ݣلية
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
ݣلية
| ||
 | ||
| خصايصو | ||
| كاين منو | الذرة *زبدة *زيت السمك | |
| معلومات خرين | ||
| رمز ديال ليونيكود | 🍿 | |
الݣلية (ولا كيفما كايقولولها البوب كورن) هي واحد لأكلة كادتدار من واحد النوع خاص ديال البشنة ، كايسماوه باللاتينية (Zea mays everta)، والخاصية ديالو أنه كايترطق ويطرطق ملّي كايتسخن. ملّي كاتسخّن هاد الحبات ديال البشنة دغيا ، ذاك الما والميديتي اللي داخل فيها كايولي بخار. وفي واحد اللحظة معينة، الضغط كايزيد ويكبر حتى كايفرتك القشرة الفوقانية البرانية، وكايخرج ذاك الشي اللي داخل على شكل عجينة رطبة خفيفة ديال النشا والألياف.
السمية العالمية "Pipoca" أصلها جاي من اللغة ديال التوبي (Tupi) من الكلمة pipoka، واللي المعنى ديالها "الجلد اللي مفرقع"، مخلطة من pira (الجلد) وpok (تفرقع ولا ترطق) وa (زيادة ديال الاسم).[1] وفي لغتنا الحضرية والعروبية ديال بركان والشرق كايسميوها "الݣلية" حتاش كاتقلى في الكاميلة ولا المقلاة.
البشنة اللي كاتزرع على ود الݣلية هي نوع خاص، السبول ديالها كايجي أصغر من السبول ديال البشنة العادية. الحبات ديالها يقدروا يجيو بزاف ديال الأشكال (مبلطين، حادين، إلخ) وبزاف ديال الألوان (مثل الصفر، الأبيض، الغوز، والموف). الميزة الكبيرة ديالها هي أن حباتها صغار وفيهم نشا قاسح ومبلور. وعندها القدرة باش تترطق ملّي كاتحط فوق العافية وتتسخن، باش تخرجلينا الݣلية اللي كنعرفوها كاملين. من بين الأنواع المزروعة كاين "Zélia" و"Colorado pop-1". وكاتزرع فالمعتاد مابين أيلول (سبتمبر) وتشرين الثاني (نوفمبر) (اللي هو فصل الربيع فمعظم أمريكا الجنوبية).[2][3]
فالفلاحة ديالها، كايخليو اتساع ديال 0.8 متر بين السطور و0.2 متر بين النباتات، وعادة كايحتاجو مابين 10 حتى لـ 15 كيلو ديال الزريعة في الهكتار الواحد. الجني كايقادوه إما باليد ولا بالمكاين، ملّي تكون الرطوبة فالحبات واصلة ما بين 16 و18 في المية. والذرة ديال الݣلية خاصها تتباع ملّي تكون نسبة الرطوبة فيها طابحة بين 12 و13 في المية.
الأوروبيون الأوائل اللي وصلوا للقارة الأمريكية وصفوا الݣلية – اللي ما كانوا كايعرفوهاش قاع قبل – بلي راه أكلة مالحـة كاتصوب من الذرة، وكانوا السكان الأصليين (الهنود الحمر) كايستعملوها كأكل وكـشوشة ولا زينة للشعر. الآثاريون جَبْدوا حبات ديال الذرة ديال الݣلية ماشي غير في البيرو، ولكن حتى فولاية يوتا فالمريكان، وهاد الشي كايبيّن بلي كانت داخلة فالماكلة ديال بزاف ديال الشعوب الأمريكية. وكايتعرف بلي فالبدية الهنود كانوا كايصوبوا الݣلية بالسبولة كاملة فوق العافية، ومن بعد ولاو كايحطوا غير الحبات فوق الجمر، حتى اخترعوا طريقة مطورة: كايطيبو الذرة فقدرة ديال الطين مع الرملة السخونة.
الݣلية كانت كاتتباع فالأسواق والجرادي فالولايات المتحدة فالمئة عام الـ 19 (القرن 19). وفاللخر ديال هاد الفترة، بانت السينيما الأولى فالمريكان، ومعها جاو البياعة التجارة اللي كايتمشاو بالكاروسات ديالهم كايبيعو الݣلية، اللوز، والكاوكاو والسكر المحروق. فالبدية، أصحاب السينيما ما كانوش كايحملوهم وكايظنوا بلي الݣلية كاتشغل الناس على التفرج فالأفلام.
فالأزمة الاقتصادية الكبيرة ، الݣلية كانت رخيصة بحال فابور وولت مشهورة بزاف. وهكدا، التجارة ديال الݣلية كبرت وولت مصدر رزق وخبزة لبزاف ديال الفلاحة اللي كانوا مقزدرين وفحالة صعيبة.
من بعد الحرب العالمية الثانية، ملّي انتشرت التلفزة، طاح الاستهلاك ديالها واحد الشوية،[4] حتاش الناس فالمريكان خباو السينيمات وقعدوا فديارهم. ولكن دغيا تولات العادة ديال ماكلة الݣلية قدام التلفازة، وهاد الشي رجّع الطلب عليها بشكل كبير.
فـ 1981، الشركة الأمريكية الكبيرة جنرال ميلز سجلت أول براءة إختراع ديال الݣلية الخاصة بالميكروأوند. وهاد الشي كان هو السبب فالزيادة الخيالية فالاستهلاك ديالها. وخا كايعتبروها ماكلة يقدر يكون فيها شي خطر على الصحة، إلا أن الاستهلاك ديال الݣلية تطلع بزاف فالعام اللي جا من بعد هاد الاختراع.
اليوم ديال الݣلية فالبرازيل كايحتفلوا بيه فـ 11 مارس. أما فالولايات المتحدة، الجمعية ديال الݣلية اختارت نهار 19 يناير. والݣلية كايعتبروها هي السناك والماكلة الرئيسية والرمزية ديال ولاية إلينوي الأمريكية من عام 2003.
- ↑ NAVARRO, E. A. Método moderno de tupi antigo: a língua do Brasil dos primeiros séculos. 3ª edição. São Paulo. Global. 2005. 463 p.
- ↑ COELHO ARAUJO, Wilma Maria; DI PILLA MONTEBELLO; Narcy. Alquimia dos Alimentos. Senac, 2008. pp. 346. ISBN 85-98694-30-4
- ↑ Confederação Nacional do Comércio. Carta mensal do Conselho Técnico da Confederação Nacional do Comércio, Edições 297-302. pp. 8.
- ↑ Clube da Pipoca. Busca. Disponível em https://www.clubedapipoca.com/blog/historia-da-pipoca/. Acesso em 13 de setembro de 2017.