرجال باش تجيهوم لغمامة. شي قرايات كاتݣول باللي التلوت دلعيالات غادي تلحݣهوم غمامة مجهدة فشي مرحالة من حياتهوم.
- ^ باش نوزنو كلامنا : من لغاشي=> ملّغاشي (فالداريجة ...ن+ل...=لّ)ديك النون كاتمشي و كاتزاد الشدة للام) شوف متال خر : من اللخر=>ملّخر
|
تقدر تزيد شوف بزاف د تّصاور و لمعلومات ديال Depression (mood) ف ويكيميديا كومنز. |
|
|
تقدر تزيد شوف بزاف د تّصاور و لمعلومات ديال Major depressive disorder ف ويكيميديا كومنز. |